الرئيسية / آسيا / شيماء علي تكتب رحلتها إلى لبنان: هنا سويسرا الشرق

شيماء علي تكتب رحلتها إلى لبنان: هنا سويسرا الشرق

رحلة- شيماء علي:

كنت في لبنان في 2011-2012 فغالبا ممكن يكون في إجراءات كتير اتغيرت. زوجي كان عنده شغل هناك وكنت بروح له زيارات،  فممكن في تفاصيل كتير متكونش عندي بس بإذن الله أفيدكم على قد ما أقدر.

*لبنان مش محتاجة تأشيرة بس يبقى معاك حجز أوتيل و2000$ وانت في المطار وبس كده. بتاخد من المطار فيزا شهر تقريبا، ممكن تجددها وانت هناك، ولو كسرتها بتدفع رسوم وانت خارج من المطار (معلومة صغيرة الرسوم في المطار لازم تتدفع بالليرة اللبناني لأني وقتها مكانش معايا غير دولار والطيارة كانت هتفوتني علشان مكنتش عارفة أغير).

*العملة هناك ليرة لبناني بس بيتعاملوا بالدولار عادي يعني ممكن تدفع دولار تاخد الباقي جزء دولار وجزء ليرة.

*البلد مش غالية قوي بس مش رخيصة.

*طبعا الأكل اللبناني جميل وأسعاره حلوة، بس المطاعم الأمريكية هناك أسعارها غالية وكميات الأكل قليلة، وعموما المنيوهات هناك محدودة جدًا (كنت مفتقدة منيو سبكترا اللي بيبقى 20 صفحة ده).

مطعم بربر من أشهر مطاعم الأكل اللبناني أكله رائع وسعره رخيص، والمحلات الصغيرة في الشوارع الجانبية فيها أجمل مناقيش ولحم بعجين الكافيهات بتبقى زحمة جدا والأكل فيها برضه، غالي وكمياته قليلة،  بس مفيش أحلى من إنك تاخد الترويقة (الفطار باللبناني) على كافيه من كافيهات الكورنيش الصبح على البحر  وفي الشارع بالليل عربيات الذرة بس ذرة مسلوق مش مشوي زينا متعة تانية.

*وسط البلد هناك حي الحمرا والروشة على الكورنيش وهناك صخرة الروشة من معالم بيروت معرفش ليه بس هي جميلة برضه.

*البنزين هناك مش مدعم فالتاكسيات غالية جدا الأفضل تتحرك بليموزين ده بيبقى عربيات تاكسي برضه بس وانت بتوقفها تسأل تاكسي ولا ليموزين الفرق إن التاكسي مش بيركب حد معاك ويوصلك للمكان اللي انت تقول عليه وحسابه غالي، الليموزين بيحاسبك بالفرد (تقريبا كان 2000 ليرة -لما كنت هناك كان الـ 1000 ليرة بيعادل 44 جنيه مش عارفة دلوقتي كام)، والليموزين ممكن يركب حد معاك عادي  في مواصلات عامة بس قليلة شوية.

*أفضل وقت لزيارة لبنان -على ما أتذكر- شهر 12-1 وأول فبراير على آخر فبراير التلج بيبدأ يسيح وفي أماكن مش بتنفع زيارتها.

*الشعب البناني شعب جميل قوي وودود ومرح، التعامل معاهم كان ممتع فعلا.

*لو مش هتسافر من هنا تبع شركة سياحة عاملة برنامج كامل بالمزارات يبقى هناك تحجز مع شركة سياحة داخلية الرحلات اللي انت عايزها لأنها هتبقى أوفر من إنك تطلع مع نفسك وبتبقى منظمة والجو الجماعي ممتع جدا وغالبا بتبقى الرحلة شاملة وجبة غدا لبناني جميلة.

*أجمل الرحلات هناك فاريا جبال التلج دي قمة المتعة والجمال وأحلى صور وفوق الجو بيبقى غريب شمس قوية جد بسبب انعكاس التلج (لازم صن بلوك وإلا هترجع كأنك راجع من رأس البر) وفي الباص على الطريق دفا وفوق هوا ساقع تلج فلازم سويترات وكوفيات وجوانتيهات وفوق ممكن تأجر معدات الـ  skating

*طبعا مينفعش حد يروح بيروت وميركبش التليفريك، التليفريك بيتركب من منطقة حريصا، والمنظر من فوق رائع.

*مغارة جعيتا، متعة لا مثيل لها تتجلى فيها إبداع الخالق عز وجل، بنتحرك فيها بقارب في المياه، والتصوير ممنوع تماما.

*متحف المشاهير، من الأماكن الجميلة جدا، متحف بيضم مشاهير العالم بتماثيل من الشمع وفي منهم تماثيل بتتكلم وتتحرك  زي تمثال فيروز بتغني مثلا.

*الشوبينج هناك مش واو ومفيش حاجة مميزة قوي ممكن نجيبها من هناك بس ممكن نجيب تذكارات خشب أرز من فاريا  بتختار الشكل اللي يعجبك ويتحفر عليه أسامي مثلا.

يارب يكون التقرير البسيط ده فيه أي إفادة وتحت أمركم في أي استفسار

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *