الرئيسية / أفريقيا / هشام البدري يكتب عن رحلته إلى تونس: يا حليلي ناي أبي حني

هشام البدري يكتب عن رحلته إلى تونس: يا حليلي ناي أبي حني

رحلة- هشام البدري:

أول ما دخلنا مطار القاهرة الدولي, زحمة جدا على سير الشنط في الأول وعدم نظام وهرجلة وبرجلة ولا كأنك في مولد, مرورًا باكتشاف إن بنك المطار لتحويل العملة اتقفل ومبقاش موجود, يعنى إذا انت مسافر وعامل حسابك تغير عملة من المطار.. هتلبس!.

شركة مصر للطيران.. مش هتكلم كتير لأن سمعتك سبقاكى, طيارة مترهلة ومتبهدلة ومهكعة ومكحكحة ومفككة من بعضها، ولما طلبنا من المضيف بطانية خلال الرحلة لأن الجو برد كان رده: “مفيش بطاطين بس هقولهم يوطوا التكييف شويه”!. اهتموا واصرفوا شوية على طيارات مصر للطيران لأن فعلا سمعتكم سبقاكم وريحتكم فايحة.

نرجع لموضوعنا الأساسي اللي هو تونس <3 مجرد دخولك المجال الجوى لتونس وانك تشوفها من الطيارة, المنظر باهى برشا, التخطيط الصح للأراضي, الجبال واللون الأخضر ولون البحر.. منظر يشرح القلب ويفتح نفسك 🙂

الجوازات اللي هي أصلا مفيهاش زحمة ولا تعقيدات ولا وشوش كئيبة مبوزة وتقريبا كل الموظفين مبتسمين في وشك وبعد ما تخلصهم وقبل ما تروح تجيب شنطك تلاقى بتوع شركة Orange واقفين بيدى لك خط PrePaid هدية على باسبورك والجدير بالذكر إن الشريحة ممكن تركب على أي نوع تليفون مهما كان نوعها Normal, Mini, Micro or even Nano

تطلع من المطار تلاقى في نظام لسواقين التاكسى مش زى عندنا تقريبا بتتشد من إيدك من شخص انت أصلا مش شايفه من زحمة الناس اللى واقفين يستنوا اللي جاي من السفر، ولا الزومبيز. في نظام بمعنى الكلمة.

تطلع على الطريق من المطار, طريق نظيف وواسع, شايف جبال وسحب وسماء نظيفة زرقا وخضرة حواليك في كل مكان, مش هكدب وأقول مفيش زبالة في البلد بس مقارنة باللى عندنا هنا تكاد لا تذكر.

الجو هناك الصبح أكتر من رائع مع نسمة هواء ساقعة جدا وفي عز الظهر فعلا حر ودرجة الحرارة أقصاها 33 فاعمل حسابك إنك هتشترى دبوزة ماء على الأقل وبالليل ممكن توصل لحد 20 أو 18 ومفيش رطوبة, بالليل شئ طبيعى انك ممكن تتغطى رغم انك في أغسطس. هناك فعلا بتتنفس هواء نقى بدون تلوث.

هنتكلم على الفسح:

أول حاجة تروحها في تونس هى سيدى بوسعيد, عبارة عن جبل, تحت في ميناء لليخوت وفي كافيهات وفوق كافيهات كتيرة برشا وباهية ياسر، غير إن المنظر من فوق لا يوصف, هتلاقي الباعة الجائلين زى عندنا في مصر بنفس التلزيق عشان يبيع لك حاجة، بس برضه في الشرطة عشان إذا حد تعدى حدوده يوقفوه أو إذا حد شنطته أو شنطتها اتسرقت في الزحمة يتجاب اللى سرقها.

ممكن تطلع لفوق عن طريق الدرج للقهوة العالية بس متعبة شوية ولما هتطلع فوق هتبقى قاعد وشايف كل الـ view تحت بالبحر كله قدامك والجبال والسفن اللى جايه من أوروبا. أول حاجة لازم تاكلها في سيدى بوسعيد هى (البمبلونى) مش هوصفها، بس نصيحة لازم تاكلها وادعيلى.

ممكن تسافر من تونس العاصمة للحمامات, سوسه أو نابل ودى مدن سياحية زى شرم الشيخ وقريبه مش بعيدة, تاخد ساعه بالكرهبة أو الـ Car (الكرهبه اللى هى العربيه والـ Car اللى هى الأتوبيس).

في حاجات جامدة تجيبها من الكيوسك (الكشك) بتاع الفواكه الجافة (المكسرات). هتشرب حاجة جيب Boga Cidre ودى معشوقتى والمفضلة بالنسبة لي حاجة كده زى شويبس كريم صودا بتاع زمان على أحلى أو Apla تفاح مش Normal نورمال (مش عادي).

تونس مشهورة بسوسة وجربة والحمامات كأماكن سياحية وشواطئ، لكن في برشا أماكن تانية أحلى وفاضية أكتر زى بنزرت, مهدية، غار الملح, سيدي على المكي, قليبيا اللي زرقان بحرها أكتر من المالديف, توزر, نابل برضه لون مية بحرها شفافة لدرجة انك شايف السمك الصغير حواليك, طبرقة وغيرهم.. ضروري تيجي هنا خصوصا في الصيف الجو تحفة طول الوقت.

التوانسه شعب مضياف لأقصى درجة, أشهد لهم بذلك وأبصم بالعشرة.

عادي جدا انك تلاقي وانت في التاكسي أغاني مصري أو وانت ماشي في السوق في منطقة باب بحر أو حتى محلات شارع الحبيب بورقيبة تلاقي المحلات مشغلة أغاني مصري وهنا تظهر أهمية الفن والأغاني المصرية لما تعرف إن شعب كامل مأثر فيه عادل إمام وعبد الحليم وانت محبوب ومفهوم بسبب ده, التوانسة عارفين كل حاجه عن مصر فاستعد لمناقشات سياسية فنيه ثقافية بحتة.

اعمل حسابك وانت في السوق في باب بحر انك تفاصل لأنك مش هتاخد الحاجة وهتشتري لأن صعب قوي حاجة متعجبكش، بس برضه ماتبقاش غلس في الفصال.

اتفرج على الآثار هناك, روح المسرح الروماني في تونس قرطاج, متحف Bardo أو سافر للجم واتفرج على المسرح الروماني (معلش بعيدة شوية, 3 ساعات تقريبًا بالكرهبة أو الـ Car) ممكن وانت في الحمامات تروح البرج القديم Le Fort المنظر من فوق ياسر برشا.

روح اقعد في كافيه في Lac de Tunis واستمتع بمنظر الميه قدامك وهدوء برشا والطيران التونسي بيعدي من فوقك عشان ينزل المطار.

أكتر الكلمات التونسية المستعملة: برشا وصحة: خلصت أكل؟ صحة صحو, عملت حاجة باهية (حلوة) لنفسك؟ صحة عليك, عملت حاجة باهيه ليهم؟ يعطيك الصحة.

عادى جدا تيجي تطلع من المطعم وحد قدامك متعرفهوش تلاقيه بيقولك صحه وإذا الدنيا بالليل تلاقيه بيقولك تصبح على خير, وإذا حد خبط فيك من غير قصد تلاقيه يطبطب على كتفك ويقولك سامحنى.

نصيحة أخوية, إذا راكب مع سواق تاكسي إوعى تولع سيجارة لأنك كده ممكن تضره وتغرمه 150 دينار لمجرد انك عايز تشرب سيجارة مع العلم إن هناك مينفعش توقف تاكسي وتقول له يوصلك مكان ويقولك لا.

هناك التاكسي أنواعه Passat, Jetta, Polo, Golf, Peugeot, Citroen وكله آخر موديل ومش محتاج أتكلم عن الكراهب الخصوصي بسم الله ما شاء الله اللهم زد وبارك جايه من بلدها بكيسها مش زي عندنا المستورد بيفككها قبل ما تنزل السوق.

هناك ممكن تركب القطر أو المترو “فوق الأرض” أو الـ Train (كلهم مكيفين) وباهيين برشا، بس دير بالك إذا هتركب الـ TJM لأن ممكن إذا معاك شنطة في إيدك أو على كتفك أو حد لابس سلسله تتشد منك، الـ TJM كيف كيف المترو بس درجة أقل وبيعدي على مناطق ساحلية وسياحية في تونس زي سيدي بوسعيد، حلق الواد، قرطاج، والجدير بالذكر إن أكبر وأطول زحمة كراهب ممكن تقف فيها هتكون ٣ دقايق وده اسمه في وقت الذروة وخروج الموظفين في وسط تونس.

أكتر الأكلات التونسية هتلاقي فيها (عضم) البيض و(التن) التونة وطبعا (الهريسة) الشطة التونسي, لازم وانت في تونس تاكل (لبلابى, فريكاسيه, بمبلونى, ملاوى, بريك, طاجين, كسكسى تونسى والملوخيه التونسية اللي بتتعمل في 6 أو 7 ساعات, نواصر وكسكروت تونسى معشعش) وطبعا المشروبين الأساسيين في تونس هم Boga Cidre والـ Citronade الزوز المحببين إلى قلبي.

وانت مسافر من تونس راجع لبلدك مصر لحد آخر موظف أو موظفة تونسية بتلاقيهم مبتسمين في وشك ويقولك صحة صحة إذا عجبه لبسك خصوصا ذا لابس لبس تونسى تقليدى وبعد كده تصطدم بالسحنة المصري في الطيارة وبوز الضب اللى ممدود شبرين في الضيافة والسحابة السودا وشغل المخبرين والسحنة العكرة في مطار القاهرة, تندم أشد الندم إن إجازتك خلصت وانك رجعت.

الحاجه الوحيده اللي افتقدتها في مصر هي الشطافة. أنصح بشدة السفر لتونس، هاتتفرهض (تتفسح) وأموركم كلها هتكون مريقله ومن كتر جمال الطبيعة هناك في كل مكان هتقول “يا حليلي ناي أبي حني” 🙂

تونس.. صدق من سماك تونس الخضراء وبسلامة تونس وأهلي في تونس وأهل تونس كلها وإن شاء الله نتقابلوا مرة أخرى.

أنصحك أيضًا بقراءة:

بوابة السياحة والسفر إلى تونس

السياحة في تونس : أهم الاماكن السياحية في عاصمة الياسمين ونسور قرطاج

20 معلومة لازم تعرفها عن تونس: عنوان عادل إمام مهم

أحمد سمير يكتب رحلة السياحة في تونس : الاجابة تونس الحب برجالها ونسائها

الاماكن السياحية في تونس : دليلك السياحي الشامل لأجمل 6 مدن تونسية

شاهد أيضاً

معالم مصر

معالم مصر : تعرف على أشهر وأجمل الوجهات السياحية في مصر أم الدنيا

معالم مصر | الرحالة | مصر أم الدنيا ومهد الحضارة وأكبر دولة تضم العديد من الآثار …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *