بانكوك تايلاند | الرحالة | رحلة- فرات سامي: أول يوم وأول محطة في رحلة بانكوك تايلاند .. الواحد نسي قد إيه الجو حر وفي ثواني يحولك لمصاصة متحركة. الخطة كانت كالآتي، هاخد المترو اللي بيسموه sky train أو BTS واللي هيوصلني لمحطة هنزل منها وآخد أتوبيس يوصلني للهوستيل في بانكوك تايلاند بس كده.
بس الكلام ده قبل ما أوصل على أرض الواقع وأطلع سلالم عشان أعدي الشارع بعدين أطلعها تاني وأرجع لأول نقطة وأقول لـgoogle maps يا فرحتي باسم محطة الأتوبيس اللي في بانكوك تايلاند ومكتوبة بالتايلاندي.. يعني أخد أتوبيس من أنهي ناحية دلوقتي؟.
بعد حبة شمس حلوين في بانكوك والشنطة اللي على ظهري بدأت تخليني أقف أكتر ما بمشى استسلمت ووقفت تاكسي بالتكييف بتاعه.
رحلة بانكوك تايلاند
باقي اليوم في رحلة السياحة في بانكوك تايلاند كان في الروف بتاع الهوستيل في بانكوك تايلاند في محاولة لإستيعاب الصدمة.
أكلم شوية من أصحابي وأسأل هو أنا في بانكوك ليه وحجزت ٤ شهور؟ ولوحدي كداهو خالص خالص؟ مش كنت أظبط نفسي على ظروف صحابي وخلاص؟.. بس ده العادي وكل مرة أسافر فيها لازم أول يوم يبقى فيه شوية قلق وتوهان في الأفكار، فالنوم كان الحل بعد الرحلة الطويلة دي لرحلة بانكوك تايلاند
السياحة في بانكوك
وقتي في بانكوك تايلاند كده كده مكنش هيطول عشان مكنتش متحمسة ليها. قلت بس أقضي يومين فيها أدور على street art وmurals اللي هى رسومات على الحيطة والمباني لرسامين بحبهم وأتوه وأجرب شوية أكل قبل ما أسافر للمزرعة اللي هقعد فيها شوية، بعد رحلة السياحة في بانكوك تايلاند
بالنسبة لتاني يوم في المغامرة كنت محتاجة أجيب خط موبايل وأدور على street art بعدها. دخلت أول 7Eleven قابلته في وشي وما أكثر الـ 7Eleven في بانكوك تايلاند؛ سوبرماركت شغال ٢٤ ساعة وفيه كل حاجة ممكن تحتاجها على السريع. بس بعد ما دخلت ٦ أو ٧ فروع اكتشفت إنهم نسيوا يشغلوا أي فرد يتكلم إنجليزي.
وفي نص ما أنا بعمل كلام في الهوا عشان أقولهم مش عايزة خط السياح بتاع ٧ أيام عايزة حاجة أطول، واحد جاي يحاسب نطق واتكلم إنجليزي معايا وترجم لهم، فقالوا له أروح المول وهناك هلاقي محل لكل شبكة واختار اللي أنا عايزاه فجبت أكتر حاجة منعشة، وملونة من عندهم أشربها وبدأت أمشي لأقرب مول الراجل وصفه لي.
بعد أكتر من الربع ساعة مشي، اللي الراجل قال لي عليها، ومش عارفة الطريق طول معايا بسبب الحر ولا إيه، وقبل ما أوصل للمول، اتكعبلت في تاني mural رسمة واخدة حيطة كبيرة في موقَف.
مطاعم بانكوك تايلاند
مفيش 5 دقايق تانيين وصلت المول وجبت الخط وشغلت النت وطلعت الـfood court عشان أخد حبة تكييف وأشحن الموبايل مش عشان أكل لأ.
اللي إتعلمته في رحلة بانكوك تايلاند أول مرة جيت فيها من سنة إن الأكل أحلى بكتير من العربيات اللي في الشوراع وفي الأسواق فبعد البريك ده، صدفة تانية ولقيت سوق بس اعتبرته متقدم شوية عشان كان جوه مبنى وفي شوية يفط مكتوب عليها بالإنجليزي، الترابيزات والكراسي مرصوصين جنب بعض والمراوح في السقف وكل واحد واخدله مربع ومعلق يافطة مكتوب عليها أرقام وأسامي الأكل.
بعد حيرة طويلة وأنا رايحة جاية تايهة بين الكلام المكتوب على اليفط وقفت عند ست مبتسمة جدًا وفي صورة على يافطتها نادتني؛ أناناساية مقسومة نصين وجواها رز وخضار قلت هو ده الغدا.
وقعدت مستنية الطبق يجهز وأنا على وشي ابتسامة، أخيرًا هاكل تاني أكل تايلاندي بس الست حطمت لي أحلامي وكنت فاكرة بما إن الأناناس رخيص هنا هتنزلي زي الصورة، بس هي اكتفت إنها تحط لي كام قطعة متشوحة مع الرز ولغاية النهارده مش فاهمة إيه الشئ المملح اللي كان فوق الوش ده بس كله إتاكل.
الأنشطة السياحية في بانكوك
بعد الغدا مشيت لمرسى جنبي في بانكوك تايلاند عشان في رسمة لواحد من الرساميين اللي بحبهم اسمه Nychos راسم على مبنى قبل مرسى معين، قعدت شوية بحاول أفهم مفروض آخد أنهي مركب، لقيت واحدة قاعدة ماسكة خريطة، البنت كانت من إيطاليا وإحنا الاتنين طلعنا تايهين أكتر من بعض وحاولنا نفهم خط سير المراكب على الخريطة اللي معاها ومفروض الواحد يركب مركب عليه علم أنهي لون.
أخيرًا جه المركب اللي مفروض أخده وشوفت الرسمة وكنت عايزة أقول لهم إيه رأيكم نقرب للمبنى شوية ونقف ناخد خمس دقايق بريك؟. بدأت تمطر والست اللي “بتلم الأجرة” تنزل الستاير وأنا مبقتش مستعجلة أسيب المركب، وبما إني مسافرة في المونسون فالمطرة + حر وتلزيق بقى شيء طبيعي طول الرحلة بتاعتي.
فنادق السياحة في بانكوك تايلاند
اليوم كان بيخلص خلاص والرجوع للهوستيل في بانكوك كان سهل بما إني إخترت واحد جنب محطة المترو بس بعد ما خرجت من المحطة ولمحت مطعم كبير عليه رسومات قلت معلش هتغاضى عن الـrule بتاعتي المرة ديه وهتعشى فيه. طلب شوربة Tom Yum بالنوودلز، ومعلومة إن ديه شوربة حراقة بجد لدرجة إنك في الأول تكون مبسوط إن قد إيه ده طبق كبير وريحة الشوربة حلوة بس تخليك تعيط والموضوع قلب عذاب.
الطبق الكبير مخلصش والمناديل عالطرابيزة خلصت ودخلت لأقرب 7Eleven أجيب أيس كريم قبل ما أروح.
أنصحك أيضًا بقراءة:
فرات سامي تكتب عن مغامرة الـ 115 يوم في جنوب شرق آسيا
فرات سامي تكتب رحلتها الى تايلاند: لا تغادرها قبل هذه المغامرة
فرات سامي تكتب تجربتها في أجمل جزر تايلاند: مغامرة ممتعة
رحلتي الى جزيرة كوه تاو | هذا السبب قد يفسد رحلتك إلى أجمل جزر تايلاند
السفر التطوعي إلى تايلند : تجربة فرات سامي في التطوع بمزرعة تايلاندية