الرئيسية / أوروبا / أحمد الباشا يكتب رحلة هولندا: لو قال تمن رومي وربع حشيش متستغربش

أحمد الباشا يكتب رحلة هولندا: لو قال تمن رومي وربع حشيش متستغربش

رحلة- أحمد الباشا:

في خطوط طيران كتير بتروح هولندا ومنها مصر للطيران والمسافة تقريبا من القاهرة لأمستردام بتاخد 5 ساعات، لو انت مسافر هناك مهم جدًا تقرأ النصائح دي:

 

نصيحة 1:

أنا في معظم المعلومات والأماكن اللى بقول عليها بقولكم الويب سايت بتاعهم على النت مش مجرد حاجة زيادة بكتبها ولكن أنا شخصيا قبل ما أسافر أي دولة بشوف كل المواقع اللى تخص الدولة دي واخد أفكار عنها (بالبلدي كده بحسها قبل ما أروحها) وأكيد أكيد أكيد زيارة أي ويب سايت هيفيدكم.

 

نصيحة 2:

بالنسبة لأي حد أول مرة يسافر شنجن (أو حتى لو سافر قبل كده) وكلامي ده مش للشنجن بس نصيحة مني إنه يكون معاه مبلغ وليكن 1000 يورو وفيزا كارت لحسابه عشان أحيانا ضابط الجوازات بيكون رخم وغير إنه بيسأل عن حجز الفندق وتيكيت طيران العودة ممكن يسأل ويطلب يشوف الفلوس اللى معاك هيشوفها وتوريلوا كارت الفيزا بتاعك وتقوله معايا برضه فيزا.

حصلت قدام عيني أكتر من مرة إن ضابط الجوازات رفض يدخل ناس.

 

نصيحة 3:

دايما قبل أي سفرية اسحب صورة باسبورك وتأشيرتك سكانر وخليهم على فلاشة معاك واطبعهم ألوان وخليهم معاك لما تسافر لا قدر الله لا قدر الله لا قدر الله لو حد ضاع باسبوره في السفر بتبقى مشكلة كبيرة أول حاجة بيروح قسم الشرطة يعمل محضر (وأحيانا الضابط يكون رخم ويشك إنك عامل هجرة غير شرعية أو كاسر الفيزا فيتلكك) عشان كدة تبقى معاك صورة باسبورك وتأشيرتك عشان يشوفهم وبعد ما تعمل محضر بتروح السفارة المصرية عشان يطلعوا لك وثيقة سفر عشان ترجع بيها مصر، وبيرخموا في المطار في مصر كتحقيق عشان باسبورك اللي ضاع.

مطار هولندا Amsterdam Airport Schiphol

https://www.schiphol.nl/en/

مش عارف ليه اشمعنى المطار ده بالذات وانت واقف قدام البوابة بره تحس انك مبسوط 😀

المواصلات من المطار: في قطار كل شوية لمنتصف البلد Amsterdam Centraal التذكرة في حدود 4 يورو تقريبا، وممكن التاكسي لمنتصف البلد ياخد تقريبا 50 يورو.

 

دلوقتي هبتدي معاكوا البرنامج السياحي والأماكن اللى تزورها:

متحف ريجكس (المتحف الوطني) Rijksmuseum

بيفتح من 9 الصبح وحتى 5 العصر

https://www.rijksmuseum.nl/en

سعر التيكيت بـ 16 يورو (على فكرة في ناس بتقول يورو وناس بتقول إيرو وناس بتقول أورو عادي كلهم صح كل واحد حسب لغته 😀 والهولنديين بيقولوا إيرو) ممكن تحجز أونلاين وممكن تحجز وانت هناك. متحف روعة بس للناس اللي بتحب الكلام ده، لو هتمشي بينه وبين الدام سكوير تقريبا نص ساعة مشي (حوالى 2 كم)، أنا عن نفسي بحب أتمشى قوي. المتحف موجود في Museumstraat.

 

متحف أني فرانك Anne Frank House

بيفتح من 9 الصبح وحتى 3 العصر للحجز الأونلاين، وده الموقع اللى عايز يروح يحجز أونلاين، http://www.annefrank.org/en، سعر التيكت 9 يورو، ولو حجزت مش أونلاين المتحف هيكون من 3 العصر وحتى 10 مساء في الشتاء، وفي الصيف حتى 7 مساء، والمتحف ده موجود في Prinsengracht، وبرضه قريب من الدام سكوير ممكن تروحوا مشي (هتعد حوالى 10 دقايق)، ولو المترو 14 ناحية Slotermeer وهتمشي شوية صغيرين، وعلى فكرة انا اشتريت قبل كدة من سوبر ماركت حاجات بـ 19 يورو إداني شريحة خط تليفون مجانا 😀

 

متحف فان جوخ Van Gogh Museum

طبعا مش محتاج اني اتكلم عنه، وده الموقع بتاعه، https://www.vangoghmuseum.nl/en، التيكيت بـ 16 يورو، طريقه 172 ناحية Raadhuisstraat بالترام، يعتبر بعيد شوية ولكن مش اوي يعني برده تروحوا مشي ممكن تعد نص ساعة.

 

أمستردام عموما مدينة متعتبرش كبيرة أوي.. وساحرة ساحرة ساحرة، فخلوا معظم تنقلاتكم تبقى مشي حتى عشان تكتشفوا جمالها، وأمان جدا والبوليس منتشر في كل مكان، ومعظم الشعب هناك بيتمشوا بالعجل 😀

ونصيحة اشتروا كارت GVB وبراحتك ممكن تشتريها ليوم أو اكتر عشان تركبوا بيه سواء المترو أو الأتوبيس، الساعة بـ 3 يورو واليوم كامل تقريبا بـ 16 يورو واليومين بـ 21 يورو وال3 أيام بـ 26 يورو، وده الموقع بتاعهم، https://en.gvb.nl/، وممكن تشتروا الكارت من المطار، هتلاقوا كوبونات بتتوزع عموما تخفيضات ممكن تحتاجوها وخرائط لأمستردام مجانا أكيد هتفيدكم.

 

متحف الشمع Madame Tussauds

يعني الروعة والخيال

https://www.madametussauds.com/amsterdam/en/

(بس انا مدخلتوش عشان دخلته في دولة تانية) وده عند الدام سكوير يعني مش هتمشي كتير، وطبعا لازم تروح البرت كب Albert Cuyp، تعمل شوبينج هناك وهتلاقي عرب كتير ومحلات عرب، مشي ممكن تاخد تقريبا نص ساعة من الدام سكوير، بالمترو 4 ناحية محطة RAI.

 

حديقة الحيوانات أرتيس Artis Royal Zoo

http://www.artis.nl/nl/language/visitors-information/

روعة، والتيكيت في حدود 20 يورو، وقريبة من الدام سكوير (مشي تقريبا اقل من نص ساعة)، ولو بالترام 14 ناحية Flevopark هتنزل Paleisstraat

حديقة الورود كيوكنهوف keukenhof

https://keukenhof.nl/en/

مش هتكلم عنها ولكن لو مروحتهاش يبقى انت مروحتش هولندا (الموضوع منتهي :D) على فكرة بتفتح من مارس لمايو فقط طول السنة، التيكيت في حدود 16 يورو تقريبا (معرفش الصراحة ايه حكاية رقم 16 معاهم :D)، معرفش بصراحة اوصف طريقها لكن بالعربية من الدام سكوير ممكن تاخد تقريبا ساعة.

 

حديقة فوندل بارك Vondelpark

ودي مشي تقريبا نص ساعة من الدام سكوير، ودي بالترام طريقها 2 ناحية Nieuw Sloten هتنزل في Leidseplein زحمة جدا وضخمة جدا وروعة وفيها عروض كتيرة جدا سواء مسرحية أو موسيقى أو حفلات.

 

الحي الصيني Nam Kee

تجربة مختلفة وغريبة جربوها، ومش بعيد عن الدام سكوير، مشي تقريبا 10 دقايق، وبالنسبة عموما للدام سكوير Dam Square، لو قعدت قدامه طول اليوم مش هتزهق هتلاقي طول الوقت وفي كل مكان فعاليات واحتفالات ومهرجانات 😀 (اللى عايز اقوله ان كلمة السر في امستردام هيا الدام سكوير)

 

وجنب الميدان شارع الدام راك damrak يعني المتعة ومش هتلاحق على الزحمة والفعاليات فيه ومليان محلات وكافيهات ومطاعم منها مصرية وتركية وأنواع كتير.

معلومة بقى..

شارع الدام راك مليان شركات سياحة بتعمل رحلات سياحية سواء داخل أمستردام أو خارجها

يعني زيارة متاحف أو كروز (رحلة نهرية حول أمستردام) ودي طبعا لازم تطلعها أو زيارة الحدائق أو مدن أخرى.

وأمستردام على فكرة مشهورة بالشوبينج والمحلات التجارية الكتيرة جدا وحتى بيع الأشياء المستعملة ودي أشهر أماكن الشوبينج (سواء غالية أو رخيصة):

Leidsstraat

Kalverstraat

Nieuwendijk

Museum

واحد هيقولي طب أنا كده زرت الدام سكوير وشوية متاحف وحديقة الحيوانات والورود والرحلة الكروز حول أمستردام (كدة كفاية وتمام؟) أقوله انت كدة كأنك مسافرتش هولندا أصلا 😀 😀 😀 اللى هقولكوا عليها دي لو مروحتوهاش يبقى ملهاش لازمة سفرية هولندا كلها.

 

لازم لازم لازم تطلعوا قرية عشان تزوروا الريف الهولندي (الريف الأوروبي) وطواحين الهواء (من علامات هولندا) ومصانع الجبن والقباقيب (أيوا قباقيب محدش يضحك :D)

Countryside and Windmills

في قرى كتير وفي شركات السياحة عندهم اختيارات.. وعلى فكرة لو انت بتحب المغامرة مع نفسك (اسأل واطلعها مع نفسك بالقطار بس هيطلع عينك :D)

في قريبة Volendam للصيد والأسماك

وفي قرية Marken

وفي قرية Zaanse Schans يعني سحر وجمال طواحين الهواء والريف الأوروبي ومصانع الجبنة (وممكن تدوق بس مش مسئول لو أغمى عليك من الجمال)، معرفش ليه القرية دي نفسيا كدة عاملة زي الهيروين تخليك تدمنها ومتسبهاش وفكرت والله إني أصفي كل شغلي وأجي أعيش فيها (تقريبا بيعملوا تنويم مغناطيسي للي بيروحها :D)، شفت بنات هناك في المزارع (كنت هعيط وربنا :D).

مع شركة السياحة الرحلة ممكن تكون في حدود من 40 إلى 50 يورو (أنا في كل حاجة بقولكم الأسعار عشان يكون عندكم خلفية عشان الميزانية وعشان تاخدوا بالكم هناك)، والتنقل عموما بين المدن في هولندا رائع وهتتمتع بمناظر الريف والأراضي الزراعية.

 

وفي الآخر لو لسة عندك يوم فاضي وعايز تروح مكان مختلف ممكن تسافر مدينة روتردام Rotterdam مدينة جميلة جدا جدا جدا جدا وفيها بيوت مبنية بأشكال هندسية غريبة جدا جدا.

بينها وبين أمستردام تقريبا ساعة ونص بالعربية.

رأيي الشخصي المتواضع الذي لاقيمة له في نظام السفرية عموما 😀

(هولندا مش أكتر من 5 أيام) أمستردام آخرها 3 أيام ممكن تعمل حسابك يوم في الدام سكوير والشوارع اللى حواليه وزيارة متحف أو اتنين وتعمل شوبينج أو براحتك واليوم التانى ممكن حديقة الحيوانات أرتيس أو حديقة الورود أو حديقة فوندل بارك وباقي اليوم طبعا برده تلف في الشوارع (عايزك تدن زي النحلة لحد ما رجلك متحسش بيها من كتر المشي :D) واليوم التالت رحلة سياحية محترمة مع أي شركة سياحة حول مدينة أمستردام بالباص والكروز واليوم الرابع تفضي نفسك بقى لرحلة الريف الأوروبي وطواحين الهواء ومصانع الجبنة.

ولو لسة قدامك وقت في هولندا ممكن تروح روتردام.. وطبعا مينفعش تسافر السفرية دي كلها عشان تقعد في هولندا وبس، لازم تعمل حسابك على ليلة تقضيها في بلجيكا.

 

في طبعا طرق كتير ممكن تسافر بيها داخل أوروبا سواء ب

Rayan Air

https://www.ryanair.com/gb/en/

أو

Easy Jet

https://www.easyjet.com/en

أو

بالقطار

ولو انت بتحب اللف الكتير وتستغل كل فرصة وعايز السفرية تكون اقتصادية وتوفر على قد ما تقدر ممكن برده تستخدم

Flix Bus

https://www.flixbus.com/

 

أخيرا

نصيحة للبنات: ابعدوا عن حي Red Light  وده جنب الدام سكوير Dam Square

 

نصيحة للشباب: ابعدوا عن الفنادق

Kerkstraat

Hotel Freeland

Amistad hotel

Golden Bear

Black Tulip

(ومحدش يسألنى ليه) اللهم بلغت اللهم فاشهد 😀 😀 😀

كلمة السر في هولندا (المشي ثم المشي ثم المشي)

كلمة السر في أي سفرية عموما (التغيير – التنوع – التجديد – المغامرة – الإكتشاف)

ومتستغربوش هتلاقوا المخدرات بتتباع عادي في أي سوبر ماركت وفي الكافيهات (مسموح ببيعها قانونيا)

وبكدة نكون انتهينا من رحلة دولة السحر والجمال (هولندا) وإن شاء الله اتكلم عن رحلات لدول تانية قريب.

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *