fbpx
الرئيسية / آسيا / هشام أحمد يكتب رحلته إلى هونج كونج: مغامرة في قلب المحيط

هشام أحمد يكتب رحلته إلى هونج كونج: مغامرة في قلب المحيط

رحلة- هشام أحمد:

مدينة الأوشن بارك في هونج كونج، أنا كنت اتكلمت عنها كده سريعا فى موضوع الحاجات اللى لازم تتعمل فى هونج كونج، بس اكتشفت إننا ما ادينهاش حقها، دى لازم لها تقرير مفصل لوحدها.

هى فعلا مدينة من كبر مساحتها ومن كثرة الحاجات الرهيبة اللى ممكن تتعمل فيها ومن كمية تنوع الأنشطة اللى موجودة فى البارك. يعنى لو ناوى تروح لازم تبقى واقف على الباب بتاعها وهى بتفتح عشان تلحق كمية اللعب والحيوانات والشقلبة اللى هناك وموعدكش إنك تلحق تخلصها.

أول غلطة بيقع فيها الناس وهما رايحين انهم مبيبقوش عارفين إن الأوشن بارك بتقفل الساعة 7 مساء، وبياخدوا راحتهم فى الصحيان فى اليوم اللى رايحين فيه، فبيوصلوا على 1 أو 2 الظهر ولو ده حصل إنسى إنك تلحق تلف نصها حتى، فلازم فى اليوم ده تروح بدرى جدا ودى أهم نصيحة لأى حد رايح هناك.

ثانى نصيحة إبعد كل البعد عن الأجازات فى اليوم اللى ناوى تزور فيه البارك، يعنى السبت والأحد بلاش، وبلاش برضو أى عيد رسمى عندهم، لأنك هتروح تلاقى هونج كونج كلها هناك وهتقف على كل لعبة طابور بالساعة والساعة ونص ومش هتلحق تخلص حاجة من اللى ناوى تعملها. احجز فى نص الأسبوع أحسن بعيدا عن الأجازات عشان تعرف تستمتع بيها كويس.

أوشن بارك متقسمة 8 مناطق رئيسية فى مكانين منفصلين عن بعض بجبل عالى وبتعدى من المكان اللأول للمكان للثانى بتليفريك أو بقطر اسمه Ocean Express فحاول تروح بالتليفريك وترجع بالقطر عشان تبقى جربت الاثنين.

تجربة التليفريك فى حد ذاتها ممتعة جدا لأن المنظر خيال والتليفريك ماشى بيعدى فوق الجبل اللى متغطى بأشجار خضرة وبتبقى شايف المحيط والأشجار على شمالك وشايف الأوشن بارك كلها تحتك. القطر كمان الديزاين بتاعه شكله حلو أوى وفيه كمية ديكوراشن عاملينه فيه جامدة برضه وعاملين شاشة فى سقف القطر بيعرضوا عليها حاجات بتسليك طول مدة الرحلة اللى بستغرق حوالى 8 دقائق.

نيجى بقى للمناطق الرئيسة هناك وهم :Aqua City & Amazing Asian Animals &
Thrill Mountain & Adventure Land & Marine World & Polar Adventure & Rain forest & Whiskers Harbour &
المكان الأولانى قبل الجبل بعد المدخل على طول فيه الثلاث مناطق دول: Aqua City & Amazing Asian Animals & Whiskers Harbour  والمكان الثانى بعد ما تعدى الجبل بالقطر أو التلفريك زى ما قولت فيه بقية المناطق.

المنطقة دى بعد المدخل عدل ودى فيها حاجات كتير تتعمل زى :Aqua City

.Grand Aquarium : ده بقى حوض سمك كبير معمول بحيث انك تشوف السمك أو الحيوانات البحرية عموما من ارتفاعات مختلفة لنفس الحوض، يعنى هتشوف الحوض من فوق بعد كده تنزل دور فهتشوف نص الحوض بعد كده آخر دور تشوف منه قاع الحوض. الغرض منه انك تشوف الحيوانات البحرية من كل الزوايا لأن فيه حيوانات زى ال Sea Seal بتقعد تتنطط طالعة نازلة من أول الحوض لآخره فيبقى شكلها حلو أوى إنك تشوفها من آخر دور فى الحوض وهى عمالة طالعة نازلة.

حاطين كمان قطع زجاج على شكل  عدس مكبر فى الحوض ممكن تلزق عينك فيه تشوف الحوض بالسمك اللى فيه بوضوح. في كمان اختراع هايل عند كل حوض عبارة عن شاشة تاتش بتستخدمها إنك تعرف كل أنواع السمك اللى موجودة فى كل حوض بكل حاجة عنه زى طوله وزنه موطنه الأصلى.

فيه كمان شاشة عاملنها هناك بتمشى إيدك على جسم السمكة زى الاكس راى يجيبلك منظر تشريحيى للأجهزة المختلفة فى جسم السمكة زى: الجهاز الهضمى والتنفسى والزعانف بتاعتها بتتحرك إزاي، اختراع هايل!.

في أجزاء كمان عاملنها على شكل أنفاق زجاج بتعدى فيها بيبقى السمك فوقك ويمينك وشمالك…. حاجة جامدة جدا وديزين عالى قوى. كمية و أنواع سمك مختلفة ومتوعة بشكل يفوق الخيال زى : Napoleon Fish &Sharks Stingray

من أجمل الحاجات هناك ودى عبارة عن نافورة راقصة جواها بروجكتور بيعكس اللى Aqua City Lagoon.
بيعرضوا على الميه اللى بتتطلع من النافورة بأشكال معينة  لقصة بيحكيها لك مع الموسيقى وكمية مؤثرات حلوة قوى بس دى بتشتغل الساعة 6.30 قبل البارك ما تقفل بنص ساعة، اوعى تفوتك لأنها من أحلى الحاجات هناك.

Old Hong Kong : ده مصغر لهونج كونج أيام الإحتلال الانجليزى وهيقابلك هناك كمية ديكور هتحس إنك دخلت فيلم فى الستينات وكابينة التليفون زى اللى موجوة فى لندن والمطاعم زمان والأسواق كان شكلها عامل إزاى.

Adventures in Australia: بتشوف الحيوانات اللى موجودة فى استراليا هناك زى حيوان الكوالا والكونغر.

فى كل منطقة من دول هتلاقى مطاعم و أماكن تشترى منها حاجات كتذكار من المكان نصيحة الحاجات هناك غالية شوية ممكن تشترى من برا أرخص.

المكان بجد وهم ومتنوع بشكل رهيب يعنى دى بس كدا أول منطقة، أكواريوم ضخم ومليان أسماك وحيوانات بحرية مختلفة بعد كدا تشوف حيوانات من أستراليا بعد كده يدخلك مصغر لهونج كونج تطلع منه تخش على النافورة الراقصة بعد كده تجربة التليفريك وقطر كمان، بجد اللى صمم المكان ده عبقرى كل ده ولسه مدخلناش فى الألعاب وكل ده لسه فى أول منطقة بس.. مش بقولك مدينة .

لقراءة الموضوع على مدونة هشام أحمد يرجى الضغط هنا: http://travelhacker2016.blogspot.com.eg

 

شاهد أيضاً

السياحة في أملج

السياحة في أملج السعودية : دليلك لأهم الأنشطة والمعالم السياحية

السياحة في أملج | الرحالة |   يقولون إن مكة المكرمة و المدينة المنورة هما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *