fbpx
الرئيسية / آسيا / الدراسه في جورجيا | تجربة شخصية ليوسف عادل: حققت حلمي في تبليسي
الدراسه في جورجيا
جورجيا

الدراسه في جورجيا | تجربة شخصية ليوسف عادل: حققت حلمي في تبليسي

الدراسه في جورجيا | الرحالة | رحلة- يوسف عادل:

الموضوع بدأ معايا بعد ما خلصت الثانوي وقرفه، وكان حلم حياتى أدخل صيدلة حكومة أو خاص (المهم صيدلة)، طلعت النتيجه وكنت من الشرفاء اللي جابوا 78% ومن حظى اللي كنت فاكره سىء كانت أول دفعه يطبق عليها نظام الـ 80% (ده أقل مجموع ممكن تدخل بيه جامعة خاصة).

المهم لفيت على جامعات مصر الخاصة، كلهم أجمعوا على أغنية مكي بتاعة بشهادتك مدد جنب أي حيط وخد لك بوسة، فبصراحه كان سواد الدنيا كله في عينيا، لأن كنت باني كل أحلامي على صيدلة، المهم قفلت الدنيا خالص ومود كآبة، ربنا ما يكتبه على حد.

السفر الى جورجيا

بالصدفة عرفت من الفيس إن فى رحله جورجيا طالعة أسبوع بـ 140$ تقريبا (1000 جنيه) وقتها طبعا وطلعت الرحلة، وده الجزء الأول، جزء مهم بالنسبه للي بيقرأ، نزلنا وكنا جروب كبير في حدود 50 فرد، ركبنا أتوبيس، وصلنا حاجه اسمها هوستيل، عرفت بعدها إن ده حاجة زي فندق بس على صغير.

كنا في حدود 6 أفراد في الأوضه بس كان مكان نضيف وصاحبة المكان حبتنى جدا مش عارف ليه (قد أمي) علمتنى كام كلمه أمشي بيهم نفسي، لما أطلع أجيب أكل، ديل الرحله كان السكن أسبوع و5 رحلات كانت تبليسى وباكوريانى وبورجومى وأنانورى ومسخيتا وسغناغى وجوداورى وسغناغى آخر يوم كان فرى للشوبينج، واحنا كرجاله الشوبينج بياخد من دقيقة لدقيقة و نص 🙂 فخلصت بدرى (لأنهم كانوا منزلنا فى روستافيلى وده فيه كل المحلات اللازمة للشوبينج).

الدراسه في جورجيا

بعد كدا اتصلت على الجايد اللي كان معانا واتصاحبت عليه ونزلنا اتمشينا فبقوله كانت رحلة جميلة معاكم، والبلد حلوة قوي يا بختك إنك عايش هنا في جورجيا، فقالى طب ما انت كمان ممكن تعيش في جورجيا، فبقوله إزاى مش لما اخلص دراستى الأول، قالى ماتيجى تكمل دراستك هنا، وتجرب الدراسه في جورجيا ، فقلت ازاى هو هنا فى حقوق، قالى فى بس بالجورجى، بس الدراسه في جورجيا فيها طب وصيدلة وأسنان وبيزنيس بالإنجلش شهادة معتمدة من الاتحاد الأوروبى ومش عارف جامعة إيه في أمريكا ووو.

قلت له: ياعم صيدلة إيه دا أنا جايب 78% قالى المهم تكون ناجح في المواد العلمية والإنجلش وأنا هظبطلك الباقي (إيه دا شكل الحلم هيتحقق وادخل صيدلة)، وده تانى جزء مهم الدراسه في جورجيا، المهم قلت له انت متأكد إنها معتمدة في مصر قالى آه أنا جايب طلبة من مصر.

تكاليف الدراسه في جورجيا

بصراحه قلت الراجل دا بيشتغلنى المهم كملت شويه في جورجيا ومنزلتش مصر مع الجروب وقلت أنا كده كده لسه فيزتى 3 شهور، وأشوف حوار الدراسه في جورجيا ده (بصراحه الراجل ادانى أمل إن حلم صيدلة ممكن يتحقق).

المهم طلع كل كلامه صح وقلت له ماشى لو هقدم في صيدلة في جورجيا بكام قالي 1000$ فقلت أنا مصرى أعرف اعمل كل حاجة 🙂 فرحت أشهر جامعة هنا في جورجيا وقلت أقدم لنفسى قالى هتدفع 200$ وتمتحن حاجه زى التويفل وكيمياء وفيزياء ولو منجحتش هيدونى أول سنة المواد دى بـ 6500$ وبعد كدا يدخلونى صيدلة فطلعت من عندهم قفايا يقمر عيش 😀 المهم كلمته وقلت له موافق بس مش همتحن قالي أمال أنا واخد 1000$ ليه!، قلت له تمام المهم ظبط الدينا كلها والفيزا الدراسية.

أنصحك أيضًا بقراءة:

السياحة في جورجيا .. أجمل 6 اماكن سياحية في جورجيا : بينها جبل كازبيك

الاماكن السياحية في جورجيا : أفضل 10 مناطق يمكن زيارتها في جورجيا

مصطفى أمين يكتب رحلة السياحة في جورجيا : خاتشبوري وشاي بالمانجو

رحلتي الى جورجيا | رحاب أحمد تكتب رحلتها إلى جورجيا: برنامج سياحي كامل

المدن السياحية في جورجيا | تعرف على أهم 5 مدن سياحية في جورجيا

عاصمة جورجيا | عمرو المغربي يكتب رحلته إلى جورجيا: برنامجك الكامل في تبليسي

تأشيرة جورجيا | عمرو المغربي يكتب تجربته: جورجيا.. فيزا من غير طوابير

عبد الرحمن أيمن يكتب عن الاماكن السياحية في جورجيا : السياحة في تبليسي

جورجيا سياحة | أهم المعالم السياحية في جورجيا: رحلة إلى دولة البطريق

شاهد أيضاً

رحلتي الى جزيرة بوكيت

رحلتي الى جزيرة بوكيت : تجربة فتاة مصرية عمرها 19 عامًا

رحلتي الى جزيرة بوكيت | الرحالة | رحلة- بسمة محمود:   أنا بسمة 19 سنة، …