الرئيسية / غير مصنف / يوسف المصري يكتب رحلته إلى ماليزيا: برنامج كامل لمدة 6 أيام

يوسف المصري يكتب رحلته إلى ماليزيا: برنامج كامل لمدة 6 أيام

رحلة- يوسف المصري:

النهارده هتكلم عن السياحة في ماليزيا وعن كل حاجة تقريبا ينفع تعملها فيها:

أولا الفيزا: وهى مش محتاجة فيزا للمصرين.

الطيران هتحاول تتواصل لأقل سعر طيران من على:

www.travelstart.com

www.skyscanner.com

الإقامة هتحجز برضه يا فى هوستيل أو في فندق على حسب جيبك وهتدور على:

www.booking.com

www.hostelworld.com

وللرحالة واللى بيحب يعيش عيشة السفر الرخيص واللى أنا دايما بعمله وهو توفير الإقامة عن طريق استخدام موقع www.couchsurfing.com وهو انك بتخش تعمل أكاونت وتكتب انك مسافر والناس بتستضيفك عندها ببلاش وهو ممكن يا تنام على سرير أو أوضة لوحدك أو على الأرض على حسب انت بتخش تقرأ البروفايل عنده.

اليوم الأول:

وهو هتتمشى في شوارع كوالا لامبور عشان تعرف الدنيا ماشية إزاي هتنزل.

أولا: زيارة twin tower وهتروح بالمترو واسم أقرب محطة (klcc).

ثانيا: السوق الصينى (chaina town) وأقرب محطة هى (pasar seni) أول ما تنزل من المحطة هتروح تزور المتحف الإسلامي (وحاول تاخد تذكرة الطلاب) وهتزور المسجد هناك ومنهم هتعدي الناحية التانية من المحطة وتزور السوق الصينى.

ثالثا: هتركب المترو وتنزل تزور منطقة اسمها شارع العرب وأقرب محطة مترو هى (bukit bintang) وهو شارع فيه مطاعم كتيرة وممكن تسهر هناك.

اليوم الثانى:

زيارة batu caves وهو عبارة عن معبد هندي في الجبل والقرود منتشرة في كل حتة ودخوله مجاني وأقرب محطة مترو هى (batu caves) وهناك فيه برضه كهف المظلم فيه ثعابين وأنواع من الصخور والخفافيش تجربة لذيذة ممكن تخشه مع المرشد إجبارى وبتدفع 40 رينجت.

بعدها هتاخد تاكسى لمنطقة اسمها taman eko rimba عبارة عن منتجع كده ظريف فيه شلالات صغيرة ممكن تاخد أكل من منطقة batu caves وتاكلة هناك وتقضي باقي اليوم حتى 4 مثلا وترجع عشان المواصلات هناك صعبة شوية وانت رايح استخدم يا uber أو grab car ودة أبليكاشن تستخدمه هناك وفى الأغلب grap ساعات كتير بيبقى أرخص. هترجع لمنطقة batu caves وترجع بالقطار لمكانك.

اليوم الثالث:

هتروح مدينة العاب مائية اسمها sunway lagoon وهتروحها بالمترو برضه وتكلفتها للفرد حوالى 120 رينجيت وأقرب محطة هى برضه اسمها (sunway laggon) هتقضي يومك كله هناك وحاول متاخدش حاجات كتيرة معاك عشان انت بتاجر مكان بتحط فيه حاجتك والمكان ده صغير.

اليوم الرابع:

هتروح حديقة الحيوان اسمها zoo negara وهتروحها بالباص من محطة pasar seni وسعر دخول الفرد 85 رينجيت الحديقة حلوة وفيها الباندا وأنا عن نفسى روحتها عشان كده وعشان النمر الأبيض هتخلص الحديقة وهتروح على محطة مترو اسمها kl sentral المحلات هناك رخيصة لو عايز تعمل شوبينج وأحسنهم H&M , محل اسمه outdoor وفى فود كورد ماليان مطاعم فى الدور الأخير.

اليوم الخامس:

هتروح منتجع اسمه tadom hill المكان دة حلو جدا جدا المكان ظريف وهادى وهو عبارة عن بحيرة صغيرة وفيها مراكب من البامبو واكتفتى كتيرة والمكان بيفتح 9 الصبح هناك هتاخد يا خيمة يا غرفة يا سرير انت بتختار اللى انت عايزه والغداء هناك خد حاجة اسمها bambo rise ودي حلوة جدا جدا.

المكان المواصلة الوحيدة لية هو تاكسى اطلب grap وهتدفع تقريبا 50 رينجيت هتبات يوم هناك وهترجع على كولا لامبرو تانى يوم الصبح قبل ما تروح المكان انزل احجز مع اى شركة سياحة لمكان اسمة Cameron high lands والتكلفة من 80 الى 100 رينجيت على حسب احجز قبلها بيومين مثلا هتلاقيهم فى شارع العرب وانت راكب التاكسى ورايح المكان اتفق انه يجى ياخدك تانى يوم الصبح عشان تلحق الرحلة اللى انت حاجزها هتروح معاهم وهتاخد الجولة اللى هم هيعملوهالك هناك وبعد اما تخلص الجولة اطلب انك هتقعد فى المدينة مش هترجع ومتنساش تشترى من شاى الفراولة كتير لان طعمة حلو جدا جدا.

اليوم السادس:

بعد ما تخلص الجولة شوف أي هوستيل هناك بيبتدى من 20 رينجيت أقعد يوم المدينة هدية وكويسة ممكن تاجر موتوسكل لو حابب سواء بنت أو ولد اتعلموا ركوب الموتو بايك قبل ما تسافروا لأن ده متعة الرحلة بعد كده هتاخد باص لجزيرة اسمها pulau pangkor island هتاخد المعدية للجزيرة والجزيرة أمتع حاجة فيها إنها صغيرة جدا تلفها كلها فى حوالي ساعة بالموتو بايك اللى هتأجره من الناس اللي هتبقى واقفة قدام المعدية الأسعار بتبتدي من 30 إلى 50 رينجيت حاول توصل لأرخص سعر أجرة يومين هتروح تشوف الهوستيل اللى موجودة فى الجزيرة الأسعار بتبتدي برضه من حوالي 20 إلى 50 لليلة الجزيرة ممتعة وأنصح أي حد بيها الأهم تاخد الموتوسكل أول أما تنزل من المعدية لأن التاكسي غالي.

كده بالظبط الجدول حوالي 9 أيام واستنوا منشور تاني إن شاء الله عن جزيرتين بينانج ولانكاوى خلال أيام.

أهم النصائح:

سافر بشنطة ظهر واحدة بس وحط شنطة صغيرة جواها عشان أما تخرج ومتنساش جراب الموبايل والباسبور كمان عشان المطر.

لبسك خفيف لأن الجو حر هناك ومعتقدش انى استخدمت الجاكيت ولا مرة.

فلوسك متقسمة فى كذا مكان.

الناس هناك طيبين جدا وجدعين وبالنسبة للأكل حاول تجرب حاجات مختلفة كل يوم.

لو مشيت ورا البرنامج دة معتقدش انك هتحتاج حاجة تانية.

التكلفة البرنامج كله ان شاء الله هقولها بالرينجيت فى المنشور الجاي.

لكل محبي أدوات الترحال فى محل هناك اسمه decathlon وبتروحه بتاكسى من محطة Kl بحوالى 20 رينجيت المول ده حلو جدا جدا بيبع كل حاجة تقريبا عن الترحال.

شاهد أيضاً

افضل مناطق السكن في اسطنبول

افضل مناطق السكن في اسطنبول : مميزات وعيوب 6 مناطق للسكن في اسطنبول

افضل مناطق السكن في اسطنبول | الرحالة | تتمتع اسطنبول بالعديد من الأماكن السكنية الجميلة، …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *