fbpx
الرئيسية / آسيا / السيد مصطفى يكتب رحلته إلى فيتنام: ازاي تطلع التأشيرة وتتعامل في المطار

السيد مصطفى يكتب رحلته إلى فيتنام: ازاي تطلع التأشيرة وتتعامل في المطار

رحلة- السيد مصطفى:

سايجون أو مدينة هوشي منة، مدينة الكفاح ورمز المقاومة للشعب الفيتنامي على مدار 17 سنة من الحرب الأمريكية على فيتنام. مدينة ليه طعم فرنسي في المعمار والتخطيط القديم، على الرغم من السنين والحرب لسه موجود وملحوظ كمان، تحس انك ماشي في وسط البلد في القاهرة وميدان طلعت حرب وسليمان باشا، نفس المتاهة والشوارع اللي ذات الشكل الدائري.

اسمها سايجون وكانت عاصمة لجمهورية فيتنام الجنوبية، بعد انسحاب الأمريكان من جنوب فيتنام وتقدم القوات الشمالية ودخولها لسايجون حولوا اسمها إلى مدينة هوشي منه، ودا مسبب مشاكل، لما تيجي تبحث عنها على محرك الجوجل، باسم سايجون هتطلع ليك ولو بحثت باسم هوشي منه حتطلع ليك نفس المدينة، حاجة تلخبط لو متعرفش تاريخها.

أول حاجة الفيزا لفيتنام، الفيزا لفيتنام محتاجة موافقة حكومية قبل الوصول ودي بتقدم عليها عن طريق النت أولا بتبحث على الشركات اللي بتعمل الموافقة الأمنية دي وتبعت بياناتك وهم بيخلصوا لك الموافقة، هتلاقي مواقع لشركات بتعملها بـ25 دولار وهتلاقي شركات بتعملها بـ100 دولار، فاختار شركة بعد ما تقرأ تعليقات الناس عليها.

هيبعتوا لك إيميل لازم تطبعه فيه أسامي كل الناس اللي اتوافق عليها اليوم ده بحد أقصى 25 فرد، ولازم يكون معاك صورتين وهتلم كل الورق ده وتخليه معاك، شركات الطيران مش هتخليك تركب الطيارة لو معاكش الموافقة الفيتنامية دي وكمان طلب مرفق فيه بياناتك هتلاقيه في الإيميل بتاع الموافقة.

بعد ما توصل فيتنام هتروح على الشباك بتاع الفيزا وتقدم كل الورق ده وتقعد بتاع ساعة وهيندهوا على اسمك تروح تدفع 25 دولار أو على حسب جنسيتك وعلى حسب انت طالب مدة إقامة قد إيه وعلى حسب مرات الدخول اللي انت طالبها.

بعدما تاخد الفيزا بتعدي على الجوازات بيديك إقامة لمدة شهر فقط لا غير، التاكسي من المطار للفندق بيكون في حدود 9 دولار بحد أدنى لحد 15 دولار بحد أقصى على حسب انت رايح فين في سايجون.

معظم الشباب بيكونوا رايحين منطقة الباك باك وده اسمها الأكتر شهرة من اسمها الفيتنامي بين تان علشان فيها ناس شباب كتير بيقعدوا هناك وفي فنادقها الرخيصة وفي المنطق دي بتلاقي محلات أكل كتير رخيصة وكمان فنادق رخيصة بس نظيفة جدا.

نكمل المرة الجايه

شاهد أيضاً

السياحة في أملج

السياحة في أملج السعودية : دليلك لأهم الأنشطة والمعالم السياحية

السياحة في أملج | الرحالة |   يقولون إن مكة المكرمة و المدينة المنورة هما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *