الرئيسية / تقارير مميزة / أحمد مبارك يجيبك على سؤال: إيه أحسن كاميرا في السفر؟

أحمد مبارك يجيبك على سؤال: إيه أحسن كاميرا في السفر؟

تجربة- أحمد مبارك:

إيه أحسن كاميرا في السفر؟،  السؤال ده سؤال مهم، لأن كل شخص بيهتم انه يوثق ويصور رحلاته ولحظاته المميزة مع الناس اللي بيحبهم، ولذلك السؤال ده بيتسأل باستمرار، لكن في الحقيقة هو ملوش إجابة محددة أو تقتصر على نوع أو موديل بعينه ولكن تختلف من شخص لآخر، وقبل ما تاخد القرار اسأل نفسك شوية أسئلة:
1) ايه الهدف من التصوير؟
2)ميزانيتك كام؟
3) جودة الصورة مهمة بالنسبة لك لأنهي حد؟
4) حجم الكاميرا والمعدات وسهولة التنقل مدى أهميته بالنسبة لك؟

مهم تكون عارف انت عايز تصور ايه.. هل عايز تصور طبيعة؟ ولا تصور أشخاص؟ ولا عايز تاخد سيلفيهات؟ هل انت عايز الكاميرا توثق سفرك وخلاص بجودة معقولة وجميلة؟ ولا انت مهم بالنسبة لك جودة الصور والزوايا؟ هل انت مهتم ان الصور تخرج بطريقه مثلى تعرف تعدلها على برامج بعد التصوير؟ هل هتحتاج تغير عدسات ولا مش مهم.. العدسات غالية جدا جدا وساعات أغلى من الكاميرا نفسها.. ممكن توفر لو انت عارف تجاوب على السؤال بدقة.

طب هل اجيب كاميرا بروفيشنال؟
الكاميرات أنواعها كتيره جدا والكاميرات المعروفة بالبروفيشال أو الـ DSLRR بالذات ثقيلة وتحتاج عدسات وأدوات تنظيف وشنطة معينة تقيلة وتهمة على ضهرك جنب شنطة هدومك لأنها مش بتشيل غير الكاميرا واحتياجاتها بس وساعات ترايبود، فلو انت مش مهتم بالتصوير كتصوير بحد ذاته فانت بتعسف نفسك لأن الموضوع متعب فعلا.

ممكن تكون الناس مش بتلاحظ النقطة دي مع انها مهمة جدا والسفر محتاج خفة وسهولة في الحركة، لما تشيل شنطة فيها معدات DSLR هتكون عايز ترمي الشنطة خاصة وانت طالع جبال أو تعمل تريكنج في أي مكان، والشيء الوحيد اللي يخليك تعمل كده انك تكون هاوي للتصوير وواخده بجدية جدا ومستعد تتحمل التعب.

بالإضافة إلى ان الكاميرات البروفيشنال وسيمي بروفيشنال مش سهلة الاستخدام و تحتاج دراسة علم التصوير وإلا فانت كأنك بتدفع فلوس كتير في مرسيدس وتستخدمها كـ 128 ومحتاجة تدريب وممكن تبوظ صور كتير في البداية لأنك مش عارف تستخدمها وتتكدر في رحلتك.. فانت حدد الأول احتياجاتك واكتبها.
** طيب إيه أنواع الكاميرات اللي ممكن اشتريها؟
ممكن نبدأ بفيديوهين عن أنواع الكاميرات بحيث تختار نوع الكاميرا وبعد ما تختاره ممكن تحدد الموديل بقليل من البحث:
1)فيديو عن أنسب أنواع الكاميرات بالسفر وهوا رائع جدا ويغني عن الكثير من الشرح:
https://www.youtube.com/watch?v=8TnrtEzAPcc
وده فيديو ليفل أعلى واكثر تفصيلا وبيتحدث عن الأنواع بشكل عام:..
https://www.youtube.com/watch?v=LsA9tSqJA_U
طيب الإجابة عن السؤال لو أنا عايز حاجة كويسة تقضي الغرض وخفيفة بجودة معقولة؟
ممكن أرشح لك أحد الأنواع دي:
Point & shoot / Bridge camera / Action camera
وكمثال:
**انا شخصيا لما بحب استخدم حاجه خفيفة باخد كاميرا قد كف الإيد كانون point & shoott  بحطها في جيبي وبطلع أجري، وهتديك كواليتي كويسة.
** ولما بكون في مود تصوير فانا باستخدم dslr نيكون بتديك جودة زي دي:
https://500px.com/ahmedmmubarak
ولكن بيصاحبها معدات وعدسات وترايبود في بعض الأحيان
الخلاصة:
جمع احتياجاتك بالظبط واشتري كاميرا توافق الاحتياجات دي لأن الموضوع نسبي بين السعر والحجم والجودة والتوافر وسهولة الاستخدام. وكل ما تحدد أفضل كل ما تكون قادر على التوفير أكثر والاستمتاع أفضل.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *