مبدئيا 99 % من بنات مصر عايزين يروحوا يتفسحوا في كوريا .. وأكاد أجزم ان من بين كل 5 بنات قاعدين مع بعض بيبقي فيه واحدة من الخمسه علي الاقل عايزة تروح كوريا الجنوبية (ده ان مكانش الخمسة كلهم يعني), لدرجه في بنات تقولك انا مروحش امريكا بس أروح كوريا .. بنات تجنن ما علينا 
السفر الى كوريا الجنوبية للسياحة
المهم في طريقتين لـ السفر الى كوريا الجنوبية للسياحة
الطريقه الأولي: انك تقطع تذكره طيرانك وتسافر فورا
.
في اتفاق بين حكومه مصر و حكومة كوريا الجنوبية عشان يطبقوا مبدأ “المعاملة بالمثل وان رعايا الدولتين يدخلوا مجانا بتأشيرة عند الوصول لمدة 30 يوم.
طبعا فكك من الحوار دة لانك مش هتدخل الا بمعجزة وغالبا هترجع من المطار لان اي مصري حاليا بيدخل كوريا الجنوبية بيكون مشتبه فيه انه رايح يا يكسر فيزا يا يقدم لجوء (يعني مصري واحد بس بيدخل كوريا ما بين كل 20 مصري ف الشهر).
تاشيرة كوريا الجنوبية من السفارة
عشان تضمن انك تدخل ومترجعش من المطار وتدخل تتفسح في كوريا الجنوبية لازم تحصل علي تأشيرة من السفارة
لو رحت السفارة و قلت لهم أنا عايز فيزا لكوريا هيقولولك مفيش فيزا سياحه لان الفيزا مجانا بتاخدها من المطار عند الوصول لمدة 30 يوم.
الطريقه التانية و الوحيدة للحصول علي فيزا من السفاره انك تكون عايز تقعد في كوريا مدة طويلة اكثر من 90 يوم، دي الحالة الوحيدة اللي بيسمحوا انهم يدولك فيزا من السفارة.
المطلوب للحصول على تاشيرة كوريا الجنوبية
ركز معايا لان المتطلبات هنا مختلفه تماما عن أي سفاره تانيه
1- باسبور ساري صالح علي الاقل لسنه كاملة مش لآخر 6 شهور
2- صورة شخصية واحدة
3- حجز طيران ذهاب وعودة مؤكد.. أيوة مؤكد ومدفوع.
4- حجز فنادق مدفوعة ومؤكدة.. ايوة مؤكدة ومدفوعة.
5- كشف حساب لآخر 6 شهور يكون فيه أقل رقم 10 آلاف دولار.. أيوة الرقم صح 10 اآاف دولار أقل حاجة.. يعني 200 ألف جنيه مصري أقل حاجة، ولازم يكون فيه حركه سحب وايداع كبيرة أسبوعيه تقريبا.
6- اتش ار ليتر لو انت بتشتغل ويكون انجلش.. شهادة قيد لو انت لسه طالب وتكون إنجلش.
7- ترافل بلان للأماكن اللي هتقعدها هناك وللايام اللي هتقعدها هناك
رسوم الفيزا 50 دولار لو سنجل و 80 دولار لو مالتي
لو انت معاك الفيزا دي بنسبه كبيرة جدا جدا هتدخل ومش هيتعمل معاك انترفيو في المطار زي ما بيتعمل مع اللي بيروحوا بدون فيزا (عن تجربه صديقه لسه داخله من يومين هناك).
ليه التاشيرة من سفارة كوريا الجنوبية مضمونة
ليه الطريقه دي مضمونه وهتدخل بنسبه كبيرة جدا ؟؟
لان من الاخر مفيش حد شحات او مش لاقي ياكل في مصر ورايح عشان يكسر فيزا ويشتغل فواعلي هناك هيكون معاه 200 الف جنيه او اكثر وبيعمل عليهم حركات سحب وايداع كبيرة جدا اسبوعيه.
هما عارفين ان اللي معاه المبالغ دي وهيحجز الحجوزات المؤكدة دي ( اقل تذكره طيران حاليا ب 11 الف جنيه لكوريا ) وهيدفع كل المبالغ دي مش هيضحي بيها عشان يروح يكسر فيزا
يعني بشروط الفيزا الجديدة دي من السفاره تكون فيزا امريكا نفسها اسهل من فيزا كوريا يعني اللي هيروح كوريا بفيزا من السفاره هيبقي من الصفوة من الاخر.