رحلة هونج كونج | الرحالة | رحلة- نادر سليمان وإبراهيم النادي:
مفيش أحلى من إنك تسافر مع صاحبك أو مع صاحبتك، وتجروا في المطار وتستهبلوا سوا على اللي رايح واللي جاي، وتتجننوا زي الأفلام، بس we travel مش فيلم، إحنا حقيقة وواقع وعايشين حياتنا اللي بجد.
استمتع بحياتك انت هتعيشها مرة واحدة، استمتع وكأنه آخر يوم في حياتك، المهم احنا قررنا نعمل كده بجولة حول آسيا. وصلنا هونج كونج وهنبتدي فيلم السفر، هاتوا فيشار واستمتعوا معانا..
آه صحيح، هونج كونج من غير فيزا ولا تصريح، يعني مبتدفعش ولا دولار في المطار.
رحلة هونج كونج
في البداية مهم نتكلم عن الحاجات اللي هتحتاجها لما تسافر، أولًا لازم يكون معاك باور بانك، وده مهم جدًا، ومهم كمان يكون أصلي مش من العتبة 😀
كمان لازم تجيب معاك فيشة من كذا نوع، كمان لازم فيزا أو ماستر كارد وشوية كاش معاك عشان متسحبش كتير، والأفضل متسحبش إلا للضرورة
كمان مهم يكون معاك كاميرا بروفيشنال، وسيلفي ستيك طبعًا، وأخيرًا لازم يكون معاك خريطة البلد اللي هتروحها، وممكن تلاقيها في المطار أو الهوستيل
السفر الى هونج كونج
المهم وصلنا هونج كونج وهي بلد سياحية من الدرجة الأولى وغالية شوية نظرًا لصغرها وطبيعتها، بس احنا برضه بنشوف حلول كتير.
كمان أحلى حاجة في هونج كونج إنها جامعة بين الطبيعة والمدن، يعني تنفع مع أي دماغ، يعني بتدي على فيتنام ونيويورك كده
المهم إن المكان ده في الـcentral واحنا رايحين مكان اسمه Victoria Peak وده من أشهر المزارات هناك، وسعره تقريبا 40 ريال سعودي (100 جنيه مصري)، والـcentral طبعا فيه تقريبا كل حاجه عامل زي رمسيس كده. 😀
السياحة في هونج كونج
من المواقف اللي شفناها من شعب هونج كونج زي مانتو شايفين بالصورة، دايمًا اللي بيقف بالسلم المتحرك بيكون علي اليمين واللي بيتحرك علي الشمال، وده من شدة التزامهم بالنظام
ده غير إن في أي مواصلات بيكون فيه موظف بيعملك التحيه ويشاورلك علي المخرج 😀 بس مشكلتهم انهم متعصبين شوية وقليل لما تلاقي حد يتكلم غير الصيني.
بس النهارده كمان حصلنا موقف مش هننساه أبدا وهو ان احنا نسينا الكاميرا في مكان اسمه ngong ping أشهر معلم هناك وفيه البوذا الكبير، وبقالنا ساعتين بنلف ندور عليها وناسيين فين
في الآخر لقيناها وافتكرنا إن احنا كنا هنا، بس اللي يجنن إنها ماتسرقتش وفي مكانها وزي ماسبناها بالظبط !طب احنا ايه اللي ناقصنا عشان نبقى كده؟!.
أوشن بارك هونج كونج
إحساس حلو لما تلاقي نفسك، اللي كانت متعودة على مجتمع روتيني، تتأقلم مع مجتمع مختلف تمامًا عن مجتمعك.
المهم قررنا نروح أوشن بارك ocean park، وده منتجع كامل فيه كل ما تتخيل، الطبيعة، ودي أهم حاجة لأنك بتشوف جزيرة هونج كونج من فوق، إضافة إلى الملاهي، الكافيهات، المطاعم وحاجات تانية كتيييير.
الباندا في هونج كونج
المنتجع كمان فيه الباندا الحقيقي بس معرفناش نصوره عشان بعيد شويه ونايم فيه بيته ، ده غير إنك بتطلع الجبل فوق بمترو تخيلوا
والأحلى بقى إنك ممكن تركب تيليفريك، يوريك الجزيرة كلها من فوق والأبراج وحياه تانيه خالص ده غير إن فيه شوية معابد وتراث هونج كونج القديم
من الآخر ده من أجمل المزارات اللي هناك وتنفع للعيلة أو جروب، ودي عايزه من أول النهار، يوم كامل أو نص يوم، المفاجأة بقى إن سعرها 400 جنيه شامل كل حاجة جوا من الألف للياء مع المواصلات ذهاب وإياب.
ديزني لاند هونج كونج
ومين فينا مكانش بيتفرج على ميكي ماوس وأفلام ديزني لاند ويمكن لحد دلوقتي كمان، احنا حبينا نرجع بالزمن الجميل شويه، وكان نفسنا نزور ديزني لاند في أي مكان بالعالم وحققنا الحلم ده انتو كمان لازم تحققوه
العرب هنا كتير قوي بس لما تيجي تكلمهم تلاقيهم عاملين من هونج كونج قصدي من بنها 😀 تقريبا ده أكتر مكان فيه عرب في هونج كونج، ماعلينا خلينا في السعر، سعرها تقريبا 600 جنيه، برضه شاملة كل حاجه من أول ميكي ماوس لحد آخره 😀
,الجدير بالذكر بقى إن ديزني لاند موجودة بس في الولايات المتحدة، اليابان، فرنسا، هونج كونج، بس خليك في هونج كونج أحسن مراعاة للباسبور بتاعنا
بوذا الكبير في هونج كونج
نروح بقى لبيج بوذا buddah ~ Ngong ping ، المكان دا عشنا فيه لحظات مش هننساها طول عمرنا، وكانت من بداية ركوبنا الأتوبيس جنب محطة المترو علي طول
سعر التذكرة رايح جاي 70 جنيه، وينفع تاخدوا تلي فريك يلف من فوق بس مكلف جدًا والأحسن بالأتوبيس ( المكان ده جنب المطار علي طول يعني ممكن تخليه آخر مزار وانت رايح أو أول ماتيجي.
رحلة هونج كونج
في طريقنا لأعلى الجبل في رحلة هونج كونج شوفنا كمية مناظر طبيعية وجبال كبيرة خلتنا مذهولين من عظمة خلق ربنا، ولما وصلنا فوق عرفنا يعني إيه حضارة صينية، من معابد واحترام للمواشي اللي بتشوفها في المكان كله
حسينا برهبة غريبة كده لغاية ما شفنا قدامنا 268 سلم عشان نوصل لتمثال بيج بودا
التمثال دا بقى ارتفاعه 34 متر عن الأرض، وفضلوا يبنوا فيه 12 سنة، دا غير انهم موجهينه للشمال تحية ومباركة للكل وللشعب الصيني خاصة، وطبعا استجمينا في المكان دا وغسلنا عنينا بالمناظر الساحرة والهوا الجميل.
ماكاو لاس فيجاس الشرق
المهم في آخر رحلة هونج كونج قلنا نهيص شوية، رحنا مكان ناس كتير متعرفش عنه حاجة اسمه lan kwai fong المكان ده جمب محطة الـcentral على طول بس جوا حواري كده واحنا بنحب نستكشف لا والمكان بيدي على خليج نعمه كده بس بجو صيني
مهم بقى نقول إن المكان ده جزء من دولة ماكاو اللي هيه لاس فيجاس الشرق، واللي هي جنب هونج كونج وبتتراح بـ ferry بساعة واحده وبرضه من غير فيزا.. استنوا تقرير كامل بالفيديو عن هونج كونج ? ?اللي خلصنا فيها رحلتنا.. تفتكروا رايحين علي فين دلوقتي