الرئيسية / أفريقيا / رحالة مغربية تكتب دليلًا سياحيًا لبلادها: المغرب جميل تعالوا زورونا

رحالة مغربية تكتب دليلًا سياحيًا لبلادها: المغرب جميل تعالوا زورونا

كتبت- إيمي طاهري:

آي نعم أنا لفيت أماكن كتير حلوة، بس بلدي كان أول البلاد اللي لفتها كويس. المغرب، بلدي الجميل العظيم، بلدي اللي مهما حصل بفضل أحبه ومتمسكة بكل ذرة تراب فيه، بحبه جدا ونفسي الدنيا كلها تحبه، من يوم ما ابتديت أكون نشيطة على الإنترنت وأنا كل همي إن الناس تتعرف على بلدي، بمميزاته وعيوبه.

كان دايما نفسي أتكلم عن المغرب عن طريق الصور، هوايتي المفضلة، حببت ناس كتير فيه وده بشهادتهم، كل الناس غالبا بتحب تسافر دول وأماكن تانية وأنا منهم، بس قررت إني قبل ما أسافر أي أماكن تانية أزور بلدي كويس، من شمالها لجنوبها لشرقها وغربها، نوعا ما لفيت أماكن كثيرة.

عايزة أقول لكم ان الفيزا للمغرب مش صعبة يعني المهم يكون ليك مهنة وورقك تمام بالكتير أسبوعين وبتاخد الفيزا، المغرب مكان آمن جدا وده بشهادة كل اللي زاره.

تقريبا السفر من مصر مكلف شوية خصوصا تذكرة الطيران، غالبا السعر ما بين 3500 لـ 4500 جنيه مصري، التكاليف على حسب كل واحد بقى، بس مثلا من ٦٠0٠ لـ ٨٠٠٠ جنيه مصري ممكن تفسحك معظم وأهم الأماكن في المغرب بالأوتيلات أو الهوستل أو أماكن موجودة عندنا اسمها “رياض” دي عبارة عن حاجة شبه أوتيل بس ستايل مغربي بتكون أرخص نوعا ما.

مدينة فاس:

بنسميها المدينة العلمية للمغرب، عشان معروفة بأقدم جامعة في التاريخ” القرويين” فاس مدينة عريقة من أهم مدن المغرب، أجمل ما فيها المدينة القديمة، الجوامع والشوارع.

مدينة إفران:

دي بعيدة عن فاس بحوالي نص ساعة، مدينة جبلية ساحرة، بنسميها سويسرا المغرب، من أنظف وأجمل وأصغر مدن المغرب، على الطراز الأوروبي، وجهة لكل حد بيعشق التلج في الشتا، وفي الصيف كمان للي مش بيحب الحر، حواليها جبال وغابات.

مدينة الرباط:

عاصمة المغرب أهم معالم المدينة (صومعة حسان)، (قصبة الوداية) والحارات باللون الأزرق وأحسن مكان ممكن تشرب فيه شاي مغربي” أتاي”، ضريح محمد الخامس والحدائق الأندلسية.

 

مدينة الدار البيضاء Casablanca:

العاصمة الاقتصادية للمغرب وواحدة من أكبر المدن في أفريقيا، كازا مدينة كبيرة جدا، زحمة جدا بس جميلة، هي خليط كده متناقض، ساعات تحبها وساعات تزهق من رتم الحياة السريع فيها. أهم معالمها هو مسجد الحسن التاني المبني فوق المحيط الأطلسي، هو يعتبر سابع أكبر مسجد في العالم، كازابلانكا مهما زرتها هتلاقي نفسك بتكتشف حاجات جديدة فيها كل مرة، هتحب شوارعها القديمة والحديثة، هتحب المولات والأسواق القديمة، وأشهر سوق قديم هو “سوق الحبوس” هتحب المطاعم الفخمة والمطاعم الصغيرة الحلوة اللي ممكن تلاقيها في الأحياء الشعبية.

مدينة مراكش الحمراء:

وده عشان لون أغلب البيوت فيها أحمر، مراكش من أنظف مدن المغرب وأقلهم تلوث، مراكش من أكتر الأماكن اللي بيحبها السياح، أشهر الأماكن فيها ساحة جامع الفناء، بالنهار بتكون مكان لعروض متنوعة، أفاعي وقرود وناس كتيرة كل واحد بيعرض مواهبه، سوق شعبي ممكن تجيب منه حاجات مغربية، زي الصابون والجلابية المغربية “جلبية” وبالليل نفس الساحة بتتحول لمطاعم في الهواء الطلق، ممكن تاكل فيها أحلى “طنجية مراكشية” الأكلة دي عبارة عن لحمة مطبوخة في قدر من الفخار، مراكش مشهورة بالأكلة دي.

مشهورة برضه المدينة دي بالقصور القديمة والأسوار وحاجات كتيرة حلو الواحد يكتشفها والمميز في مراكش كمان إن حواليها قرى جميلة جدا وجبال الأطلس، القرى اللي حوالين مراكش أغلبها صغيرة وطبيعتها تجنن أنا نزلت صور لقرية اسمها “ويرجان” يمكن أكتر من أكتر الأماكن هدوء في الدنيا، لو عاوز فعلا تنسى أي دوشة في الحياة أنصح اللي جاي مراكش يروح يريح دماغه في المكان ده.

مدينة الصَويرة:

مدينة جنوب المغرب وبعيدة عن مراكش بحوالي ساعتين، مدينة ساحلية جميلة على المحيط الأطلسي، ومن أقدم أقدم المدن المغربية وليها تاريخ عريق وفيها أجمل الأسوار والقلاع، أهمها أسوار “صقالة” وميناء صقالة و(باب البحر) هو أول باب يدخلك كل ما ذكر سابقا.

كل المدن اللي اتكلمت عنها دي من الغرب وانت نازل الجنوب

 

رحلة لصحراء مرزوقة:

بعد المدن في رحلات جميلة جدا للصحراء جنوب شرق المغرب الرحلة دي من مراكش لصحراء مرزوقة بتتكلف ما بين 80 لحد ١١٠ يورو، هدخل معاكم في تفاصيل أسعار وتكاليف في موضوعات ثانية، عشان هدفي من البوست ده تشوفوا جمال المغرب وخصوصا إن بنات كتير بيخافوا ييجوا عندنا لوحدهم مع إن الفيزا للبنات أسهل بكتير من الولاد.

نكمل الرحلة، الرحلة مدتها ٣أيام رايح جاي، وعشان توصل مرزوقة لازم تعدي على مناطق تحفة، أهمها قصبة ايت بن حدو مرورا من طريق جبلية علوها تقريبا 2200متر اسمها تيشكا المهم القصبة دي من أهم الأماكن السنيمائية في المغرب وفي العالم واتصور فيها أفلام عالمية مهمة جدا من بينها “لورانس العرب” بتاع عمر الشريف.

و فيلم the Mummy

Prince of Persia

Gladiator

Alexander

وأفلام كتيرة جدا.

البيوت فيها من الطين، بس شكلها حلو قوي ومريحة جدا.

بعد القصبة نروح كمان لمدينة مهمة سينمائيا اسمها ورزازات وفيها الجامعة الأكبر للسينما في المغرب واستوديوهات تصوير ومتاحف مبهرة الصراحة أنا انبسطت جدا فيها، الطريق كله بجد ممتع من مراكش لحد ما نوصل الصحراء.

نيجي للصحراء الساحرة بكل المقاييس، من لون الرمل، لشكل كل حاجة حواليك، أوتيلات وخيم كل حاجة معمولة بطراز مغربي بربري جميل جدا من الأوتيل للخيم الرحلة بتكون على الجمال، حوالي ساعة ونص واللي مش بيقدر بيروح بعربيات الصحراء الممتعة تحس انك جوا البحر وبتغطس وتطلع تاني، رحلة زي دي ممكن تنسيك هم السنين، خصوصا بعد الفرجة على النجوم بالليل والأكل والسهرة الحلوة.

لسه كتير يتحكي عن المغرب بس حاليا اختصرت أهم المدن السياحية، ولسه في موضوع تاني عن مدن في شمال المغرب هتكلم عنه عشان الشمال يجنن.

يلا تعالو زورونا :)، هتنبسطو ومش هتندمو أبدا، كل أصحابي اللي زاوا المغرب قالوا إنه بلد بيجمع بين الحضارة الأوروبية والعربية وكل اللي رجع بلده رجع بذكريات حلوة قوي.

شاهد أيضاً

الاسكندرية : دليلك الشامل لزيارة عروس المتوسط: معالم ومطاعم ومولات

الاسكندرية | الرحالة |   تقع الإسكندرية على ساحل البحر الأبيض المتوسط، و تسمى لؤلؤة …