الرئيسية / أفريقيا / السفر من القاهرة الى دهب مشيًا: سمير أسامة يكتب مغامرة السير 600 كيلو
السفر من القاهرة الى دهب
السفر من القاهرة الى دهب

السفر من القاهرة الى دهب مشيًا: سمير أسامة يكتب مغامرة السير 600 كيلو

السفر من القاهرة الى دهب | الرحالة | مغامرة- سمير أسامة:

 

بدايه الرحلة، جات في دماغي فكرة إني أسافر، وألف أفضل الأماكن اللي في مصر. كانت نفسيتي في حاله سيئة وكنت لازم أغير جو. كتبت بوست علي فيس بوك، إني بفكر أسافر مشي. بس خدت تريقة كبيرة جدًا. وطبعا ولا كأني شفت حاجة.

 

رتبت كل حاجة لـ السفر من القاهرة الى دهب مشيًا على الأقدام، وشفت الخرايط والطرق من على جوجل ماب. وأول يوم نزلت فيه توقعت إني مع أول يوم هحس إني بهدلت نفسي، وهسأل نفسي إيه اللي أنا عملته ده. بس ده عكس اللي حصل خالص ودي كانت أفضل لحظات حياتي.

 

السفر من القاهرة الى دهب

 

نزلت من البيت ركبت ميكروباص لمكان قطار السويس، وتكلفة الميكروباص كانت 4 جنيه، والقطار 3.75 قرش ? نزلت السويس ومشيت لحد نفق الشهيد أحمد حمدي. منعوني أعدي علي رجلي فعديت في أتوبيس سياحي مع واحد اسمه صبحي ❤

 

صبحي اتكلم معايا شويه، واتبسط بفكرتي واداني أكل وعصير وحاجات كده ادتني دفعه إيجابية جدا. نزلت من الأتوبيس وأنا حلمي علي بعد 9 مدن. حسيت بتعب وأنا لسه بقول يا هادي ولسه مبدأتش. بس كنت متحمس جدا.

 

مشيت أول 30 كيلو في رحلة السفر من القاهرة الى دهب وكنت مرتب إني كل يوم همشي من 20 لـ30 كيلو. كان حوالي مشي 6 ساعات في اليوم. ومن هنا بدأت المتعة بقى. أول ليلة خيمتها في كمين شرطة وده كان أمان بالنسبة لي. وصحيت مشيت ونفس النظام.

 

تاني ليلة في رحلة السفر من القاهرة الى دهب كانت سحر بالنسبة لي. جه وقت الغروب شفت منظر في السما مش هنساه أبدا. أول مرة أشوف النجوم بالجمال ده، وعيني تشوف درب التبانة من غير أي كاميرات أو تصوير، فرحت جدا وقمت شغلت أغني وفضلت أرقص واصوت واتنطط وقلعت هدومي وعملت حاجات غريبة ? ما أنا لوحدي بقى ومحدش شايفني ولا سامعني.

 

تعبت وفرهدت جدا فا نمت جوه الخيمة وقفلتها عليا وسبت الشراعة مفتوحة عشان الهوا. لكن اتأكدت انها مقفولة كويس عشان لو في أي حشرات سامة مثلا.

 

صحيت عندي حماس اني امشي عشان اعرف ايه اللي جاي. اتعرفت علي ناس اول ما وصلت لمساكن، ونمت في وسطهم وكلت وشربت من أكلهم، وشحنت الباور بانك وكل حاجة. وانطلقت من جديد.

 

المسافة من القاهرة الى دهب

السفر من القاهرة الى دهب
السفر من القاهرة الى دهب

وكل يوم كنت بفرغ طاقة سلبية عن اللي قبله، وأفضل اعمل أي حاجة حابب أعملها كأني لوحدي على الكرة الأرضية. فضلت كده لحد ما لقيت بداية البحر على ايدي اليمين، قمت جاري على طول وفضلت امشي حوالي 6 كيلو لحد ما وصلت البحر.

 

لسه هنزل الشنطة لقيت ناس جايه تقولي دي شركة بترول والمنطقة محظورة ? الحلو ميكملش.. طلعتلهم تصريح حرس حدود ورخصة صيد منفعش أي حاجة وكان لازم أمشي. مشيت وبالليل قلت والله لا أروح ورحت وخفت أنزل المياه ففضلت امشي ع البحر لحد ما بعدت وخيمت.

 

صحيت جنب البحر وسامع صوت البحر ❤ بفتح باب الخيمة، لقيت كابوريا كتير بتجري على الشاطئ، رحت قالع ولابس نظارة السباحة وجاري ناطت ? اول ما نزلت لاقيت سمكة خضرة كبيرة خفت منها طلعت اجري برا ? ? رغم إني صياد بس كانت أول مرة أشوف السمك تحت المياه كده وعمري ما اصطدت من البحر الأحمر أصلا.

 

الطريق من القاهرة الى دهب

 

لميت الحاجة ومشيت وكملت في رحلة السفر من القاهرة الى دهب وخيمت على البحر تاني، وكلت وظبطت وبعدها نمت، وصحيت نفس الكلام وبعدها اصطدت سمك بالسنارة، طلعلي سمكه لونها فضي كده مش عارف اسمها ? طبعا انواع السمك جديدة عليا لاني كنت بصطاد من النيل.

 

المهم السمكة كان شكلها يؤكد إنها صالحة للأكل، وبالخنجر قمت مطير راسها، ومنظفها بمياه البحر، ولفيتها في سلوفان ودفنتها في وسط النار. كان وقت المغرب وأكلتها ونمت.. وكانت تقريبا أحلى سمكة كلتها.

 

السفر من القاهرة الى دهب
السفر من القاهرة الى دهب

 

نمت ومشيت تاني يوم لحد ما اكتشفت إني عديت على عيون موسي، راس سدر، ابو زنيمة، ابو رديس، الطور، والكمين اللي دخلت عليه على المغربية ده كان كمين راس محمد.. طبعا مصدقتش اني عملت كل المسافة دي ❤

 

الناس في الكمين رحبت بيا جدا وطلعولي مياه وشاي ومعاملة فنادق. ناس كانوا زي الفل والله بس مسمحوليش ادخل محمية راس محمد قالولي لو دخلت دلوقتي هتتضرب بالنار ? قلت هم قلبوا ليه كده دانا كنت لسه بشكر فيكم.

 

عرفت بعد كده ان حرس الحدود بيضرب أي حد بالليل في المنطقة دي فخيمت جنب الكمين وصحيت لقيت حمام كتير قوي حواليا وكان منظر جميل. لميت حاجتي وشكرت الناس اللي في الكمين ودخلت المحمية.

 

محمية راس محمد

 

مشيت جوا كتير لحد ما وصلت الـ camping area اتعرفت على شيخ جميع ومحسن من هناك، وما احتاجتش إني أنام في خيمة لأن المكان كان أمان جدا. مجرد ما رميت نفسي علي الرمل وبصيت للسما وسرحت في النجوم نمت.. كنت حاسس اني طاير.

 

صحيت من النوم نزلت المياه وبرضه كان في سمك شكله حلو جدا، رحت لمحسن أشحن الباور بانك لاقيت اني اتعرفت في المكان.  والناس بتتكلم عني إني في رحلة لـ السفر من القاهرة الى دهب وجاي من السويس مشي وبتاع. اتبسط وقعدت احكي لهم عن مغامراتي وطلعت لفيت المحمية كلها مع شخصين كده مش حابين يذكروا نفسهم.

 

طلعت عند المنظار ورحت عند أشجار المانجروف وأماكن تانية كتير، ونزلت البحر في حته مخيفة جدا. لقيت مكان كده كأنه سور أو كأني على حافه جبل. مجرد ما عديته جالي panic attack وخفت جدا لأني حسيت اني مش عارف أميز السما من الأرض ولقيت نفسي متعلق في الهوا كده ? بس كانت مغامرة فظيعة.

 

طلعت من المحمية بعد ما نمت فيها تاني واتعزمت علي أكل وشرب برضه وسهر مع ناس جميلة جدا، بعدها جيت امشي كانت الساعة 5 فكان لازم يا أبات يا ألحق أطلع بعربية. واحد اسمه هاني الدقدوقي طلعني ودخلني شرم الشيخ بالعربية.

 

المواصلات من شرم الشيخ الى دهب

 

السفر من القاهرة الى دهب
السفر من القاهرة الى دهب

 

نزلت عند السوق القديم، جبت معدات اسنوركلينج بدل اللي كنت بستلفها. وبت في شرم الشيخ في مكان خاص بجهة حكومية، مش متذكر تقريبا هيئة حاجه كده تابعه لميناء شرم الشيخ. تاني يوم قابلت نفس الأشخاص اللي كانت في راس محمد صدفة، وكانو معاهم مركب Speed Boat، وعرضوا عليا أطلع معاهم تيران وطبعا أنا ما صدقت.

 

طلعت جزيرة تيران وكانت بالنسبة لي مغامرة جديدة وخارج برنامج رحلة السفر من القاهرة الى دهب ، وفضلنا نلعب بالمركب في المياه ونط من فوق الموجة لحد ما كعوب رجلي باظت. ووصلنا تيران ونزلنا المياه اسنوركلينج واصطدنا سمك وكان يوم في غاية المتعة، وبعدها كملت الرحلة لـ مدينة دهب وطبعا مكنتش مصدق نفسي إني وصلت.. إحساس صادم.

 

رحت the caves وأول ما وصلت مكنتش قادر أسند نفسي لقيت شلتة في الأرض نمت عليها وصحيت لقيت في غنم بتصحيني. احساس حلو قوي لما تفتح عينك تلاقي معزة في وشك.

 

رحلات دهب

 

تسلقت جبل تسلق حر ومعرفتش انزل. كانت مغامرة غبية بس ممتعه لأبعد الحدود، وبعدها لفيت في مدينة دهب ورحت 3balls ورحت Blue Hole ورجعت علي المدينة تاني واتمشيت فيها وكلت من اماكن هناك رخيصه جدا جدا، كان لسه معايا مخزون أكل بس حبيت أرفه عن نفسي وأغير.

 

السفر من القاهرة الى دهب
السفر من القاهرة الى دهب

 

بعدها رحت اللاجونا، كان مكان مذهل فوق المياه وتحت، وكان في ناس بتلعب رياضات في المياه أول مرة اشفها قدام عيني، حاجه كده اعتقد اسمها وين سيرف زي ركوب الامواج كده بس بتعتمد علي الرياح. اتبسطت جدا من القعدة وخيمت وصحيت اصطدت ولفيت ومكنتش عاوز أمشي من دهب.

 

آخر رحلة عملتها في رحلة السفر من القاهرة الى دهب كانت أبو جالوم وكنت بفكر أروح بعدها علي نويبع وأطلع سانت كاترين بس كنت خلاص تقريبا مفياش طاقه أتحرك تاني. رحت حته اسمها المشربة في دهب واشتغلت مكوجي وجمعت 375 جنية، وحجزت أتوبيس ورجعت بعدها القاهرة وكانت أسوء لحظاتي اني رجعت. حسيت اني في مكان مش مكاني.. وان المغامرة هيا حياتي وبيتي ❤

 

اقرأ أيضًا: مدينة دهب : دليل شامل لأهم المعالم والأنشطة السياحية والفنادق

 

معلومات عن السفر من القاهرة الى دهب

 

1- رحلة السفر من القاهرة الى دهب حاولت اختصرها بقدر الإمكان

2- تكلفة السفر من القاهرة الى دهب من البيت كانت 8 جنية تقريبا لحد السويس وكنت دافع للشنطه فرد في الميكروباص كان ممكن أوفر اكتر.

3- الأكل اللي كلته في دهب اتعرفت على غطاس وأنا قاعد وحلف إني ما أدفع فيه حاجه لإعجابه بالرحلة.

4- الأكل اللي كنت بستخدمه طول الرحلة كان بلح تمر وفول سوداني وكنت باكل أسماك وبسكويتات وعلب مربة صغيرة وجبنة نيستون وحلاوة طحينية أكياس.

5- كنت بشرب قرب لتر ونص مياه في اليوم وأكبر حمولة شلتها من المياه كانت 8 لتر.

6- الشنطة اللي كانت معايا في رحلة السفر من القاهرة الى دهب كان وزنها 21 كيلو وهي فيها 8 لتر مياه.

7- أدوات الصيد اتمنعت ادخل بيها محمية راس محمد ولكن خدتهم بنفس الحالة اللي سبتهم بيها.

8- كان معايا رخصه صيد ودي طلعتها من الهيئة العامة للثروة السمكية وكان معايا تصريح تخييم من قيادة قوات حرس الحدود.

9- مكنتش لابس جزمة هايكينج والكوتشي اللي كنت لابسه ساح.

10- رحلة السفر من القاهرة الى دهب كان مدتها 32 يوم ودول كانوا أحلى 32 يوم علي مدار حياتي كلها

11- نصيحتي ليكم تجربوا  السفر من القاهرة الى دهب وتتفرجوا على الأقل على جمال بلدكم لو مش قادرين تطلعوا بره مصر.

وان شاء الله في رحلة بفكر فيها ودي هتكون أكبر بكتير من الأولى وأكيد هتكون أمتع.. دمتم مسافرين مستكشفين.

 

أفضل الفنادق في دهب



Booking.com

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …