الرئيسية / آسيا / بهاء فاروق يكتب من نيبال: مغامرة في أحضان جبال الهملايا و قمة افرست
جبال الهملايا و قمة افرست
جبال الهملايا و قمة افرست

بهاء فاروق يكتب من نيبال: مغامرة في أحضان جبال الهملايا و قمة افرست

جبال الهملايا و قمة افرست | الرحالة | رحلة- بهاء فاروق:

بعد ما وصلنا بسلامة الله إلى كاتماندو, خلصنا الإجراءات في 10 دقائق ودفعنا تمن الفيزا وكان 25 دولار, وخلال دقايق كنا خارج المطار, كانت في انتظارنا عربية خاصة مع منظمين رحلة جبال الهملايا و قمة افرست علشان نروح نرتاح في الفندق.

أول يوم في رحلة جبال الهملايا و قمة افرست الجروب كان لازم يسخن ويستعد لرحلة المشي الجبلي بعد يومين. خرج مجموعة من الشباب لاكتشاف المدينة الصبح والباقي فضل ياخد راحة بسيطة عشان الجولة الرسمية لاكتشاف كاتماندو مع المرشد الخاص هتكون كلها مشي طويل جدا وهتبدأ الساعة 2

انطباعنا عن كاتماندو أنها مدينة بسيطة جدا وانت ماشي فيها هتحس كأنك ماشي في إحدى شوارع مصر البسيطة, هتشوف تكاتك وزحمة وناس بسيطة جدا بس طيبين قوي يا خال 😀

جبال الهملايا و قمة افرست

.زيارة معبد القردة كانت مخططة لاختبار لياقة الجروب لأن طلوع المعبد بيحتاج تسلق 365 درجه سلم حجرية عالية ومتعبة.?

فيه ناس طلعت في نص ساعة ومجموعة اتأخرت شوية ومجموعة تانية تقريبا فكرت انها ترجع مصر علي أول طيارة. مش عارفين إن رقم 365 درجة سلم ده هيتضاف عليه في أول أيام المشي الجبلي.

انتهي اليوم المتعب لاكتشاف كاتماندو بدعوة على العشاء في مطعم لطيف بجلسة بسيطة على أضواء الشموع وكانت نهاية أول يوم.

جبال الهملايا

بدأنا اليوم التاني من الرحلة متجهين لمدينة بوخارا الجميلة بالباص الخاص بالجروب. الطريق طويل جدا. المناظر جميلة بس يعيبه الزحمة وانه طريق بدائي جدا. لدرجه إن مسافة 200 كيلو محتاجة 7 ساعات. ولكن قضينا الوقت مبسوطين ومستمتعين بالمناظر الطبيعية. لـ جبال الهملايا و قمة افرست

بعد الوصول للفندق رحنا بسرعة علي بحيرة فيوا لعمل جولة بالمراكب وكانت من أمتع اللحظات فعلا.

بداية الرحلة الحقيقية والتحدي

كل الجروب جاهز للمغامرة الحقيقية ورحلة المشي الجبلي لمده 5 أيام، المخاطرة ارتفعت ابتداء من اللحظة دي مفيش أي وسيلة مواصلات غير رجليك بس، انت هتعيش الحياة زي ما السكان الأصليين عايشينها. الرحلة طويلة ومسافة المشي والصعود حوالي 17 كيلو أول يوم بس، وفيهم 3500 درجة سلم لازم تطلعها لو حبيت توصل وتكمل رحلة المشي لمسافة 70 كيلو على 5 أيام.

الهملايا

بدأت الرحلة من منطقة نيابول وطول الطريق المناظر والطبيعية. ومشاهدة القرى الجبلية الجميلة تخليك تنسي التعب والمجهود، فريق المرشدين متوزع مع كل المجموعات لاختلاف سرعة كل مجموعة، والحمالين معانا شايلين كل الشنط بتاعتنا علشان نستمتع إحنا بالمناظر الطبيعية بدون إرهاق إضافي على الرحلة.

فجأه تنزل علينا أمطار شديدة (ثلج ورياح قوية جدا), وبسبب صعوبة الرؤية المجموعة بدأت تتوه عن بعض, وبدأ القلق. مجموعة حاولت تستخبى من المطر الجامد جوه استراحة, ونفاجأ كلنا إن قوة المطر أقوى من السقف اللي احنا واقفين تحته، وتضطر مجموعتنا الصغيرة إنها تدخل غرفة تداري أكتر، بس من قوة العاصفة فتحت شبابيك الغرفة وبدأ الثلج يدخل من كل مكان، ويزيد القلق والأحوال الجوية الصعبة من صعوبة الطريق.

قمة افرست

زاد القلق أكثر لما المجموعة التانية اتأخرت أكتر من ساعة وسط العاصفة وبدأت الشمس تغرب بالفعل والظلام خيم على المكان, والمنطقة دي من الجبل مافيهاش أي مصدر للإضاءة طول الطريق.

ينتهي الموقف بسؤال للمرشد عن المسافة الباقية للوصول للفندق فيشاور لنا علي تلة بعيدة على قمة جبل.

موضوع التريكنج في الهيمالايا مش سهل لكن هو تحدي جسماني وذهني من الممتع إنك تجربه بنفسك ولكن لسلامتك أنصحك يكون معاك مرشد أو دليل متمرس جدا في المنطقة دي.

المشكلة إن في مجموعة لسه موصلتش وفيها بنات, اتأخروا حوالي ساعة والدنيا ضلمت وحاسس إن في حاجة مش مريحة هتحصل, ربنا يستر بجد.. استنوا الحلقة الجاية علشان تعرفوا حصلهم إيه.

 

أنصحك أيضًا بقراءة:

فاتن توفيق تكتب رحلتها إلى نيبال: مغامرة فوق الهملايا و قمة افرست

12 معلومة مهمة قد لا تعرفها عن السفر الى نيبال وتسلق جبال الهمالايا و قمة افرست

ازاي تستعد لـ رحلة جبال الهملايا : كل ما تحتاجه لتسلق قمة افرست الأعلى في العالم

محمد الرشيدي يكتب رحلته إلى الهيمالايا: مغامرة سيرًا على الأقدام

قمة إفرست | عزت الزيات يكتب مغامرة تسلق أعلى جبل في العالم : 20 يوم هايكنج

شاهد أيضاً

دول لا تحتاج فيزا للسعوديين : أكثر من 70 دولة تسمح بدخولهم دون تأشيرة

دول لا تحتاج فيزا للسعوديين | الرحالة |   يحتل جواز السفر السعودي المرتبة رقم …