fbpx
الرئيسية / أوروبا / ديزني لاند | الدليل الكامل لزيارة ديزني لاند: تقرير يجيب عن كافة تساؤلاتك
ديزني لاند

ديزني لاند | الدليل الكامل لزيارة ديزني لاند: تقرير يجيب عن كافة تساؤلاتك

ديزني لاند | الرحالة | تجربة- بهاء فاروق:

بجد الواحد بيبقى مبسوط وهو بيكتب تقرير زي ده, كل الذكريات الحلوة بترجع له تاني 🙂

مين فينا وهو صغير متخيلش نفسه شخصية من شخصيات ديزني أو اتخيلت نفسها أميرة من أميرات ديزني. وكل واحد مننا عنده فيلم بيفكره بطفولته سواء كان Lion King أو علاء الدين أو سندريلا أو سنووايت أو توي ستوري.

أفلام كبرنا واحنا بنتفرج عليها, ولحد دلوقتي لو شفناها كل ذكرياتنا عن الطفولة بترجع تاني 🙂 .

ديزني لاند

ايه رأيك ترجع للذكريات الحلوة دي وتقابل كل أبطال ديزني وتعيش جوا القصص اللي كبرت وانت بتتفرج عليها 😉 ؟ كل ده ممكن في مكان واحد بس: ديزني لاند .. أرض السحر والخيال والأحلام. 🙂

أول ما تدخل ديزني لاند بتحس كأنك رجعت 20 سنه لورا هتصحي الطفل اللي نايم جواك, هتنقلك لعالم خيالي كل حاجه حواليك بتحكي قصة من قصص ديزني وطول ما انت ماشي فيها بتسمع موسيقى أفلام ديزني بتحسسك بجد كأنك جوا فيلم كارتون.

لو انت في باريس متفوتش التجربة دي, ديزني لاند بيزورها كل سنه حوالي 15 مليون زائر.. طيب ازاي ننظم رحلتنا لديزني لاند علشان منفوتش أي حاجة فيها؟

ديزني لاند

تذكرة ديزني لاند

تذكرة ديزني لاند مش رخيصة ولكن تستحق كل يورو فيها, أسعار الدخول مش ثابتة طول الأيام, فيه 3 أنواع من التذاكر بتختلف سعرها حسب اليوم والشهر (mini , magic , super magic) كل تذكرة ليها سعر مختلف.

لكن انا أنصحك لو هتروح يبقى تروح الوقت اللي بيكون مش زحمة وتذكرته بتكون mini ودي معناه انك تقدر تدخل في أيام معينة من السنة وكل ما السعر بيزيد بيسمح لك تدخل في أي يوم في السنة وده بيتوقف على الويك إند والمواسم الزحمة زي الصيف مثلا.

بتبدأ الأسعار من 600 جنيه للكبير و550 للصغير، قبل التعويم، (شاملة كل الألعاب والعروض داخل الحديقتين) طيب أعرف اليوم ده ازاي؟ اللينك ده فيه نتيجة بأيام السنة وكل يوم هيكون تذكرته أسمها ايه

أسرار شراء تذاكر ديزني لاند

السر الأول: اشتري تذكرة ديزني لاند أون لاين لأنها أرخص بحوالي 500 جنيه لو اشتريتها من على الباب.

السر الثاني: دور على النت على أقل سعر تذكرة مش شرط موقع ديزني لاند باريس يكون هو الأرخص, فيه مواقع كتير أون لاين ممكن تلاقي التذكرة عندهم أرخص وعليها عروض وتقدر توفر في الموضوع ده حوالي 130 جنيه في كل تذكرة.

طيب إيه ميزة الحجز أون لاين؟

زي ما عرفنا هيوفر لك فلوس وثانيا مش هتحتاج هناك انك تقف في شباك علشان تقطع تذاكر وده ممكن ياخد وقت كبير. والتذكرة اللي بتتبعت على الإيميل وتطبعها بتكون هي دي تذكرة الدخول ولازم تحتفظ بيها طول اليوم.

ديزني لاند

ثانيا: الانتقال إلى ديزني لاند باريس

ديزني لاند تقع خارج باريس وأسهل طريقة للوصول إليها عن طريق القطار RER A الأحمر، اتجاه (Marne-la-Vallée (RER line A4 وده تقدر تركبه من أي من محطات المترو التالية: Charles de Gaulle Etoile, Auber, Chatelet Les Halles, Gare de Lyon, Nation.

سعر التذكرة اتجاه واحد 7,6 يورو وللطفل 3,8 يورو. مدة الرحلة حوالي 40 دقيقة, أول قطر الساعة 5:22 صباحا وآخر واحد الساعه 12:39 مساءا (خلي بالك قوي من المعلومة دي وهقول لك ليه في النقطة الجاية), الوقت ما بين كل قطر والتاني حوالي 15 دقيقة.

نقطة مهمة: خلي بالك قوي من اتجاه القطار لأن غلطة واحدة ممكن توديك آخر الدنيا, وخلي معاك دايما التذكرة بتاعة المترو علشان لو حد سألك وطلعت مش معاك هتدفع غرامة 40 يورو يا جميل.. الموقع ده هيقولك بالتفصيل ازاي توصل.

ديزني لاند

ثالثا: الوصول إلى ديزني لاند

أول ما تطلع من القطار اطلع على السلالم المتحركة واطلع بره المحطة, هتلاقي البوابة الرئيسية لديزني لاند ، ادخلها هتلاقي نقطة تفتيش وبعدها على ايدك الشمال ديزني لاند ستوديوز وأمامك ديزني لاند بارك,هحندخل بنفس التذكرة اللي طبعناها من بوابة خاصة للحجز أون لاين.

 

حدائق ديزني لاند

ديزني لاند عبارة عن حديقتين (ديزني لاند بارك, وديزني لاند ستوديوز) والتذكرة ممكن تشتريها لحديقة واحدة أو الاتنين وأنصحك ادخل الاتنين, قبل ما تدخل أي واحده هتلاقي بروشورات فيها مواعيد العروض بتاع اليوم كله ومواعيد الحفلات وأوقات العمل للحديقة وخريطة الحديقة كمان, خليها معاك هتفيدك قوي.

هنا هتلاقي بروشور للحديقة فيه كل المعلومات عن الألعاب والمطاعم والمواعيد والفنادق وكل شيء

وده لينك لخريطة ديزني لاند باريس وعليه كل الألعاب, ممكن تقف على بالماوس على أي لعبة ويجيبلك كل تفاصيلها

حدائق ديزني لاند

12 نصيحة لتنظيم الوقت في ديزني لاند

1- روح بدري أول ما الحديقة تفتح وهي بتفتح الساعة 10 الصبح علشان تقضي أكتر وقت في الحديقة وتركب أغلب الألعاب وبتقفل 10 بالليل في الشتا و11 بالليل في الصيف.

2- خلي زيارتك تكون يوم وسط الأسبوع وابعد عن الويك إند وأيام الأجازات علشان متقفش في طوابير طويلة لانتظار الألعاب (في أيام الزحمة ممكن تقف 3 ساعات عادي على لعبة 🙂 ) وهقولك تحل الموضوع ده إزاي في آخر نقطة 😉

الألعاب في ديزني لاند

3- لو معاك أطفال ابدأ بالبارك لأنها كلها ألعاب أطفال أكتر ولو كنتم كبار ابدأ بالستوديوز لأن ألعابها للكبار وهم.

4- ابدأ بالألعاب اللي بتاخد وقت انتظار طويل علشان بتكون لسه الحديقة فاضية شوية فتدخل بسرعة.

5- حدد الألعاب اللي انت هتلعبها في زيارتك لديزني لاند, لأنك لما تدخل هتتوه وسط كترة الألعاب وصعب قوي تركب كل الألعاب, وتقدر تعرف الألعاب من موقعهم ومن البروشور اللي انت أخدنه قبل ما تدخل.

ديزني لاند

المطاعم في ديزني لاند

6- في مطاعم كتير بس الصراحة غالية, فممكن تاخد معاك أي أكل ودخوله مسموح, فخد معاك شوية سناكس وساندوتشات وانت رايح.

7- ساعات بتبقى الطوابير طويلة ومكتوب بره الوقت المتوقع لوصولك للعبة وممكن يبقى بعد 40 دقيقة مثلا , متتوهمش وأدخل عادي الطابور بيمشي بسرعة ومش هتحس بالوقت لأنك وانت واقف في الطابور نفسه هتكون عايش جوا قصة اللعبة اللي هتركبها.

8- لو معاك أطفال خليهم دايما تحت عنيك ولو لا قدر الله طفل تاه, اطمن مش هيعرف يطلع لوحده والأمن في كل مكان وفيه مكتب خاص بالأطفال المفقودين.

عرض قصر ديزني لاند

9- بلاش حركات لطيفة إنك تزاحم حد في الطابور أو تنظ السور مثلا 😀 لأن هناك هتلاقيهم محترمين جدا وكل واحد بيحترم دوره 🙂

10- فيه عرض مش طبيعي وهو العرض الرئيس لديزني لاند بيبدأ الساعة 11 بالليل عند قصر ديزني وده لا يفوتك مهما كنت تعبان لازم تتفرج عليه (احنا خلصنا لعب الساعة 8 وفضلنا قاعدين لـ 11 بليل علشان نتفرج عليه والصراحة لم أندم على أي ثانيه انتظار علشان أشوف العرض ده لأنه إبهار بمعنى الكلمة).

بجد من أحلى العروض اللي هتشوفها في حياتك, العرض مدته تقريبا نص ساعة, أول ما تخلص لعب وعلى الساعة 9 كده مثلا روح اختار مكان مناسب أمام القصر واقعد هناك ومتتحركش لأن على الساعة 10 تقريبا هتلاقي المكان بقى زحمة جدا.

بس نصيحة أول ما يخلص العرض تطلع بسرعة على القطار لأن لو اتأخرت في الطلوع هتلاقي زحمة جدا عند القطار للعودة إلى باريس, أسرع طريق انك تمشي عبر المحلات باتجاه بوابة الخروج لأن هتلاقي الشارع الرئيسي طوفان من البشر 😀

ديزني لاند

ملابس ديزني لاند

11- لو هتروح مع أولادك, نصيحة أخوية اشتري لهم ملابس الشخصيات اللي بيحبوها قبل ما تروح هناك وخليهم يلبسوها في الحديقة لأن الأطفال هناك أغلبهم بيبقوا لابسين زي الأميرات (كان على وقتنا أميرات فروزن ايلسا وأنا) ولو فكرت تشتري اللبس من هناك فاعمل حسابك على فستان بـ 700 جنيه أقل حاجة 😀

12- الـ Fast Pass دي خدمة عملاها ديزني على بعض الألعاب اللي بيكون عليها انتظار طويل جدا, هتلاقي جهاز خارج اللعبة مكتوب عليه fast pass بتمرر تذكرتك المطبوعة عليه وبيطلع لك تذكرة صغيرة بتسمح لك انك تدخل اللعبة مباشرة في وقت معين.

خليني أقولكم مثال: يعني مثلا وصلت لعبة بيتر بان الساعة 11 الصبح هتلاقي عندها fast pass هتمرر تذكرتك المطبوعة على الجهاز وهيطلعلك تذكرة مكتوب فيها الموعد اللي تيجي فيه تدخل اللعبة على طول بدون ما تقف في طوابير.

مثلا هيكون مكتوب عليها الدخول الساعة 1 الظهر, هيبقى أمامك ربع ساعة فقط من 1 إلى واحده وربع لازم تكون متواجد عند اللعبة علشان تدخل من مدخل خاص ومتقفش في طوابير, هي دي فكرتها.

ديزني لاند

الـ Fast pass في ديزني لاند

هتقولي طيب ما أعمل كده في كل الألعاب؟ للأسف ما ينفعش لأنك لو طلعت fast pass بتذكرتك متقدرش تطلع واحدة تانية إلا بعد انتهاء وقت الأولى وهكذا, يعني في المثال الأول كان لازم تدخل اللعبة الساعة 1 الظهر مثلا , من الساعة 11 الصبح إلى الساعة 1 الظهر مش هينفع تاخد أي fast pass جديد لحد ما الأول موعده يعدي.

نصيحة: لو خلصت مثلا لعبتك اللي أخدت عليها fast pass ودخلت ولعبت, أول ما تخرج اتجه مباشرة على اللعبة الجديدة اللي عاوز تركبها وعليها فاست باس وخد واحدة جديدة وروح إلعب أي ألعاب لحد ما يجي وقت دخولك ليها.

وفيه حاجة كمان ممكن تاخد فاست باس للعبة ولو ملقتش عليها زحمة أدخلها عادي بدون الفاست باس ولما يجي وقت الفاست باس بتاعها أدخلها مره كمان بدون طوابير 🙂

أنصحك أيضًا بقراءة:

عالم ديزني | 12 نصيحة للاستمتاع بوقتك في رحلة ديزني لاند

عالم ديزني لاند في باريس : لن تكتمل رحلتك إلى هناك إلا بزيارته

ديزني | 10 أسرار مذهلة لا تعرفها عن ديزني لاند: أنفاق سرية وقطط ليلية

ديزني لاند فرنسا : تعرف على أسهل طرق الوصول إليها وأفضل أوقات زيارتها

هذا التقرير منشور بالاتفاق مع صفحة Travel Secrets

شاهد أيضاً

أجمل المدن السياحية في تايلاند

أجمل المدن السياحية في تايلاند : بينهم بانكوك وبتايا وشانجماي

أجمل المدن السياحية في تايلاند | الرحالة | رحلة- بهاء فاروق:   بداية عشقي للسفر …