الرحالة و المسافرون العرب

رحلتي الى جزيرة كوه تاو | هذا السبب قد يفسد رحلتك إلى أجمل جزر تايلاند

رحلتي الى جزيرة كوه تاو | الرحالة | رحلة- فرات سامي:

الواحد بيبقي مستعجل يروح جزيرة كوه تاو من بانكوك ومبياخدش باله إن في حاجات في نص الطريق تتعمل، قبل ما أروح جزيرة كوه تاو في الجنوب قضيت كام يوم في محمية كاو سوك  Khao Sok أول يوم كنت بايتة في كوخ من البامبو قبل ما أطلع رحلة  hikingلمدة يومين مع جروب كان معظمه من هولندا ما عدا أنا وتلاتة تانين من إسبانيا.

أول يوم قضيناه بنطلع في وسط شلال والموضوع مكنش مجرد تمشية سهلة لحد ما نوصل شلال عشان كنا بنمشي وبنطلع في الشلال ذات نفسه. وكان في حركة غدر من الطبيعة، تيجي تحط رجلك فاكرها خطوة عادية تلاقي نصك الشمال فجأة بقى في الميه عشان الأرض في الحتة ديه طلعت غويطة ونصك التاني لسه فوق.

رحلتي الى جزيرة كوه تاو

تاني يوم أخدنا أكتر من ساعتين بنمشي في الغابة، بننزل وبنتزحلق بسبب المطرة اللي خلت الأرض طينة عاملة زي “أمير”تلزق في جزمتك وتاخدك معاها. واحد من التايلانديين شاف معاناتي فإداني عصايته أسند بيها لغاية ما وصلنا لكهف فيه خفافيش وعناكب وتعابين كنا بنشوفها بالكشافات اللي على راسنا.

وزي ما هو واضح الطلعة ديه مش لحد خايف إن هدومه أو هو شخصيًا يتبهدل ويفضل أكتر من ساعتين ماشي متغطي بالطين، أنا ودعت شرابين لونهم قلب بني بعد ما حاولت أغسلهم في البحيرة وفشلت. ومفيش أحلى من الأناناس اللي أكلناه بعد الرحلة الاستكشافية دي في جزر تايلند

جزيرة كوه تاو

خلص وقتي في المحمية وجه وقت الجزيرة اللي اخترتها بعد حيرة؛ جزيرة كوه تاو “Koh Tao اللي تخيلت وقتي فيها هيبقى زي الأفلام؛ لون أزرق ورملة بيضا وإيد فيها جوز هند بشاليموه، بس المشهد ده مخبي قبله رحلة الوصول اللي مش بسيطة خالص بالنسبة للـ Backpacker زي حالاتي؛ بدور على أكتر طريقة مش مُكلّفة فالطيارة مش في الحسبان.. وهنا تبدأ رحلتي الى جزيرة كوه تاو

رسيت على المركب البطيء اللي هبدأ بيه رحلتي الى جزيرة كوه تاو واللي مكانش عندي معلومات كتير عنه غير سعره وإنه هيمشي بالليل ودي حاجة كويسة عشان أوصل الصبح بدري.

السفر الى جزيرة كوه تاو

وصلت المينا أنا وواحد هولندي من الجروب اللي كنت معاهم في المحمية، وحجزنا تذاكر رحلتي الى جزيرة كوه تاو هناك من واحد قاعد على مكتب خشب في وسط المينا وجنبه إتنين بيدردشوا.

كلهم على بعض خارجين من مشهد مصري من بتوع الحكومة، بس الموضوع كان بسيط ومبعتناش على مكتب تاني ولا حاجة. اشترينا تذكرتين وكنا أول ناس، قالنا المركب لسه هتتحرك ١١ فممكن تحطوا الشنط فيها دلوقتي. فأخدت حاجتي المُهمة من الشنطة وطلعت أحطها وساعتها كانت المفاجأة، مفيش كراسي، المركب عبارة عن مراتب وبس!.

رحلتي الى جزيرة كوه تاو  أجمل جزر تايلاند

المرتبة كانت طبقًا لحجم المواطن التايلاندي، رفيعة في العرض والسُمك (الاتنين وحياتك) ومترقّمين عشان النظام مهم برضك وكل مرتبة لازقة جنب التانية.. مساحتك الشخصية؟ مفيش الكلام ده.

والملايات اللي مغطية المرتبة ملونة لتَعُم البهجة والسرور في المركب. حاولت استوعب المنظر ده وضحكت بصراحة، حطيت الشنطة ونزلت اكتشف مدينة “سورات تاني”الكام ساعة دول، ومفيش حاجة أحسن من الأسواق التايلاندي اللي بتفتح من العصر أقضي فيها وقتي.

للمزيد: شواطئ بوكيت | تعرف على أجمل 12 شاطئ ومعلم سياحي في بوكيت

حجز فنادق كوه تاو

بس في طريقي للسوق لقيت محل Swensen’s   أحلى محل آيس كريم فيكي يا تايلاند، فهربت من الحر شوية واستغليت الواي فاي عندهم وحجزت الهوستيل للكام يوم الجايين في رحلتي الى جزيرة كوه تاو

أيوه، مش لازم خالص جو التوتر ده اللي تبقى حاجز انت هتقعد فين قبلها بشهر وكل حاجة متظبطة عشان خطتك ممكن تتغير وأصلًا تسيب مساحة لخطتك إنها تتغير، إلا لو في مكان معين في بالك لازم تحجزه سفريتك من غيره هتبوظ.

التسوق في تايلاند

بعد الآيس كريم نتعشى بقى، رُحت السوق أشوف عندهم إيه أكل مجربتوش واتمشيت شوية وسط الأغاني التايلاندي اللي شغالة عند واحد بيبيع سيديهات ودوشة تمثيلية درامية لأقصى درجة وقفت أتابعها شوية، بعديها ريحة الوافلز بالدرة شدتني.

الساعة ١٠ رحت عند المينا تاني بس مستعجلتش أطلع المركب -اللي هتزنق فيها ١١ ساعة- لغاية ما صفروا للناس إن المركب هتمشي. وتبدأ معاها رحلتي الى جزيرة كوه تاو

للمزيد: التسوق في تايلاند : أهم الأسواق الشعبية والمولات والسوق العائم

تفاصيل رحلتي الى جزيرة كوه تاو

منظر المركب من جوا وهي فاضية حاجة ومنظرها حاجة تانية خالص بزحمة الشنط والجزم والشباشب قبل السلالم الخشب اللي تطلّعك لدور المراتب، وعليها بني أدمين بيستوعبوا حجم المرتبة وأنواع إبتسامات مختلفة وغريبة بيتبادلوها مع جيرانهم.

لسه متحركناش وفجأة صوت صريخ وناس إتنفضت من مكانها عشان في صرصار بيطير. الصرصار هرب من الشباك (أو  استخبى) ومحدش كان عارف لو ده صرصار وحيد ولا في باقي للشلة. الرحلة لسه في أولها والمركب متحركتش، يا ترى مخبيلنا إيه تاني؟.

قعدت على مرتبتي وإستخدمت الـ sleeping bag  كمخدة وأخدت وضع إحتجاجي بعدم النوم. بس المزيكا اللي في وداني مساعدتنيش بعد ما النور طفوه الساعة ١٢ ورحُت في النوم بعد محاولات فاشلة لعدم الاستسلام للمرتبة اللي مش مضمونة بالمرة.

صحيت ولقيت النور بدأ يطلع ونسيت المفاجأت/ الصدمات دي كلها لما شوفت منظر جبال وإحنا بنقرب على جزيرة كوه تاو بس ده مش معناه إني رجعت بالمركب ديه. أبدًا!.. كانت بداية صعبة لـ رحلتي الى جزيرة كوه تاو بس الجزيرة تستاهل.

أنصحك أيضًا بقراءة:

فرات سامي تكتب عن مغامرة الـ 115 يوم في جنوب شرق آسيا

فرات سامي تواصل رحلة الـ115 يوم في آسيا: أهلا بكم في بانكوك

فرات سامي تكتب رحلتها الى تايلاند: لا تغادرها قبل هذه المغامرة

فرات سامي تكتب تجربتها في أجمل جزر تايلاند: مغامرة ممتعة

السفر التطوعي إلى تايلند : تجربة فرات سامي في التطوع بمزرعة تايلاندية

اترك رد

لن يتم نشر عنوان بريدك الإلكتروني.