الرئيسية / تقارير مميزة / محمد رجب يكتب تجربته في حجز السكن على موقع airbnb .. ورسالة لكل شاب مصري
موقع airbnb
موقع airbnb

محمد رجب يكتب تجربته في حجز السكن على موقع airbnb .. ورسالة لكل شاب مصري

موقع airbnb | الرحالة | تجربة- محمد رجب:

حابب أشارك تجربتي من موقع airbnb في حجز السكن، كانت تجربة فوق الرائعة.

أولًا بتنزل أبليكاشن البرنامج وتعمل بحث على الأماكن ومنها بتختار السكن وتبتدي تتواصل مع صاحب المكان برسائل مباشرة ليه طبعا الحجز بيكون عن طريق خطوتين.

1- بتختار التاريخ بتاع الوصول وكام يوم هتعقد وتبعت للأونر أو الهوست انك عاوز تنزل عنه وطبعا تقول انت هتيجي مع مين أو ناوي تعمل إيه، ده من نوع انك مهتم وناوي فعلا تحجز.

2- بعد ما الهوست بيوافق بتنتقل لمرحلة الحجز ودي طبعا بتبقي بسيطة باستخدام الفيزا كارد بتاعتك.

3- هتظهر ساعتها نمرة التليفون بتاع الهوست.

موقع airbnb

ملحوظة قبل ما تدفع:

-أدخل علي جوجل واعمل سيرش على العنوان في جوجل ماب واتفرج على الشارع

-اقرأ الريفيو المكتوبة من اللي سكنوا قبل منك في المكان بيقولوا المكان مسافته بينه وبين المحطات أو الأماكن السياحية أو المحلات قربها قد إيه نظافة المكان واستقبال المضيف لهم.

– اتفق مع الهوست هيقابلك فين وإيه ممكن يعرضه لك لما توصل فطار أو كروت أو خرائط أو لو له وقت ينزل معاك مكان صعب إنك توصله.

– ساعات أماكن مش بيكون فيها عرض فطار بس ممكن تاخده بالحب من الهوست.

– أدخل عليه بهدية من مصر أهرامات يلزقها علي الثلاجة أو أبو الهول يرزعه علي ترابيزة 😀

بالنسبة لي أنا آخد سكن في شارع الاستقلال بـ 18 دولار في اليوم وفطار بالحب 😀 ولما فاتتني تذكرة الطيارة وقفوا جنبي عشان كنت كويس معاهم في البيت نظيف مش بيتسمع لي صوت عالي بغسل مواعيني ومظبط حالي والحاجات اللي مش هحتاجها من الأوضه طلعتها أول يوم عشان مش تتغسل تاني على الفاضي طبعا كل ده نفعني لما بقيت من غير تذكرة ولا فلوس لدرجه انهم كانوا عاوزين يشتروا لي تذكرة بـ 270 يورو 😀 وأنا مش رضيت.

طبعا ده غير عرض كارت اسطنبول وخريطة وكمان نزلوا فسحوني 😀 عشان أول يوم رحت بدري افتكروني مش عارف اتفسح وأنا كنت تعبان أساسا عشان مطبق.

غير إنهم بيعرفوك على الأماكن الحلوة وبيحذروك من الأماكن اللي تتعرض فيها من النصب. طبعا مش كل الهوست كده في هوست ممكن يبقي نصاب أو هيعمل قومسيون عليك

رجاء من شباب مصر 😀 بلاش وانت بتعمل شات مع هوست تقولها أنا سينجل او انتي سينجل مش تبوظوا شكلنا يا جدعان 😀 عشان انا شوفت رسائل حرقت دمي بجد.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …