الرئيسية / تقارير مميزة / 9 نصائح لاختيار أفضل فندق أثناء السفر: قارن سعره على أكثر من موقع

9 نصائح لاختيار أفضل فندق أثناء السفر: قارن سعره على أكثر من موقع

تجربة- هشام أحمد:
السؤال الأشهر اللى بسمعه لما حد بيسأل عن أى بلد بيخطط يسافرها، هى البلد دى الإقامة فيها غالية ولا رخيصة؟، مفيش حاجة اسمها بلد رخيصة وبلد غالية فى الإقامة عموما، فى حاجة اسمها انت ناوى تنزل فين؟.. يعنى إيه؟.
يعنى والله لو حضرتك بتدور فى هوستل وجست هاوس وفنادق نجمتين فى أنضف الأماكن فى العالم هتلاقى حاجات معقولة.
لكن لو بتدور فى فنادق أربع وخمس نجوم أكيد هتبقى غالية، إذا كان هى أصلا فى مصر غالية مش عارف ليه الناس بستغرب لما تلاقيها بره غالية، عشان حضرتك بتدور فى المكان الغلط.
يعنى من الآخر حضرتك إيه متطلباتك من مكان الإقامه غير مكان هتنام فيه وده طبيعى فى بلد أول مره تزورها، اكيد مش قاطع المسافة دى كلها عشان جاى تقعد فى الفندق وتتفرج على فخامته، لو مسافر كل ده عشان تقعد فى الفندق يبقى انت عندك مشكلة.
ومش معنى كده برضه انك تقعد فى مكان مش نضيف، في هوستلات وفنادق سعرها قليل برضه بس نضيفة.
خلينا نخش فى الموضوع، هو السؤال المهم والصح اللى يتسأل أحجز من أي موقع؟، هو ممكن الفندق الواحد يبقى موجود على كذا موقع بأسعار مختلفة؟.. أيون.
عشان كده بقى ركز معايا، فيه حاجة أى حد بيحجز لازم يكون عارفها اللى هىHotel Compare System. وهعرف منين بقى أرخص سعر للفندق موجود فى أي موقع؟ هو ده بقى اللى هكلمك عنه، طيب خلينا نمشى خطوات مع بعض كده.
1.مبدئيا كده هخش على موقع معروف زى بوكينج وهختار بلد الإقامة والتواريخ اللى هكون فيها هناك.
2.فيه حاجه على اليمين كدا مهمه قوي وبتوفر بحث كتير قوي وناس كتير مش واخده بالها منها اسمها فيلتر، دي لزمتها إيه بقى؟.
دى بقى ممكن أتحكم فى نوع السيرش اللى الموقع هيعمله، زى إنى أختار إن الموقع يعمل سيرش مثلا على هوستل بس أو هوستل وفنادق نجمتين أو ثلاثة وفي حاجة أحلى كمان اسمها Price Range يعنى ممكن تحدد للموقع انت عايز تدور على فنادق بكام فى الليلة وهو على أساس البيانات دى بيبتدى الموقع أوتوماتيك يفلتر السيرش.
4.اختار Lowest Price Firstعشان يرتبهم لك من الأرخص للأغلى.
5.خلصت كده؟، لا لسه دى البداية بس، بعد ما حددت الفندق أو الهوستل اللى السعر بتاعه مناسب ليك نرجع تانى لموضوعنا اللى كنا أصلا بنتكلم عنه اللى هو Hotel Compare System في كذا موقع بيعمل قصة المقارنة دى زى :hotelcompined وTrivagoوhotelscanner، هبتدى بقى أدخل اسم الفندق اللى اختارته بنفس التواريخ وهعمل سيرش عليه فى المواقع دي، إيه اللي استفدته بقى؟
6.ممكن فندق يبقى نازل على موقع زى agoda أو hotelwire بسعر أحسن من booking اللى كل الناس بتشتغل عليه وده حصل معايا فعلا فى هونج كونج وحجزت من على agoda عشان كان عامل عرض كويس.
7. وده مهم جدا جدا إنك تحط اسم الفندق اللى اختارته ده فى موقع اسمه Tripadvisor وتقرأ آراء الناس عن الفندق قبل ما تلبس وتحجزه، طيب هقعد أقرأ 7000 رأي، لأ طبعا، في حاجة اسمها Travel Rating هتلاقى الموقع مرتب آراء الناس حول الفندق ده، يعنى كام واحد قال كويس وكام قالوا ممتاز وكام قالوا سئ وعامل نسبة بالكلام ده، شوف النسبة بس أهم حاجة.
8.فى نفس الموقع ودى أهم حاجة بالنسبة لي حاجة كده اسمها Traveler Photo دى مهمة جدا جدا، ليه بقى، عشان دى ناس زيي وزيك راحت الفندق ومصورة صور من أرض الواقع لأن أحيانا الفندق بيحط صور حلوة قوي عشان يشدك وتروح تلاقى كلام تانى خالص.
9. اختيار مكان الفندق بحيث إن الفندق يكون قريب للمواصلات، طيب ودى هعرفها منين؟، المواقع المحترمة زى بوكينج بتبقى عاملة علامة كده تعرفك إذا كان الفندق ده قريب أو لأ من المواصلات العامة.
ودى بقى لازم تخلى بالك منها قوي عشان ممكن تختار فندق كويس بأسعار رخيصة بس يكون بعيد عن المواصلات فتدفع فلوس إنك توصل للمواصلات العامة أصلا أكتر من اللى أنت وفرتها فى حجز الفندق.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *