fbpx
الرئيسية / آسيا / رحلتي الى جزيرة بوكيت : تجربة فتاة مصرية عمرها 19 عامًا
رحلتي الى جزيرة بوكيت
رحلتي الى جزيرة بوكيت

رحلتي الى جزيرة بوكيت : تجربة فتاة مصرية عمرها 19 عامًا

رحلتي الى جزيرة بوكيت | الرحالة | رحلة- بسمة محمود:

 

أنا بسمة 19 سنة، لسه طالبة سافرت لوحدي تايلاند (بوكيت) 5 أيام وماليزيا (كوالا وجينتج وملاكا وكاميرون ولنكاوي) 8 أيام. أول عائق لمعظم الناس وخصوصا البنات، الأهل والفلوس تقريبا الحمد لله بعد ما اتخطيت الاتنين دول سافرت. وحابه النهارده أحكي لكم عن رحلتي الى جزيرة بوكيت

 

رحلتي الى جزيرة بوكيت

أولا: تاشيرة تايلاند

1-كشف حساب بنك لآخر 6 شهور آخره 10000 جنية ويكون عليه حركة سحب وايداع

2-صورة شخصية 4*6 خلفية بيضا

3-حجز فندق مبدئي

4-حجز طيران مبدئي

5-تصور كل الورق والباسبور صوره

6- 300 جنية

7-شهادة قيد من الكلية وترجميها عند أي مكتب ترجمة (أنا ترجمت في مكتب نعمة للترجمة في شارع قصر النيل بـ 50 جنية)، وتروحوا سفارة تايلاند قدام قسم الدقي في الجيزة.

 

السفر الى تايلاند

 

1- رحلتي الى جزيرة بوكيت بدأت بإني اخدت طيارة من مصر لتايلاند (بانكوك) رايح جاي بحوالي 3500 (كنت حاجزة قبل السفر بـ 4 شهور تقريبا).

2- وصلت بانكوك في تايلاند (مطار Suvarnabhumi) الساعة 10 الصبح تقريبا كنت حاجزة طيارة تانيه لبوكيت في تايلاند في نفس اليوم الساعة 3 العصر بس من مطار الداخلي (مطار amari don muang) أخدت أتوبيس مجانا بيوصل بين المطارين اسمه (shuttle bus)

3- أول لما وصلت سحبت فلوس من atm (كنت بستخدم كارت debit بنك أهلي) علشان محولتش دولارات من مطار السعر بيكون أقل من بره كتير.

4- وصلت بوكيت الساعه 4 ونص تقريبا من المطار في ميني باص بتديله العنوان بتاع الأوتيل بتاعك بيوصلك (180 باتتايلاندي  للفرد).

رحلتي الى جزيرة بوكيت
رحلتي الى جزيرة بوكيت

فنادق تايلاند

 

وصلت الفندق بتاعي فندق تحفة بجد نظيف مكانه قريب قوي من كل حاجة الفندق كان في منطقة patong beach اسمه phunara بـ 400 بات في اليوم الأوضة دبل و300 بات أوضة سنجل. وكان من أجمل الحاجات في رحلتي الى جزيرة بوكيت

 

أول يوم في رحلتي الى جزيرة بوكيت كان ضايع بالنسبة لي الصبح نزلت بالليل مول (jungceylon) ولفيت في الشارع (bangla road) وطبعا كنت جعانه جدا أول لما وصلت كان معايا تونة من مصر قامت بالواجب أول يوم 😀 وحجزت رحلة تاني يوم واشتريت (cover waterproof) بـ 50 بات من اي محل في السوق هينفعك كتير في كل رحلات المية في تايلاند وجبت (rainning coat) بـ 50 بات علشان لو الدنيا مطرت خليهم معاك في الشنطة على طول اليوم.

 

رحلتي الى بوكيت

 

تاني يوم الصبح في رحلتي الى جزيرة بوكيت الميني باص بيجي ياخد من الفندق الساعة 8 الصبح روحت (phi phi island) وهي من أجمل جزر تايلاند بـ 1800 بات تايلاندي علشان كنت واخده مركب سريع.

 

البسوا مايوة تحت الهدوم ومعاكي فوطة. اول حاجة في الرحلة هتنزلو تعمله (snorkling) في وسط الشعب المرجانية وسمك الملون حاجة فوق الخيال كدة وبعدين هتوصلوا على الجزيرة هينزلكم الغدا.

 

السياحة في بوكيت

 

بعد الأكل هتلفوا شويه في الجزيرة وهتتحركو تاني بالمركب لجزيرة تانيه اسمها (maya bai) وهي من اجمل جزر تايلاند. بنلف شويه يجي ساعه برضه وبعدين بننزل تاني لجزيرة مش فاكره اسمها نعقد ساعتين تقريبا اللي عايز يركب بانانا بوت بـ 500 بات تايلاندي والبيتش باجي بـ 1000 بات تايلاندي.

 

الحاجات ديه موجوده في باتونج بتيش برضه واللي عايز يعقد على رملة بيعقد وناس بتاجر كرسي على ميه تحت شمسية بـ 100 بات تايلاندي وينزلو الميه.

 

رحلتي الى جزيرة بوكيت
رحلتي الى جزيرة بوكيت

شواطئ جزيرة بوكيت

 

سؤال مشهور عن تايلند، ومن خلال رحلتي الى جزيرة بوكيت هجاوب عليه: هنسيب شنطتنا وفلوسنا فين سيبها في المركب لو نازل سنوركينج عادي وانت على الشط لو ناوي تنزل المية بلاش تاخدهم معاك سيبهم في المركب مش ناوي خدهم معاك وحط الموبايل في كفر اللي قولنا عليه.

 

نصيحة: قبل ماتركب المركب هيقولولك اجر زعانف اللي بتتلبس في الرجل ديه علشان الشعب المرجانيه وبتاع ديه اشتغاله محديش ياجره بـ 200 بات على الفاضي. وهترجع الفندق تاني على 6 المغرب ريحت شويه ونزلت تاني لفيت في السوق وكلت فاكهه كتيير في حدود 100 بات تايلاندي والكريب والايس كريم كل دة لازم تجربه بجد تحفة في تايلاند

 

رحلة الرافتينج في جزيرة بوكيت

 

تالت يوم في رحلتي الى جزيرة بوكيت روحت رحلة (rafting) بـ1600 بات برضوة بتيجي عربية تاخد 8 الصبح من الفندق وتروحه الأول كهف كدة في قرود وتصوره وتروحه مكان الرافتينج بعد كده.

 

نصيحة: وانتو رايحين خدوا لبس تاني معاكو زياده لبس كامل من كله حاجة بالداخلي كمان لانكو بتتغرقو مايه في الاول جامد وبعدين بقيت الرحله ناشفة وبتحطو شنطتكو والفلوس في لوكر كدة ومعاك المفتاح متخافوش.

 

رحلتي الى جزيرة بوكيت
رحلتي الى جزيرة بوكيت

التسوق في جزيرة بوكيت

 

هتروحو الاول (ziplining) وبعدين بينزلك الرافتينج في النهر وترجعوا تغيروا هدومكم وتاكلوا وبعدين تروحوا تركبه الفيل وبعده البتيش باجي وترجعوا العربية وتروحوا خلاص على الساعة 5 تقريبا تريحوا شوية وتنزلوا برضه تلفوا لو عايزين.

 

تروحو مول اسمه (central festival) لو حد حابب يعمل شوبينج أسعاره حلوة قوي تروحوا بتاكسي أو توكتوك أو موتسيكل لو بتعرفوا تسوقوا متوسط المبلغ رايح جاي بالتاكسي 800 بات لو توكتوك 600 بات وموتسيكل تأجيره اليوم كله بـ 200 بات تايلاندي. (نصيحه اتعلموا سواقة العجل ضروري هتوفر لكم فلوس كتير قوي في تايلاند).

 

جزيرة جيمس بوند

 

رابع يوم في رحلتي الى جزيرة بوكيت : ممكن تروحوا (james bond island) بـ 1600 بات تايلاندي برضه طول اليوم بتروحوا الجزيرة تتصوروا وتاكلوا وبتركب مركب في البحر كده بتجدفوا فيه وتدخلوا جوه كهوف وكده وبيرجعكوا على 6 المغرب برضه. ونزلت بالليل أجيب شوية حاجات من السوق ذكرى من البلد أفيال وتي شيرت وحاجات كده متوسط الأسعار للحاجات دي حوالي 150 بات.

 

رحلتي الى جزيرة بوكيت
رحلتي الى جزيرة بوكيت

معابد جزيرة بوكيت

 

خامس يوم في رحلتي الى جزيرة بوكيت : كان معايا بنات من الجروب هنا أخدنا تاكسي واتقاسمنا فيه أخد طول اليوم 1000 بات، روحنا أول حاجة بيت مقلوب هناك كدة اسمه (teelanka baan) بـ 350 بات كل العفش فيه ملزوق في السقف وشكله تحفة في الصور، وجنبه (أوتليت) ده فيه محلات لكل الماركات المعروفة بأسعار مش رخيصة قوي بس أقل من مصر ده للناس اللي بتحب الشوبينج.

 

وبعدين روحنا معبد مشهور في تايلاند قوي اسمه (wat chalong) ببلاش. وبعدين روحنا أعلى مكان في بوكيت بتشوف البلد كلها من فوق تحفة اسمه (Ranghill) وممكن تروحه قبل ده كله (caron beach) حلو قوي والفيو من هناك خرافه ولو حابين تنزلوا الميه خدوا مايوة بقى وكده. الصبح بقي خلصت رحلتي الى جزيرة بوكيت روحت على المطار وركبت من تايلاند لكوالالمبور في ماليزيا.

 

10 معلومات من رحلتي الى جزيرة بوكيت

 

1- في ناس في رحلات بتصور صور فوتوغرافي وبتطبعها بـ 200 بات علشان في أماكن مش بتعرف تصور نفسك أي حد يقول أصوركم اعرف انه بفلوس بـ 200 بات تايلاندي للصورة.

2- في الفيل استأذن اللي معاك اللي بيسوق الفيل يعني ينزل يصورك أوفر وادي له 100 بات تايلاندي في الآخر هيصورك طول الرحلة وفي أماكن كتير أحسن من صورة واحدة بـ 200 بات.

3- أبلكيشن للتاكسي رخيص اسمه (grab car) مهم جدا في تايلاند

رحلتي الى جزيرة بوكيت
رحلتي الى جزيرة بوكيت

4- في البيت المقلوب في عروض كتير على التيكت حاجات كتير مع بعض بسعر أقل ملهومش لازمه فلوس على الفاضي ومش حلوين ادخلوا البيت بس

5- متوسط سعر الوجبة هناك لو محل محترم 250 لـ 300 بات

6- لو أكل شعبي من الشارع بـ 100 بات أجدع أكله بس خدوا بالكم من موضوع الأكل الحلال وللأمانة هم عندهم ضمير في تايلاند بيقولكوا لو الأكل مش حلال.

7- الفصال في تايلاند أسلوب حياة بس اللي يعرف بقى أنا شخصيا مفلحتش في الموضوع ده قوي.

8- الميني باص من الفندق للمطار بيكون بـ 250 بات ومواعيده من 7 الصبح لـ 7 بالليل نصيحة خلوا الطيارة بتاعتكم وانتوا راجعين في حدود 9 ونص أو 10 الصبح علشان متاخدوش تاكسي للمطار بـ 1000 بات تايلاندي

9- الطريق من الفندق (patong beach) للمطار في تايلاند بياخد حوالي ساعة

10- روحوا المطار في الطيران الداخلي قبلها بساعة ونص علشان الاجراءات

شاهد أيضاً

القرية العالمية في دبي

أجمل الأنشطة السياحية في القرية العالمية في دبي ومواعيد الزيارة

القرية العالمية في دبي | الرحالة |   تشهد دولة الإمارات العربية المتحدة نهضة شاملة …