الرئيسية / أوروبا / جمال درويش يكتب عن السياحة في ايطاليا : روما وميلان وفينيسيا
السياحة في ايطاليا
السياحة في ايطاليا

جمال درويش يكتب عن السياحة في ايطاليا : روما وميلان وفينيسيا

رحلة- جمال درويش:

السياحة في ايطاليا : روما، ميلان وفينسيا كانوا دايما فى بالي باكج كدا على بعض، وكنت بقول لازم طلعة إيطاليا دى مش أقل من 10 أيام أو أسبوعين وكنت زعلان إنى مش هروج كابرى وفيرونا واتصور عند بيزا واقعد على بحيرة كومو واتمشى فى شوارع فلورنس.

أول صدمة برغم إنى كنت عارف إن روما حر بس الصدمة إنه كانت حر جدا ? فى أغسطس وبالليل رطوبة جدا فلازم تقعد فى تكييف طول الوقت، فمزورتش أماكن كتير ومستمتعش قوى خصوصا انى عايش نفس الجو طول السنة فى الدولة الخليجية اللى مقيم فيها. وكمان كانت النافورة مقفولة للصيانة زى ماهو باين فى الصور.(Trevi Fountain) لكن مستسلمتش يعنى.?

 

السياحة في ايطاليا

الإقامة فى روما بفندق Hotel Patria القريب من محطة القطر الرئيسية ? (برشح المكان للإقامه) و10 دقايق مشى لـ (Spanish steps) اللى زرتها تانى يوم وزرت الكنيسة ? الموجودة أعلى السلالم الإسبانية (Santissima Trinità dei Monti).

روما فعلا متحف مفتوح ? طول ما انت ماشى متاحف كتير وميادين قديمة زرت كمان المسرح الرومانى «كولوسيوم» زرت كمان القلعة أو زى ما بيقولوا كاستلو (Castel Sant’Angelo) وده يعتبر كويس فى درجة الحرارة اللى كانت تقريبا 40

ميلانو

خلصت أيام روما و بعد كدا طلعت على ميلانو اللى كانت درجة الحرارة فيها أخاف شوية وبالليل الجو كويس جدا وأمطار خفيفة كمان. زرت فيها ساحة الدومو وقلعة ميلانو برضه Sforza Castle اللي هي من هم معالم السياحة في ايطاليا

كان الـ sale شغال واللي تقريبا بيكون من 15/7 لـ 15/8 أو تقريبا بيبتدى من أول سبت فى شهر 7 على ما أتذكر لحد آخر شهر 8 و فعلا أسعار البراندات كانت كويسة وفى كمان منطقة اسمها buenos aires اللى وداهانى صديق ليا عايش هناك وتقدر توصلها بالأندر جراند ? بسهولة من الدومو 4 محطات line M.

اتغدينا هناك فى مطعم مصرى اسمه كليوباترا البيتزا بـ 2 يورو ? وساندوتش الدونر بيورو ونص وده تقريبا ارخص حد اكلت عنده فى اوربا و تبددت احلامه انى اكل البيتزا والمكرونة من بلدها لأن كان الشيف من الشرقية (بس فعلا كل الأكل كويس) المصريين كتير فى ميلانو وهتشوفهم طول ما انت ماشى. أثناء رحلة السياحة في ايطاليا

نوافير الميه الصالحه للشرب كتير أو زى ما بيقولوا عليها فونتانا ⛲ حاول تمشى كتير وتستمتع بشوارعها وانت بتسمع اغنية l’italiano فى ودانك لـ toto cutugno ♩♩

فينيسيا

من ميلان لفينسيا اللى كنت متشوق قوى إنى أوصلها بسرعة  ? الإقامة فى فندق Rialto إلى على الاسم الكوبرى وتقريبا جنبة مباشرة وده أشهر كوبرى هناك (rialto bridge) على الجراند قنال Garand Canal.

الجو كان أجمل من ميلان و بالليل برد وأمطار خفيفة ? ركبت الـ water taxi ? ورحت ساحة سان ماركو، وممكن كمان تطلع برج سان ماركو, وتتمشى فى الممشى هناك وهتشوف فندق Hotel Danieli اللى تقريبا اتصور فيه فيلم أنجلينا جولى the tourist.

ممكن كمان تاخد سيتى تور وتزور مورانوا ومصنع الزجاج الشهير Murano Glass Factory ويعتبر من أشهر مصانع الزجاج فى العالم. وطبعا متنساش المعجنات طول ما انت ماشى وخصوصا Cannoli ? الى هتلاقيه حواليك فى كل مكان( بواحد يورو)

هذا التقرير منشور بالاتفاق مع صفحة travel secrets

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …