الرحالة و المسافرون العرب

بهاء فاروق يكتب رحلته إلى هولندا: انسى همام في أمستردام

محتويات الصفحة

رحلة- بهاء فاروق:

في التقرير ده هكتب تفاصيل رحلتي لمدينة الأحلام أمستردام 🙂 هنقل لكم تجربتي كما هي. أول فكره هتيجي في بالك عن أمستردام انها بلد التناقضات هتلاقي فيها الطبيعة والورود الساحرة وطواحين الهواء، والقنوات المائية اللي ممكن تعد تتمشى على ضفافها طول اليوم بدون ممل, وأشهر متاحف أوروبا اللي بتضم أعمال لأشهر فنانين زي رامبرانت وفان جوخ, والكنايس اللي أجراسها بتدق كل ساعة, وفي نفس الوقت بلد مصرح فيها بالدعارة والحشيش عادي (وكله بالقانون) ?

أمستردام | أولًا طبعا كل الناس عارفه إن أمستردام هي أحسن مدينة في هولندا ، بس ده مش حقيقي، في مدن تانية حلوة برضه، بس هنتكلم على أمستردام بما إن معظم الناس عارفها وفي شباب كتير من أحلامها إنها تروح هناك.

أمستردام

أمستردام هي مدينة العجائب، هتشوف هناك اللي عمرك ما شفته، طبعا معظم الناس بتفتكر إنها جهنم على الأرض، لأن المخدرات هناك والدعارة مصرح بيهم. معلومة صغيرة: معظم الهولنديين مبياخدوش أي حاجة من المخدرات دي ولا بيعملوا أي حاجة تانية، الفكرة كلها إنهم عاملين كده عشان يجذبوا السياحة من كل دول العالم وهم ناجحين في كده.

معظم الناس اللي راحوا أعتقد هيتفقوا معايا إنها أحسن بلد تعرف تروج لنفسها عموما، هي من أحلى البلاد اللي مجرد لما تتمشى فيها هتحبها شوارع منظمة وطرق منفصلة للعجل، ودي أهم وسيلة مواصلات عندهم لأن البلد صغيرة جدا.

أنا رحت امستردام مرتين، أول مرة كانت ٤ أيام وتاني مرة يومين، وفي المرتين حبيت البلد بس هي ليها ناسها، بس أنا حبيت عندهم الحرية، كل واحد بيعمل اللي هو عايزه، وعشان ممتفاجئش هتلاقي عدد كبير من المصريين هناك في كل مكان، ونوعا ما الهولنديين اللي قابلتهم مش friendly تماما مش عارف ده ليه، بس يمكن عشان عندهم سياحة كتير ومتعودين يشوفوا ناس جديدة.

امستردام

جمال البلد هيخليك تنسى كل حاجة و تستمتع بس برؤية الشوارع كلها ورد وناس راكبة عجل أكتر من العربيات بكتير، مفيش زحمه ولا أي حاجة وفيها متاحف كتير تقدر تروحها غير إنك ممكن تروح رحلة من هناك لبلجيكا يوم كامل بـ ٨٠ يورو، مش عارف دلوقتي بقى سعرها كام ورحلات تانية كتير ممكن تعملها بس أنا قررت أعمل رحلة هناك مختلفة.

أول حاجة رحت amsterdam arena وده الاستاد بتاع ajax حلو جدا للي بيحبوا الكرة، بعديه رحت روتردام و دي مدينة جميلة وأهدأ كتير من أمستردام، تروحها بالقطار هتاخد ٣٥ دقيقة والتذكرة بـ ٣٠ دولار دي علي البحر عموما حتي امستردام بيسموها the venice of northern europe من جمالها.

محبتش  أذكر الجانب السيء من امستردام لأنها مدينة جميلة، مش شرط عشان قوانين المخدرات والدعارة إنها تبقى مقتصرة على الناس اللي بتفكر في حاجات غلط تعملها في حياتها وآخر جملة هقولها إن هولندا من الدول اللي لازم تتراح!.

طيب خلينا ندخل في المهم.. أسرار السفر الى أمستردام:

  • أول ما هتوصل المطار هتاخد القطار لحد المحطة المركزية في وسط أمستردام في 15 دقيقة بس وده هيكلفك 5 يورو للوجهة الواحدة, يعني 10 يورو رايح جاي لمطار شيبول في أمستردام.
  • تقدر تنزل في هوستل في أمستردام زي مثلا Princess Hostel Leidse Square. وموقعه كويس أوي وفي هوستلز كتير ممكن تختار منها. مع العلم ان أفضل بيوت شباب في العالم في أمستردام.
  • أمستردام مدينه صغيرة بس رائعة ومنظمة جدا, تقدر تأجر عجلة وتلفها كلها من الصبح لحد الساعه 6 بالليل بمبلغ 9,4 يورو.
  • أهم متحف في أمستردام اسمه متحف رايكس , Rijksmuseum وده أكبر وأشهر متحف في المدينة وأنصح أي حد محب للفن انه ما يفوتش تجربة زيارة المتحف ده وسعره اون لاين 17 يورو (بجد رهيب). بعد ما تطلع من المتحف حتلاقي علامة (I AMSTERDAM) المميزة ودي لازم تتصور عندها وأمامها حديقة كبيرة وبحيرة وفرق موسيقية وفرق رقص طول اليوم وفي أيام الويك اند بيبقى فيها أنشطه كتير وكلها مجانية.
  • رحلة الكروز في القنوات المائية, ودي تقدر تركبها لمدة ساعة ونصف وتلف على أشهر معالم أمستردام بسعر 14 يورو.
  • المترو في أمستردام تذكرته بالساعة وسعرها 3 يورو وممكن تشتري تذكرة يوم كامل بسعر 7.5 يورو وتركب جميع المواصلات العامة بالمبلغ ده طول اليوم.
  • طيب مش نفسك تشوف طواحين الهواء والريف الهولندي, قشطه جدا, هتروح المحطة المركزية وتركب من هناك باص Connexxion bus 391 الى ZAANSE SCHANS (ذهاب وعوده 10 يورو) , ودي حته كده سبحان الله كأنها من الجنة, طبيعة وخضرة وبحيرات وطواحين الهواء ومصانع الأجبان ومصانع القباقيب الخشبية, والمفاجأة بقى كل ده مجانا يعني مش هتتكلف غير تمن الباص يا بلاش.
  • أشهر سوق مفتوح في أمستردام هو Albert Cuyp markt وده كله أكشاك بتبيع كل حاجة: ملابس وأكل وتحف وتذكارات, هتقضي وقت حلو أوي وانت بتتمشى فيه وبتتفرج على الهولنديين وهما بيبعوا بضاعتهم. وأسعاره كويسة قوي.
  • أحلى حاجه تستكشف بيها أمستردام انك تطلع في جولة مع مجموعة سياحية لمدة 3 ساعات تمشي في شوارعها وتكتشف تاريخها وتسمع قصص شيقة عنها مع مرشد من أهل البلد, وتصدق كل ده ببلاش برضه, ادخل على الموقع ده للحجز www.newamsterdamtours.com واختار التاريخ والوقت ومبروك كسبت جولة مع مرشد في أمستردام ببلاش. (ممكن طبعا تكريما للمرشد انك تدفع له بقشيش في حدود 5 يورو مثلا, انت وذوقك)
  • طبعا اوعى تفوت تجربة البطاطس الهولندية وبالذات لو الجو برد وتكون لسه البطاطس طالعه سخنه وعليها جبنه يا سلام على الاحساس 🙂 تحسها بتدفي كل جسمك وسعرها 2 يورو للقرطاس.
  • طيب إيه رأيك تطلع رحلة بحرية بسيطة وببلاش, ده ممكن في أمستردام, كل اللي عليك انك تروح خلف المحطة المركزية مباشرة وتركب العبارة المجانية اللي بتعدي على خليج (آي جي) وتتفرج على أحلى مناظر من العبارة.
  • عاوز تتفرج على أهل البلد بيقضوا وقت فراغهم ازاي؟ يبقى لازم تزور أكبر حديقة في المدينة Vondelpark ودي مليانة بالسياح والزوار المحليين وفيها مسرح مفتوح عليه عروض تقريبا بشكل يومي وكمان بيكون فيه حفلات وعروض موسيقية وكل ده مجانا :).
  • طبعا تجربتك في أمستردام متكملش بدون المرور بالليل على الشارع الأشهر في أمستردام شارع (RED LIGHT DISTRICT) أعتقد أغلب الناس عارفه ده شارع ايه!! المهم انه لفوق 18 سنة ونصيحة اوعى تفكر تصور أي حد في الشارع ده علشان ممكن جدا تلاقي واحده جات وأخدت منك الكاميرا وراحت رامياها في النهر ههههه ?

أشهر ميادين أمستردام هو دام سكوير وده القلب النابض لأمستردام, كل الشوارع توصلك ليه بس وجودك فيه بحد ذاته متعه مختلفة لأنك بتشوف الحياة الهولندية العصرية على طبيعتها, وأيضا ساحة ليدين وده يعتبر معقل الشباب في أمستردام لأنه كله مطاعم وكافيهات وديسكوهات وسهرات.

أمستردام مدينة رائعة ومليانة بالتناقضات اللي هتخليك تحس فيها أنك أمام تجربة فريدة من نوعها نادرا ما هتتكرر في حياتك.

ملحوظة: أمستردام أغلب السنة برد لكن أحسن وقت لزيارتها من شهر 7 إلى شهر 9 ولكن موسم الورود من منتصف شهر مارس إلى نصف مايو, ويا سعدك يا هناك لو كنت هناك في الوقت ده وزرت حديقة Keukenhof

هتتفاجئ وانت ماشي في أمستردام أن أغلب العاملين في المطاعم ومحلات الأكل مصريين (شكل فيلم همام في أمستردام أثر في مصريين كتير وقالك نجرب) ?

بالنسبه لموضوع الفيزا: ده بوست كامل على الصفحة عن كيفية الحصول على فيزا شنجن, أرجو إنه يفيدكم: http://tinyurl.com/hjfmbyx

اترك رد

لن يتم نشر عنوان بريدك الإلكتروني.