الرحالة و المسافرون العرب

كيف تقضي أسبوعا في الأردن بـ 2500 جنيه: كله على بعضه شاكب راكب

رحلة- إبراهيم:

وجهة هامة لمن يحب زيارة المواقع الأثرية، حيث تتميز الأردن بوجود عدد من المواقع الأثرية منها  مدينة جرش التي تدل على عظمة الحضارة الرومانية، وفيها يقام مهرجان جرش للغناء. وهناك  المسرح  الروماني والقلعة التي تطل على العاصمة عمان من أعلى هضبة فيها. ومن أهم المواقع الاثرية مدينة البتراء، المدينة المحفورة بالصخر والتي تم اختيارها عام 2007 لتكون واحدة من عجائب الدنيا السبع.

من يصل الأردن لا يمكن إلا أن يزور وادي رام الصحراوي، حيث تحيطه حفريات صخرية جميلة من عصور ماضية، ويسمى أيضاً وادي القمر، نظراً لتشابه تضاريسه مع تضاريس القمر. واد سياحي على بعد 70 كيلومترا شمالي مدينة العقبة الساحلية، هو جزء من منطقة حسمى. وهذه المنطقة تتميز بوجود جبال صخرية عالية متناثرة في سهل رملي واسع.

الأردن

اما المهتمين بقضاء أوقات راحة واستجمام عليهم بزيارة مدينة العقبة الساحلية المطلة على البحر الأحمر والتمتع بامكانية الغوص والتمتع بالشعاب المرجانية الملونة والرياضة البحرية وتذوق الطعام الأردني (وخاصة المنسف) في مطاعمها.

وهناك شواطىء البحر الميت التي يصب بها نهر الأردن وتشكل محطته الأخيرة. والبحر الميت عبارة عن بحيرة ملحية  مغلقة تقع في أخدود وادي الأردن ضمن الشق السوري- الأفريقي، على خط الحدود الفاصل بين الأردن وفلسطين التاريخية،  أما المرتفعات الجبلية في الأردن فتعتبر فاصلاً طبيعياً بين وادي الأردن والصحراء الشرقية.

تحب تسافر أجازة بره مصر ومعاك حد تانى بـ5000 جنيه انتو الاتنين على بعض شاكب راكب؟، بصوا أنا بصراحة عملتها السنة اللى فاتت وطلعت مع مراتي، الأردن، يعنى أكيد السعر زاد حبتين بس الموضوع يستاهل برضه.

قبل ما مودك يقفل بس، أحب أقولك إن الأردن دى من أجمل بلاد الأرض، أنا راجل سافرت 13 دولة منهم 8 في أوروبا وعارف بقولك إيه، إحنا بس مش دريانين بيها عشان جنبنا هنا.

نخش في المهم.. عملتها إزاى بالمبلغ الجميل ده؟، بص يا سيدى وبصى يا ستى، أول حاجة الأردن مالهاش تأشيرة، يعنى تاخد باسبورك وتطلع على هناك كأنك رايح كفر الشيخ مثلا عادى جدا.

طب نتكلم بقى عن برنامج الرحلة وتكلفتها، مبدئيا أنا مطلعتش طيران أنا طلعت بالعبارة من ميناء نويبع، سعر التذكرة ساعتها كان 360 جنيه مصري للفرد (ذهاب فقط) وأعتقد زاد بتاع 50 جنيه دلوقتي، العبارة بتطلع يوميا، إعرف المواعيد والأسعار بالظبط من على موقع (شركة الجسر العربى للملاحة) http://www.abmaritime.com.jo/ar

بس يا سيدى.. وصلنا الأردن بـ360 جنيه، بس كده بالسهولة دي؟ آه وحياتك. يالا نبدأ بقى برنامج رحلتنا:

1- بتنزل من العبارة في العقبة وهي مدينة ظريفة ستايلها عامل زى مرسى مطروح كده ممكن تتلف في يوم وتريح في أى فندق استعدادا للفرهضة بكره

2- العقبة دى في جنوب الأردن، هناخد بقى رحلتنا بالمواصلات العامة من الجنوب للشمال، هتطلع من العقبة على البترا، أهم معالم الأردن، وهي باختصار أطلال مدينة حفرها الأنباط حفرا في الجبال. فيها قصور محفورة في الجبل بارتفاع الهرم مثلا!..البترا ليها زيارتين واحدة الصبح وواحدة بالليل .. لازم تعمل الاتنين اسمع الكلام ، لكن زيارة الليل أيام الاتنين والأربع والخميس فقط، وتبات ليلتك في البترا.

3- هتطلع من البترا على البحر الميت، مواصلاته صعبة شوية معلش. هتروح من أول اليوم على الشاطئ العمومي. نضيف وفيه غرف تغيير ملابس واستحمام نضيفة، هتجرب العوم في البحر الميت (تجربة غريبة كإنك طاير مش عايم) وتدهن جسمك بالطين اللي الناس بتجيله من آخر الدنيا، خد حمامك واتكيف ومش لازم تبات.

كمل على عمان العاصمة وبات فيها. متنساش وانت هناك روح شارع (الرينبو) في السهرة.

4- من عمان في رحلات اليوم الواحد لوادى الموجب، ده مفيهوش بيات بس دى باعتبرها أمتع مغامرة في الأردن، تلبس فيه خفيف ومعاك كيس للموبايل عشان هتتغرق مية شلالات وأنهار وانت ماشي، ده غير الجبال والأدغال والجو ده، الناس محبى الأنتخة والرفاهية ملكوش دعوة بالطلعة دي بتاتا.

5- آخر حاجة في الشمال مدينة جرش قريبة جدا من عمان تشوف المدينة الرومانية، ويا سلام لو في أغسطس تحضر مهرجان جرش فيه نجوم الغناء العربى كلهم وبكلام فارغ.

6- بس يا سيدى.. ارجع على العقبة وخد عبارتك وتعالى.

* أسعار الفنادق متوسطها 15 – 20 دينار أردني في الليلة للغرفة المزدوجة بفطار، يعنى بتاع 400 جنيه.

* كل الأماكن السياحية أسعار تذاكرها مخفضة للأردنيين إنما أسعار الأجانب إضرب في خمسة، الشيء الرائع إن المصريين بيتعاملوا معاملة الأردنيين رسميا يعنى بالأسعار المخفضة.

* طبعا قبل ما تسافر حول فلوسك دينار أردنى هنا من القاهرة وتجنب التحويل من على العبارة عشان بيستهبلوا.

* في أماكن حلوة تانية كتير زى ماعين، ومحمية ضانا، ووادى رم، انت وميزانيتك بقى.

* الربيع والخريف أجمل أوقات الزيارة.

أتمنى أكون أفدتكم وأتمنى الكم رحلة سعيدة.

هذا التقرير منشور بالاتفاق مع صفحة Travel Secrets

2 تعليقات
  1. أحمد بلال يقول

    الموضوع قديم

  2. Ahmed يقول

    استاذ ابراهيم
    طيب ايه الاوراق اللي اطلبت من حضرتك

اترك رد

لن يتم نشر عنوان بريدك الإلكتروني.