الرئيسية / آسيا / 12 معلومة مهمة قد لا تعرفها عن السفر الى نيبال وتسلق جبال الهمالايا و قمة افرست
السفر الى نيبال وتسلق جبال الهمالايا و قمة افرست
السفر الى نيبال وتسلق جبال الهمالايا و قمة افرست

12 معلومة مهمة قد لا تعرفها عن السفر الى نيبال وتسلق جبال الهمالايا و قمة افرست

السفر الى نيبال وتسلق جبال الهمالايا و قمة افرست | الرحالة | تجربة- محمد الرشيدي:

1- البلد من غير تأشيرة يعني يادوبك بتملا أبلكاشن ولازم تاخد كذا صورة شخصية أكتر من 4 لأنك هتحتاج صور وانت بتطلع تصريح التسلق كمان وكمان خد قلم معاك علشان ماتتحيرش في المطار زيي 🙂

2- هتحول العملة في المطار عادي ويفضل يكون معاك دولار تحول بيه وشباك الصرافة هتلاقيه جوه قبل ما تختم الباسبور للدخول.

 

السفر الى نيبال وتسلق جبال الهمالايا و قمة افرست

 

3- هات شنطة كبيرة بتاع السفاري اللي بتتلبس على الظهر (زي مخلة الجيش) وحاول ماتجيبش هدوم كتير علشان وزن الشنطة لو هتشيلها ولو هتجيب هدايا تذكارية خليها بعد ما تخلص الطلوع للجبل.

4- اعمل حسابك في هدوم تقيلة عشان درجة الحرارة بتوصل بالسالب وممكن تنزل تلج عادي جدا وكمان حاول يكون معاك كلسون تلبسه تحت البنطلون وكوفية وآيس كاب ونضارة شمس وجزمة كوتشي (2 احتياط عشان الجبل) والبنطلون يكون رياضي أو واسع لأنك هتمشي بيه كتير.

ممكن في اليوم تمشي 6 أو 7 ساعات فمينفعش تلبس جينز أو ضيق ولو نسيت ومجبتش حاول تجيب بنطلون مخصص للجبل من كاتماندو لأنها ارخص من بوكارا وكمان ياريت تكون لابس فانلة من النوع البولستر عشان وانت ماشي هتعرق في الجو التلج ده, فنصيحة بلاش قطن والبس بولستر عشان مش بيمتص العرق.

السفر الى نيبال

5- زي ماقلت البلد هناك فقيرة, الأكل والشرب مفيهومش أي مشكلة لكن طبعا بما إني مسلم فمكانش ينفع آكل أي لحوم هناك لأنها إما لحم خنزير أو مش مذبوحة تبع الشريعة فهناك تحولت إلى كائن Vegetarian, أو ممكن تاخد معاك معلبات بسيطة.

6- متشيلش هم الأكل وانت طالع الجبل لأنك هتلاقي في guest house انهم بيعملوا أنواع أكل كتير وطازة كمان ونصيحة حاول تجرب الأكل الشعبي بتاعهم (انت رايح تجرب كل حاجة جديدة) وعندهم أشهر أكلة شعبية اسمها ماموا.

7- حاول تجيب باور بانك معاك محترم علشان هتحتاج تشحن كتير.

كاتماندو

8 – حاول وانت في كاتماندو تروح تشوف المعابد اللي هناك وخصوصا معبد القردة ولما توصل بوكارا أجر قارب وانزل البحيرة اللي هناك هتعجبك جدا.

9 – لما تشتري الهدايا متقبلش بأول سعر يقولك عليه دور في كذا محل وفاصل في النص ع طول.

جبال الهملايا

10 – لما تبقى فوق في الجبل هتشوف وتتعرف على كذا جنسية من كذا بلد حاول تتصرف كأنك سفير وواجهة لبلدك وخصوصا انهم مش متعودين على العرب وخصوصا المصريين هناك

11- وانت طالع الجبل لازم هتعدي على (check point) عامل زي مكتب الشرطة فيه ضابط تختم منه التصريح

قمة افرست

12- أهم نقطة قبل ما تطلع من البلد اتأكد انك حولت العملة بتاعتهم لدولارات لأن العملة بتاعتهم مش هتقدر تغيرها في أي حتة تانية وكده ممكن تلبس فيها.

هذا التقرير منشور بالاتفاق مع صفحة travel secrets

 

أنصحك أيضًا بقراءة:

فاتن توفيق تكتب رحلتها إلى نيبال: مغامرة فوق الهملايا و قمة افرست

ازاي تستعد لـ رحلة جبال الهملايا : كل ما تحتاجه لتسلق قمة افرست الأعلى في العالم

بهاء فاروق يكتب من نيبال: مغامرة في أحضان جبال الهملايا و قمة افرست

محمد الرشيدي يكتب رحلته إلى الهيمالايا: مغامرة سيرًا على الأقدام

قمة إفرست | عزت الزيات يكتب مغامرة تسلق أعلى جبل في العالم : 20 يوم هايكنج

شاهد أيضاً

شارع العرب في كوالالمبور

شارع العرب في كوالالمبور : دليلك السياحي الشامل لأهم شوارع العرب في ماليزيا

شارع العرب في كوالالمبور | الرحالة |   تعرف كوالالمبور باحتوائها على الكثير من المعالم …