الرئيسية / آسيا / فاتن توفيق تكتب رحلتها إلى نيبال: مغامرة فوق الهملايا و قمة افرست
الهملايا و قمة افرست
الهملايا و قمة افرست

فاتن توفيق تكتب رحلتها إلى نيبال: مغامرة فوق الهملايا و قمة افرست

الهملايا و قمة افرست | الرحالة | رحلة- فاتن توفيق:

أولا أحب أقول لكم إن إحساس أول سفرية مش ممكن يتنسي، وبحذركم من الإدمان بعدها، لو هتسافر مع حد، اختار الصحبة اللي تطلع معاها، وخليك بسيط ومتشيلش كتير، وأهم حاجة حاجاتك ووتر بروف، وانت ماشي استمتع بالمناظر الطبيعية وميبقاش هدفك امتى أوصل.

الهملايا و قمة افرست

هتبدأ تنبهر من وانت في الطيارة وشايف الجبال والمناظر قدامك وقمم الجبال معدية السحاب، نيبال بسيطة جدا، هتكتشف دا أول ما تنزل من الطيارة. المطار بسيط جدا وكنا حاسين إننا صحيناهم من النوم، الفيزا في المطار بـ٢٥ دولار، والإجراءات بسيطة جدا، بس خلي معاك صورة.

الدولار بـ ١٠٥ روبية، وبلاش تبدلوا من المطار، الناس عموما في كل الفترة اللي قعدنا فيها ذوق جدا وطيبين ومش بتوع مشاكل.

كاتماندو، العاصمة، الكل أجمع إنها مش ممتعة، ممكن تشتري منها التجهيزات اللي نقصاك لأن أسعارها أفضل، فيها monkey timple ودا بتطلع له حوالي ٣٦٠ سلمة والقرود بتكون في استقبالك تحت والتكت بـ١٠٠ روبية يعنى حوالى ١٠ جنيه، وفي دربار سكوير، بس مدخلناهوش بصراحة، بس كان عبارة عن مبانى أثرية وطبعا الزلزال أثر عليها شوية كان بـ١٥٠ جنيه.

كاتماندو عاصمة نيبال

الهملايا و قمة افرست

متتوقعوش كتير في العاصمة لا نظافة ولا مناظر والأغلبية لابسين كمامات. نزلنا في فندق كان كويس happy home والمطعم على الروف وسط الزرع ومناظر كاتماندوا كله قدامك، الكهربا بتقطع كتير خلوا بالكم يكون معاكم باور بانك كويس ومفيش ميه سخنة، ويفضل استخدامك كله يكون ميه معدنية حتى لغسيل الأسنان.

الرحلة من كاتماندوا لبوخارا حوالى ٧ ساعات وهم ٢٠٠ كيلو بس الطريق صغير. وبتمشي بطيء بس طول ما انت ماشي شايف مناظر طبيعية وجبال طبعا اللي متعود على السواقة في مصر هيزهق، خلى معاك كتاب أو تسمع حاجة بتحبها وتاخدها من الآخر طيران داخلى بـ ١٠٠ دولار.

بوخارا

بوخارا أحلى كتير من كاتماندو، نزلنا في فندق splendid كان نظيف وأحلى، برضه الكهربا بتقطع كتير، الجو أحلى كتير، في أسواق كتير وأنواع شاي كتير، رحنا مطعم كان أكله حلو قوى اسمه بوخارا حلال لاند، وطبعا فاصلوا في الشرا من المحلات وهتتصدموا لما تلاقوهم بيقفلوا من ٩  (:

وفي هناك شلالات وفي بحيرة بتاخد منها مركب Bahari temple دفعنا حوالي ٢٠٠ الفرد يعنى ٢٠ جنيه، بعد كده الصبح اتحركنا لـ Nayapul علشان نبدا التريكينج خلوا بالكم في تصريح وهيطلب منكم صور.

هيا بعد بوخارا بحوالى ساعة ونص، أول يوم مشينا حوالي ١٧ كيلو منهم ٣٥٠٠ سلمة، طبعا طول الطريق مناظر طبيعية جبال وشلالات وفي الطريق بيكون في استراحات للأكل والميه والشاي عندهم أساسي طبعا، من بعد الظهر تبدا تاخد بالك من المطر وخصوصا كل ما ترتفع، اليوم ده هتطلع سلالم مكنتش تتخيل تطلع نصها في حياتك كلها.

جبال الهملايا

الاقامه كانت في kamala الأكل طبعا بسيط، أول يوم مشي حوالي ٦ أو ٧ ساعات. ثانى يوم لـ Ghorepani مشى حوالى ٥ ساعات وسط مناظر وجبال تحفه هتبدا تشوفsouth Annapurna و fishtail و Dhaulagiri قعدنا في snowland كان ظريف وفي دفاية، ثالث يوم Tadapani بدأنا من ٤ الفجر الصعود حوالى ساعة سلالم علشان نلحق نشوف الشروق من انابورنا على ارتفاع ٣٢٠٠ متر وده أروع حاجه في الرحله وصول الهدف ومشاهده الشروق.

رجعنا تانى الفندق فطرنا ونزلنا بقى نكمل يومنا العادى كان حوالى ٥ أو ٦ ساعات مشي برضه ووصلنا هيمالايا كإقامة كان معدم جدا لكن المنظر منه كان رائع قدام الجبال تماما، خلال اليوم بتعدى وسط غابات وشلالات ومناظر حلوة قوى ولو محظوظ هينزل عليك مطر وتلج.

اليوم الرابع Ghandruk بداية النزول وسط الغابات والمناظر حلوة والمشي كان أقل وسهل ووصلنا mushrom tea house وده قريب من المتحف والمعبد وممكن تاخد صور تذكارية بالزى النيبالي والإقامه كان الأفضل نظافة وأكل.

السياحة في نيبال

اليوم الأخير مشينا حوالي ٥ ساعات علشان نرجع Nayapul ومنها ناخد عربية تانى لبوخارا، رجعنا لبوخارا وكلنا في المطعم نفسه وعملنا شوبنج واتحركنا الصبح بدرى لكاتماندو، في الطريق لكاتماندو وقفنا للـ rafting كلفنا حوالى ٣٠ دولار بالغدا وكانت تجربه حلوة جدا.

بعد ما خلصنا الطريق لكاتماندو كان في انيهار ووصلنا الفندق ١ بالليل فخلوا بالكم علشان مواعيد المطار اعملوا حسابكم في الوقت. أصعب حاجة بجد كان إحساس الرجوع بجد الصفاء والهدوء والمناظر والطاقة اللي كنت فيها هترجع لحياتك تانى فرق شاسع بجد.

الهملايا و قمة افرست

ملحوظة: الميه كل ما ترتفع هتغلى، في كاتماندو وبوخارا مثلا بـ٥ جنيه هتوصل في القمه لـ١٢، وبعض الأماكن ريفل لميه مغليه بسعر أقل فالأفضل تطلب معدنية جديدة، الكانز والعصير بحوالي ٢٠، الإقامة بالأكل هتكلف من ١٥ لـ٢٠ دولار في اليوم، الأكل الوجبة في المتوسط بـ٣٥، الشحن والنت بـ١٠ جنيه.

ملحوظة: متتفاجئش لما تلاقي طفل ٦ سنين شايل شنطته وطالع يجري وانت مش قادر تمشي عادى دا رايح المدرسة متتصدمش هو متعود. هتنبهر لما تكتشف انك تقدر تبعد عن التكنولوجيا والموبايل وآخرك تستخدم الكام اه والله مش هتموت لما تسيبهم وتعيش ببساطة.

هتبهر من إمكانياتك وانك تقدر تعمل حاجه مكنتش تتوقع تعملها انك تمشي ٧٠ كيلو واكتر من ٤٠٠٠ سلمة وانت أصلا لو عديت الشارع مشي او طلعت دور من غير أسانسير تحس انك أنجزت هيفرق معاك كتير بجد.

 

أنصحك أيضًا بقراءة:

12 معلومة مهمة قد لا تعرفها عن السفر الى نيبال وتسلق جبال الهمالايا و قمة افرست

ازاي تستعد لـ رحلة جبال الهملايا : كل ما تحتاجه لتسلق قمة افرست الأعلى في العالم

بهاء فاروق يكتب من نيبال: مغامرة في أحضان جبال الهملايا و قمة افرست

محمد الرشيدي يكتب رحلته إلى الهيمالايا: مغامرة سيرًا على الأقدام

قمة إفرست | عزت الزيات يكتب مغامرة تسلق أعلى جبل في العالم : 20 يوم هايكنج

شاهد أيضاً

طلب زيارة للمقيمين

طلب زيارة للمقيمين : خطوات وشروط ورسوم تقديم طلب زيارة للمقيمين بالسعودية

طلب زيارة للمقيمين | الرحالة | تقدم وزارة الخارجية السعودية على موقعها الإلكتروني خدمة تقديم …