الرئيسية / أوروبا / جزيرة رودس اليونانية : رحلة جنان عبده إلى أكثر جزر اليونان سحرا
جزيرة رودس اليونانية
جزيرة رودس اليونانية

جزيرة رودس اليونانية : رحلة جنان عبده إلى أكثر جزر اليونان سحرا

جزيرة رودس اليونانية | الرحالة | رحلة: جنان عبده

أنا بحب الأجواء اليونانية، الموسيقى والطعام وأسلوب الحياة اللي قريب للطبيعة وبحب قصص الالهة اليونانية، أنا ما رحت اليونان بس هي ضمن برنامجي.

كان عندي عطلة قصيرة وكنت محتاجة للسفر وما فكرت كثير، اخترت جزيرة رودس اليونانية لقربها، اقل من ساعتين طيران بالكثير بتكون هناك.

جزيرة رودس اليونانية

وهي جزيرة يونانية في وسط البحر الابيض المتوسط، وهي اختيار جيد للي ما عنده وقت كثير ومعني يقضيه كله بالرحلة ومش بتفاصيل السفر والطيران وبذات الوقت مكان لطيف وممتع تقدر تحس فيه انك قريب  وبعيد بنفس الوقت.

وصلت مطار رودس والمدينة مكنتش بعيدة من هناك  وفندقي كان قريب من شاطىء البحر بطل عليه مباشرة، أخدت باص وصلني لهناك. النهار كان بآخره خطيت الشنط ونزلت أتعرف ع المدينة.

لفت نظري من البداية حقيقية اللي تمنيته- أجواءها اليونانية ، الموسيقى  وروائح الأكل البحري الواصلة من المطاعم هناك والثياب التقليدية اللي كانوا يلبسوها وقت الالهة والفلاسفة اليونان، وهي بالوان العلم اليوناني.

المطبخ اليوناني في جزيرة رودس

فساتين بيضاء مطرزة بخيوط من الذهب وعليها رسم بشبه الشمس  سألت وفهمت انه بشير لتاريخ المدينة والجزيرة العريق اللي كان  يسكنها زي ما بقولوا اله  الشمس. ذكرتني هذه الثياب بلبس الالهة اليونانية وبالأفلام اليونانية التاريخية .

الطعام البحري المحلي  شهي طبق كبير فيه أنواع مختلفة من الأسماك البحرية وأنواع من السلطات والخضار المقطع قطع كبيرة معمولة ببساطة ومُشهية. أخدت بالي إن الأسلوب نفسه موجود في إيطاليا، الأكل البحري وطريقة تقطيع الخضار وتحضير السلطة على بساطتها.

السياحة في جزيرة رودس اليونانية

طبيعة الجزيرة  جميلة جدا، البحر بطل من كل زاوية بألوانه الزرقاء الغامقة  بتشوفه من كل بقعة وبتشوف الخلجان الجميلة وحوليك الغابات الخضراء الكثيفة.

الجميل في رودس انك تقدر تقطع الجزيرة من شرقها لغربها خلال ساعات وتزور اكثر من موقع فيها وهذا اللي أنا عملته وهي ملائمة كثير لرحلة أيام قصيرة محتاج فيها راحة ومتعة من غير تعب زايد .

المواصلات الداخلية والتنقل سهل ومتوفر وهذا بسهل عليك رحلتك. أنا اخذتنا الحافلة المحلية وانطلقت في جولة، لفت نظري القرى المنتشرة هناك  والتي شفتها خلال سفري بالحافلة برضه بطابعها اليوناني التقليدي والعريق  وجمال تصميمها وبساطته.

الحياة في جزيرة رودس

في رودس ممكن تشوف البيوت اللي تصميمها بسيط وقروي منتشرة في القرى وبذات الوقت عظمة التصميم المعماري اليوناني العريق بضخامته وبالقلاع والأسوار.

الشعب اليوناني شعب لطيف جدا ذكرني بالطليان جيرانهم البسمة على وجوههم وبتلاقيهم بتفاخروا في حديثهم لو سالتهم  في تاريخهم العريق، الحقيقة معهم حق اليونان بلد الالهة والفلاسفة.

جزيرة رودس اليونانية
جزيرة رودس اليونانية

السفر الى جزيرة رودس اليونانية

اللي بوصل مدينة رودس لازم يشوف المدينة الأثرية التي  تقع في وسطها وبتحيطها  الأسوار العالية.

أرضيتها مرصوفة بحجارة مالسة ومليانة أزقة جميلة وحوانيت صغيرة بالعشرات بتبيع للسائح رموز يونانية طبعا اضافة لمقاهي ومطاعم عديدة بتصطف الواحد ورا التاني  وحقيقة بتحتار أي منها تختار.

بعد ما قضيت ساعات في المشي قررت أتوقف هناك ودخلت واحد من المطاعم لوجبة غذاء  مع اطباق يونانية.

الاختيار  بينهم كان صعبا فكلها متشابهة في جمالها وبساطتها. حسمت أمري في النهاية بناء على ابتسامة عريضة وترحيب كبير من الجرسون اللي على الباب خاصة لما سألني من وين وعرف إني فلسطينية.

كانت رحلة جميلة اشتريت شوية تحف ورجعت الفندق فرحانة برحلتي لليوم وبحضر نفسي لمشوار بكرا

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …