الرحالة و المسافرون العرب

ترانزيت | ما هي أنواع رحلات الترانزيت وكيف تستفيد منها لأقصى درجة

ترانزيت | الرحالة | تجربة- عمرو شريف:

ناس كثيره كانت بتسأل يعني إيه ترانزيت, وازاي تستغله كويس خلال رحلتها.. الترانزيت ده معناه اننا بنحجز تذكرة سفر علي خط طيران معين من مصر إلى دولة تانية وبيكون حجز التذكرة علي خط طيران معين خاص بدولة تالتة.

وبالتالي لازم الخط ده الأول ينزل في الدولة الرئيسية بتاعته وتغيير الطياره للدولة اللي انت رايحها، زي مثلا الخطوط التركية لازم تنزل في اسطنبول تغير الطيارة أو الخطوط إيجيين اللي هي تابعه لليونان هتنزل في أثينا تغيير أو خط طيران اليطاليا اللي تابعة لدولة إيطاليا هتنزل في روما.

ترانزيت

طيب ليه احنا بنحجز علي الخطوط دي وبننزل ترانزيت؟، لأن ببساطة الخطوط دي بتعمل عروض في أوقات معينه من السنة، وممكن تذكرة الطيارة توصل لنص تمن التذكرة المباشرة من مصر للدولة اللي رايحينها.

أنواع الترانزيت

خلونا نفرق بين نوعيين من الترانزيت:

1) الترانزيت اللي هو عدد ساعات طويلة جدا ممكن توصل لـ10 ساعات.

الترانزيت الطويل اللي هو مالوش حل، يعني حضرتك مفيش غيره أو بمعنى أصح إن مفيش أي اختيار تاني إن حضرتك تختار نفس الرحلة بس ترانزيت وقت أقل، حتى لو كان سعر التذكرة أغلي وده من حقك في معظم شركات الطيران تاخد غرفه في فندق ببلاش لو الترانزيت كان أكبر من 8 ساعات.

إنما لو نفس الرحلة وفي اختيار تاني إن الترانزيت يكون مثلا 3 ساعات أو 4 أو أي عدد من الساعات, وانت اخترت الطويل ده علشان تدخل البلد وتفكر تاخد حجز الفندق ببلاش، فمش هيكون ليك أي حق في الغرفة المجانية لأن ده بسبب إن كان فيه اختيار وانت اللي ما اخدتهوش.

خلي بالك اوعي تفكر انك ممكن تدخل البلد كده من غير فيزا بحكم انك ترانزيت أكثر من 8 ساعات، لا يا باشا لازم يكون معاك فيزا من مصر 😉

2) الترانزيت البسيط اللي ممكن يوصل لساعة واحدة:

الترانزيت القصير أقل شيء 50 دقيقة وده بصراحة مخاطرة عالية جدا انك تختاره لأن لو طيارتك اتأخرت وانت طالع من مصر ضاعت عليك الطيارة التانية لأنها هتطلع في ميعادها وملهاش علاقة إن طيارتك متأخرة.

طبعا انت ملكش ذنب والشركة هي المسؤولة إن تغيرلك الحجز ببلاش على أول طيارة هتطلع لوجهتك اللي انت حاجزها, المشكلة بقى إن ممكن الطيارة اللي بعدها دي تبقى بعد 6 ساعات مثلا.

دايما في ناس لو ترانزيت 5 ساعات تقول أهه إطلع بره المطار برضه خلي بالك لو نويت تطلع بره المطار في أي بلد لازم يكون معاك فيزا البلد دي، انشالله هتطلع تشرب سيجارة وترجع معناها انك هتعدي على الجوازات ويتختم لك دخول البلد ودي مستحيل بدون فيزا للبلد.

حقائب السفر في رحلات الترانزيت

أهم حاجة في الترانزيت إن الشنط بتاعتك مش بتشوفها يعني بتسلمها ف مصر, وتسلمها في آخر بلد انت هتوصل ليها حتى لو كان الترانزيت بتاعك 10 ساعات برضه مش هتشوفهم.

ودي ميزة طبعا علشان خلال وقت الترانزيت في المطار هتكون خفيف مش معاك شنط وتقدر تلف ولو هتدخل البلد في ساعات الترانزيت برضه خفيف وما تشيلش هم الشنط. (ماعدا طبعا الشنطة اللي بتاخدها معاك وانت طالع الطيارة).

الاستفادة من رحلات الترانزيت

ناس كثير بتتخوف من ساعات الترانزيت الطويلة إنما ممكن تستغل الوقت ده في إنك تقرأ كتاب, أو تنظم لرحلتك وتعرف هتروح فين وتركب ايه؟, أو تدخل على صفحتنا تاخد شوية معلومات حلوين عن المكان اللي انت مسافر له, وكمان بيكون في المطار مطاعم وكافيتريات وسوق حرة ومحلات ممكن تضيع فيهم وقت.

غير مطارات كثيرة بيكون فيها الإنترنت ببلاش (ممكن يديك ساعة ببلاش) أو يكون مفتوح وقت أطول أو أقل وفي مطارات ممكن تدفع حوالي 300 جنيه وتدخل صالة البيزنس كلاس وتقعد بقى في كنب مريح وجرايد وأفلام وطبعا أكل وشرب ببلاش وجيمات وكراسي مساج وده زي مطار إسطنبول الخدمة دي موجودة.

هذا التقرير منشور بالاتفاق مع صفحة Travel Secrets

اترك رد

لن يتم نشر عنوان بريدك الإلكتروني.