السياحة في فينيسيا | الرحالة | رحلة- جنان عبده:
إنت ممكن توصل (البُندقيّة) فينيسيا وتتركها طيران داخلي بوصلها من عدة مناطق مثل روما ، وبسيارة لو قررت تأجر سيارة لكن ساعتها لازم تعمل ترتيبات مصف السيارة وعليه دفع طبعا. وفي القطار السريع.
السفر الى فينيسيا
مثلا من فلورنس لـ فينيسيا تكلفته 39 يورو للشخص. والمدة الزمنية ساعتين و35 دقيقة.وأنا من تجربتي بنصح فيه. سعره معقول وما بتشعر بالطريق والمناظر جميلة ومقعدك محجوز وحتى بكفي إنك تحجز في قسم عادي مش خاص.
وداخل فينيسيا ما بتقدر تتجول في السيارة وراح تضطر تركنها بره في مصف وتدفع عليها.
القوارب في فينيسيا
إنت ممكن تسمع حد بيقولك تاكس، طبعا ما تتوقع حقيقي انه بيقصد تاكسي. التاكسي في فينيسيا هو عبارة عن قارب وعليه إشارة تاكسي. التاكسي هو عبارة عن قارب مع مُحرّك كهربائي.
الباص في فينيسيا المقصود فيه المركب الكبير- السفينة وفي عدة خطوط وأرقام.
محطة الباص عبارة عن غرفة عائمة على وجه المية قرب اليابسة ولما يوصل الكابتن سواق السفينة بيعلن عن وصولها المحطة بيلبس في ايديه قفازات من جلد وبمسك في الحبل الكبير وبرميه في اتجاه الميناء بثبت السفينية في الجدار هناك قبل ما يفتح باب السفينة عشان الركاب تطلع وتنزل منها.
جزر فينيسيا
كل وسائل التنقل بداخل المدينة ومنها للمطار ومنها للجزر اللي حواليها مثل مورانو وبورانو هي بتكون مراكب وسفن أحجام وأنواع.
خط D2 مثلا بوخدك من محطة القطار المركزية الى داخل المدينة وبوقف في عدة محطات. والكابتين بعلن عن المحطة قبل وصولها، متقلقش مش ممكن تضيع في البحر..
تكلفة الباص- يعني السفينة/المركب الكبير اللي بيوصل كل مناطق المدينة هي 7.5 يورو والباص بنطلق من أمام محطة القطار المركزية وبلف في المدينة وبوقف بعدة محطات.
تكلفة الباص اللي بيوصل الجزر اللي حوالي فينيسيا مثل بورانو هو 7.5 يورو وبتاخده من محطة سانت ماركو.
رحلة سياحية في فينيسيا
في قوارب- زورق صغير بوسع لغاية 6 أشخاص باللون الأسود وبقوده كابتن مع مجداف بعملك جولة مدتها 35 دقيقية في زقاقات المدينة الجميلة ومن تحت جسورها المنخفضة وبين البيوت.
رحلة جميلة لكن تكلفتها للمركب 80 يورو ممكن تتقاسمها مع ناس إضافيين خلال رحلة السياحة في فينيسيا
في شركتين واحدة سواقيها- الكابتن يعني بلبسوا بلوزة مخططة أحمر وأبيض والتانية محطتها قبالها قريب من المحطة المركزية للقطار وبلبسوا بلوزة مخططة أبيض وأسود.
أنا سميته “قارب الحب”. وفي قوراب مشابهة لونها كُحلي من محطة سان ماركو.
السياحة في فينيسيا
ما في حافلات في فينيسيا وسيلة التنقل الوحيدة ونقل البضائع برضه هي السفينة وبتلاقي البحر مليان مراكب أشكال وألوان منها اللي بنقل خضراوات ومنها اللي بنقل بضائع أخرى وبتلتقي مع اللي بتنقل الناس وبتسمع الزامور لكل واحدة منها.. الحياة و السياحة في فينيسيا هي في داخل المية نفسها.
المطار موجود قريب من فينيسيا بتحتاج لوصوله بالسفينة حوالي ساعة وعشرين دقيقية بتقطع التذكرة من سان ماركو رقم الباص-السفينة يعني هو A تكلفته 15 يورو. ولو حبيت تروح جزيرة بورانو خد المركب رقم 14 من محطة سان زكريا.