السياحة في الكويت | الرحالة | كتب- بهاء فاروق:
لو انت وافد وعايش في الكويت أو لسه واصل جديد ومش عارف تتفسح فين, اقرأ التقرير ده وادعيلي هتلاقي فيه دليل لأشهر معالم السياحة في الكويت
الكويت بلد صغيرة, نظيفة ومنظمة قوي وتقدر تلف أهم معالمها في يومين, لكن خلينا نقسم المعالم لـ 3 أقسام: معالم ترفيهيه وشواطئ ومولات.
السياحة في الكويت
المعالم الترفيهية في الكويت
المعلم الأبرز ورمز الكويت (أبراج الكويت): ودول 3 أبراج على الخليج تم عمل صيانه لهم مؤخرا, وتقدر تطلع فوق تتفرج على كل ساحل الخليج وكمان فيه مطعم دوار في الدور التاني بيقدم بوفيه مفتوح لمنظر ولا أروع لدولة الكويت.
المدينة الترفيهية: أعتقد مفيش حد قضى طفولته في الكويت مزارش المدينة دي, اللي للأسف دلوقتي أصبحت مهملة وأغلب الألعاب قديمة, ولكن زيارتها لأي حد كان عايش في الكويت من أكتر من 20 سنة بترجع له ذكريات حلوة كتير, وتذكرتها دلوقتي بدينارين ونص.
حديقة الشعب: حديقة فيها ألعاب ترفيهية حلوة وموجودة على الخليج ودخولها بدينار وكل لعبة داخلها ليها سعر مختلف.
الأكوابارك: وهي مدينة ألعاب مائية ضخمة وتذكرتها للفرد بـ 3,5 دينار.
حديقة الحيوان: مازالت تعتبر من أماكن الجذب السياحي بالرغم من تواضعها الشديد سواء في الحيوانات أو الخدمات ودخولها للفرد بنص دينار.
المركز العلمي: فيه سينما آي ماكس, وفيه كمان أكواريوم معقولة وبعض التجارب اللي تصلح للأطفال, لكن القعدة خارجة على البحر هي المقصد الأساسي للعائلات.
كوزمو: لو انت شاب وعاوز مكان فيه بلياردو وبولينج وسينما وبلاي ستايشن, يبقى المكان ده مقصدك وده موجود في السالمية.
حديقة الشهيد: تعتبر الأكبر في الكويت حديثا وفيها شلالات وبحيرات ونصب الدستور التذكاري وأنصح الجميع بزيارتها وده موجود في العاصمة ودخولها مجانا.
الشواطئ في الكويت
شاطئ المسيلة: وده كان معقل تجمع العائلات الوافدة من زمان ولحد دلوقتي ودخوله للفرد بدينار.
شاطئ العقيلة: زي شاطئ المسيلة لكن فيه اهتمام أكتر من شاطئ المسيلة وبيكون فيه حفلات كل ويك إيند وطبعا الشواطئ دي للعائلات, ودخول الفرد بدينار واحد فقط.
الجزيرة الخضراء: شاطئ أيضا للعائلات فقط وبيتجمعوا فيه للشوي والاستجمام في وسط البحر ودخوله للفرد بدينار أيضا.
شواطئ الواجهة البحرية: دي كلها شواطئ مجانية وتصلح للشباب أو العائلات ومجانية طبعا (بس الشوي فيها ممنوع 😀 )
الاسواق في الكويت
الأفنيوز: وده طبعا المجمع الأكبر والأبرز في الكويت وفيه تقريبا كل الماركات العالمية وفود كورت وكيدزانيا وسينمات, هو تقريبا مدينة صغيرة داخل الكويت.
المارينا: المول الشهير في السالمية وفيه برضه سينمات وكافيهات على البحر وفود كورت, وأنصح بيه طبعا في الويك إيند صباحا, القعدة على المارينا رائعة.
مول 360: في رأيي هو المول الأرقى في الكويت وموجود في جنوب السرة.
سوق شرق: وطبعا ده من أكبر المجمعات على الخليج وبيتميز بوجود سوق السمك فيه.
جيت مول: وده مول حديث موجود في العقيلة, مكان حلو أوي لو أنت مع أولادك وعاوز مكان نظيف وراقي تقضي فيه وقت حلو مع العائلة.
سليل الجهراء: مول متواضع وفيه مدينة ألعاب وفود كورت وبحيرة, وهو للأسف المول الوحيد القريب لسكان منطقة الجهراء.
الكوت: المول الأكبر في منطقة الفحاحيل, والقعده فيه رائعة وخاصة أمام النافورة الراقصة وغالبا بيكون فيه احتفالات في كل المناسبات والإجازات الرسمية.