الرحالة و المسافرون العرب

عمرو شريف يكتب رحلته إلى جزيرة رودس اليونانية (الجزء الثاني)

رحلة- عمرو شريف:

رحلة- عمرو شريف:

الحلم ده سهل وممكن يتحقق بكل سهولة لأن اليونان تملك شبكة جزر كبيرة وكلها ممتعة، هنبتدي النهارده بواحدة من أشهر الجزر اليونانية وهي جزيره رودس، المسافه بين أثينا ورودس هي 435 كيلو (طبعا في البحر لأنها جزيرة) ولو طالعيين عن طريق شركة سياحة، على فكرة أوقات كثيرة شركات السياحة في مصر بتطلع طيران شارتر لرودس، ودي بقي المسافة بتاخد ساعة بالطياره من القاهرة, ولو طبعا طالعيين لوحدنا يبقي لازم ننزل أثينا ونغيير طيران أو نركب مركب علشان نوصل لأن مفيش طيران مباشر بين القاهرة ورودس، يلا بينا نبتدي بقى.

– بالمركب من أثينا لرودس التذكره ذهاب وعودة 40 يوروو بس الرحلة 12 ساعة بالمركب.

 

– طائرة من أثينا إلى رودس علي طيران شارتر اسمه رايان إير يبدأ من 50 يورو (بشنطة واحدة 10 كيلو) والرحله تاخد 50 دقيقة.

جزيرة رودس دي مناسبة جدا للشباب، بجد جزيرة حلوة قوي وروشة طحن مش عائلية قوي وطبعا اللايف ستايل بتعها روش موت.

وصلنا بقي لرودس هنعمل إيه؟ رودس فيها أوتيلات كثيرة جدا مع إنها صغيرة طبعًا جدًا تلفها بالعجلة في ساعتين، الأوتيلات معظمها نجمتين وثلاث نجوم وشوية بقى 4 نجوم و5 نجوم يتعدوا علي صوابع الإيدين, وده يوضح إن الطائفة من الأوروبيين اللي بيروحوا هما اللي عايزيين يستمتعوا بشمس وبحر.

أرشح لكم فندق اسمه أوروبا 3 نجوم والغرفة لشخصيين لمدة 7 ليالي 210 يورو يعني الفرد 105 يورو (يعني الليلة 15 يوروو) وايه بالافطار وكمان فيه بيسيين في الأوتيل وده أنا قعدت فيه شخصيا، وأهم ميزة فيه شارع الروشنة والسهر (هنتكلم عنه بعد شوية)، الأسعار دي في مايو 2016 لأننا أكيد هنسافر في الصيف.

http://www.booking.com/hotel/gr/europahotelrhodes.html

 

المنطقه التانية وهي شاطئ فليراكي ودي بقي تعتبر البييتش الحقيقي بتاع رودس يعني هي الشاطيء الرملي ودي تقريبا زي منطقه العجمي عندنا في مصر، 22 كيلو من رودس وحوالي 30 دقيقه بالباص, وبصراحة أنا كل يوم كنت لازم أروحه.

غير بقى إن فيه أكبر اكوا بارك في أوروبا, وشوية ألعاب على البحر تحفة بجد وتجنن منها لعبه البانجي، ودي عبارة عن ونش أبو أستك يعني يربطوا رجليك بحبل طويل موت وهو أصلا مش حبل، أستك تخين وتطلع بالونش اللي هو بتاع البنا والعمارات يكون متعلق فيه علبة تقف عليها وتطلع بيه يمكن 3 أدوار وهوبا وترمي نفسك في الهوا وتنزل زي الصاروخ يروح الحبل اللي في رجليك يشدك ولأنه أستك تفضل تطلع وتنزل بيه لغايه ما تهدي خالص وتثبت في الهواء الونش ينزلك) وأرشح لكم فيه أوتيل اسمه أشوسه الـ7 ليالي غرفه مزدوجة 196 يورو.

تذكره الباص 2.20 يورو و الباص بيطلع من محطه الباص المركزية في نص رودس كل 45 دقيقة ولو تاكسي 17 يورو.

http://www.booking.com/hotel/gr/achousa.html

المنطقة الثالثة اللي ممكن نقعد فيها هي منطقه لالي زوز وهو شاطي مش بعيد من رودس حلو قوي ومليان جناين وشواطئ مجانية وهو على بعد 10 كيلو من رودس وتذكرة الباص له 1.70 يوروو والتاكسي 12 يوروو والفندق بتاعنا برضه 3 نجوم واسمه اليوناس وسعره 171 يورو للفردين في الـ7 ليالي من غير فطار يعني الفرد 85 يورو.

 

رحنا رودس وحجزنا الفندق وكله قشطة قوي لحد دلوقتي, هنعمل إيه ونزور إيه ونسوي إيه طبعا أنا كشاب طول النهار هروح البحر وأكيد شاطئ (فاليراكي) أنزل الميه وأركب اللعب وأتعرف علي ناس (وحط 100 خط على ناس لأن أسهل حاجة هناك تتعرف على شباب و شابات 😉 وأقضي النهار بطوله وأرجع علي 6 المغرب الفندق, تاخد الدش التمام وتنزل تتعشى وبعد كده تروح تلف شويه في الشارع اللي اتكلمت عليه جنب فندق أوروبا وعلى الساعه 12 ممكن تكمل سهرتك لو بتحب السهر ( رودس مشهورة بالحياة الليليه الصاخبة يعني آخر جنان وروشنة).

نكمل ولا زهقتوا..  طيب في الجزء اللي جاي هنعرف المزارات اللي تتراح والأكل والحاجات المهمة، رودس بجد فيها حاجات حلوه قوي.

الموضوع اللي فات اتكلمنا عن الطيران والسكن وأشهر شواطئ جزيرة رودس. في الموضوع ده هنعرف أشهر المزارات السياحية على الجزيرة وأسعارها وكمان أسعار الأكل على الجزيرة 🙂

– أول مزار هو قريه اسمها ليندوس (56 كيلو من رودس) القرية شكلها تحفة وفيها قلعة كبيرة علي الجبل (القرية نفسها على الجبل) والقلعة اللي فوق الجبل دي بقى حكاية فعلا اسمها الأكروبوليس وبتطلع لها على ظهر الحمار (تأجير الحمار بـ 5 يورو) وطبعا فيه مطاعم وساندوتشات وكده في القرية, وعلى البحر, وطبعا النصيحة روح ليندوس بالمركب يعني هتروح في المينا بتاعة رودس منطقه اسمها ماندراكي وهتاخد المركب بس دي بتكون مع شركات يعني المركب بيكون فيها كذا وقفه علشان تنط وتعوم وغدا, لمدة يوم كامل والمركب دي لما بتوصل ليندوس بتسيبك ساعتين ونص وبعد كده ترجع وتكمل يومك فيها ودي طبعا غالية شويه, يبقي علينا وعلي الباص من المحطة المركزية للباصات وده سعره 5 يورو للاتجاه الواحد بجد يا جماعة مزار ما يتفوتش.

– ثاني مزار هو الأولد تاون (ميديفيل سيتي) ودي بقى في مدينة رودس نفسها تلاقي زي حصن كده كبير قوي ومتحاط بسور عالي وتدخل جوه تلاقي عالم تاني كافيهات ومطاعم ومحلات كثيرة وطبعا آثار كثيرة قوي وشوارع ضيقة زي الدودة جواها 200 شارع يعني توهان موت وهي دي رودس القديمة وطبعا بتروحه مشي لأنه في وسط مدينه رودس, وطبعا السهر فيه كمان جميل قوي , وفيه قصر الفارس الأكبر وده دخوله بـ 6 يورو بس يستحق بجد قصر تاريخي بتتفرج علي حاجات مبهرة فيه.

– ثالث مزار هو خليج سان بول وده عباره عن خليج فيه شاطيء رملي والميه فيه بتبرق وفيه سنوركلينج, الشعاب المرجانيه فيه تحفه والدخول ببلاش ولو هتأجر شيزلونج 5 يورو أو شمسية وكرسيين 8 يورو, وده بقى بتروحه من ليندوس يعني خلصت ليندوس بتمشي 15 دقيقة وتوصل له.

– رابعا الووتر بارك بجد دي تعتبر أكبر واحدة في أوروبا لعب للكبار والأطفال مبهرة وتستحق تقضي اليوم كله فيها هي آي نعم تعتبر سعرها حراق شوية دخولها 22 يورو بس يعني الواحد هيعيش كام مرة وكمان من السهل توصل لها في أتوبيسات مجانية بتروح لها بتتحرك من المينا بتاع مدينة رودس اللي قلنا اسمها (ماندراكي), والأتوبيس مواعيده كل ساعه يعني 9 و10 و11 وكده مواعيد الفتح من 9.30 إلي 7 بالليل وفيه جوه مطاعم وكافيهات, أنا بنصحكم بموضوع تأجير موتوسيكل أو فيسبا لأن بجد دي حاجة شيقة جدا ومنتشرة قوي في رودس الفيسبا أقل حاجة 50 – 80 سي سي ودي بقي سعرها ما بين 15 لـ 20 يورو في اليوم, وكل ما عدد الأيام زاد السعر قل السعر يعني أسبوع تأجير بـ 90 إلى 95 يورو وهتلف بيها كتير فحت, وهتروح كل حتة وفيه بيكون تأمين عليك وعليها وبيوصلوها ليك لحد الفندق, بس يا جميل لازم يكون معاك رخصة دولية بمعني أصح رخصة السواقة بتاعتك بتروح نادي السيارات وتعمل رخصه دوليه . لو بقي ما نعرفش نسوق يبقي العجله تاجيرها في اليوم 6 يورو و برضه يا سيدي لف هيستيري بيها , الشوارع مساعده جدا انك تلف بيها

نيجي للاكل بقي وده بقى أرخص حاجة تاكلها السندوتش المشهور بتاعهم اسمه (بيتا سلوفاكي) وده عباره عن زي رغيف بلدي ملفوف زي القرطاس ومليان شاوروما وبطاطس مقليه وطماطم وخس ومايونيز وكاتشب وبصل وكل ده بـ 2.5 يورو و ده ساندوتش مقلبظ قوي يعني واحد هيشبع واثنين منه حيجيبوك أرض أرض 😀 و السندوتش ده موجود في كل المطاعم أما بقى لو حابيين نقعد و ناكل طبق في مطعم اسمه skordakos أسعاره معقولة قوي يعني عشاء حلو ممكن في حدود من 6 إلى 8 يورو, والمطعم ده موجود في وسط مدينه رودس هتلاقيه أكيد. المطعم التاني هو اسمه بروس كباب وده بقي الهامبورج بتاعه بيف يعني مش خنزير وطبق هامبورجر حلو معاه بطاطس بـ 4.5 يورو, ولو طلبت طبق ميكس جريل يعني لحمة وكفتة وفراخ وريش وسلطه كبيره موت وسلطه زبادي و طن بطاطس محمره (طبق حجمه كبير قوي) بـ 8 يورو بس و البيبسي بـ 1 يورو و ده مكانه برده في وسط مدينه رودس.

اترك رد

لن يتم نشر عنوان بريدك الإلكتروني.