الرئيسية / أوروبا / أحمد يحيى يواصل رحلته في بريطانيا: مغامرة في جنوب المملكة

أحمد يحيى يواصل رحلته في بريطانيا: مغامرة في جنوب المملكة

رحلة- أحمد يحيى:

اتكلمت الحلقة اللى فاتت عن مدينة لندن وإزاي تزورها بطريقة مميزة ومختلفة. الغلطة اللى كتير بيعملها لما يروح بريطانيا انه بيروح لندن بس، حتى الناس بتسميها فيزا لندن!. بس بريطانيا الحقيقة مليانة مدن وأماكن كتيرة جدا جدا ومميزة وكل جزء فيها فيه ما يميزه، كانت تانى مدينة ليه بعد لندن هى مدينة “كارديف”.

كارديف هى عاصمة دولة ويلز واللى هى جزء من المملكة وتعتبر هى وإنجلترا تقريبا دولة واحدة عكس اسكتلندا وأيرلندا الشمالية اللى فيهم بعض الاختلافات السياسية. أول ما توصل ويلز هتلاقى أول اختلاف وهى اللغة، لأن الويلزيين ليهم لغة أصلية غير الإنجليزى ومختلفة تماما عن الإنجليزى.

يمكن كارديف مش منتشرة قوى فيها لكن في شمال ويلز اللغة دى شبه مسيطرة هناك، وعلى كلام أهل البلد فهى اقرب للفرنسية عن الانجليزية، مقارنة بلندن فكارديف مدينة صغيرة جدا تتلف كلها في يوم مشى. مشهورة بقلعة كارديف (بفلوس مدخلتهاش) والبارك جنب القلعة وفي وسط المدينة وده كله مولات ومطاعم وملعب الألفية واخيرا الووترفرونت والدوكس.

على الرغم ان كارديف بعيدة عن لندن بس برضه بيسكنها ناس كتير مش بريطانيين ومهاجرين. جنوب ويلز الصراحة رائع جدا والمساحات الخضرا والقرى الصغيرة والجبال والبحر مناطق حلوة جدا بس للأسف علشان تلف كل ده لازم تأجر عربية وأنا مش معايا فلوس الحقيقة 🙁

كارديف تقريبا 5 ساعات من فيكتوريا في لندن بالباص، والتذكرة كنت حاجزها بـ 3 استرلينى وعلى الرغم ان الجوبرو مشتغلتش تانى من بعد كارديف الا انى حبيت البلد دى 😀

بعد كده توجهت لمنطقة زومرسيت في جنوب غرب انجلترا، حيث مدينة بريستول. أول ما عرفت انى رايح بريطانيا على طول جه في بالى زيارة بريستول. مدينة مشهورة جدا لأنها كانت بتتصنع فيها سفن أيام الحرب العالمية، ومينا بريستول كان من اهم الموانى أيام الحرب.

بريستول مدينة مش سياحية وده هيخليها من أفضل المدن اللى تتعرف فيها على الإنجليز وعادتهم وحياتهم، مستوى المعيشة في بريستول مرتفع شوية والإيجارات غالية مقارنة بالمدن المجاورة ليها، غير الووترفرونت والمينا تقدر تروح جسر كليفتون المعلق وهو منطقة جميلة جدا جدا.

بريستول مليانة مولات ومناطق تسوق كتيرة وزحمة بس هتستمع وانت بتتفرج على حياة الانجليز

في برضه كام متحف وكاتدرائية ممكن اللى غاوى يشوف المواصلات في بريستول باصات بتشترى daypass بـ 4 استرلينى أو 6 لو هتروح مدن تانية في الولاية وده اللى انا اشتريته (بريستول مدينة كبيرة صعب المشى فيها).

بريستول بعيدة عن لندن تقريبا 3 ساعات بالباص وانا برشحها جدا جدا وتعتبر من أحلى المدن اللى شوفتها في بريطانيا خصوصا الووترفرونت وكليفتون. بعد بريستول رحت أقابل صديق عايش في مدينة bath and spa ودى مدينة من أشهر المدن السياحية في بريطانيا، مشهورة بالحمام الرومانى ومبنى رومانى قديم ملوش لزمة، تذكرة دخول الحمام كانت بـ 25 استرلينى 😀 تشوفه من بره حلو، المدينة فيها نهر وممشى حلو وكام بارك حلوة.

صديقى عزمنى على العشا على الوجبة الكلاسيكية الإنجليزية “السمك والبطاطس” هى مدينة صغيرة جدا جدا ولطيفة بس عيبها السياح اللى في كل مكان، وعلى كلام صديقى ان المدينة دى عايشة اصلا على السياحة. أنا شايف ان زيارتها مش مهمة قوى بس لو في بريستول ممكن تعدى عليها تاخد فكرة.

والناس اللى مش بتحب الحركة وعاوز تتعرف على الانجليز انا شايف الجنوب حلو جدا وكله قريب من لندن وفي مدن كتير وشواطئ ومناطق طبيعية كتير ممكن زيارتها ويعتبر ده اكتر جزء بيزوره ناس في المملكة لوجود العاصمة لندن فيه، وترتيب المدن اللى زرتها حسب رأيي:

1- بريستول

2- لندن

3- كارديف

4- باث

كده انا خلصت الجزء بتاع جنوب المملكة والحلقة الجاية هنتوجه الى الشمال

لقراءة الحلقة الأولى

أحمد يحيى يكتب رحلته إلى لندن: مغامرة في عاصمة الضباب

 

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *