6 طرق للنصب تستخدمها مواقع حجز الفنادق: احترس من hotelscombined.com

نشرت صفحة سيكيرتس تحذيرًا من بعض مواقع حجز الفنادق على الإنترنت، وقالت الصفحة: “تحذير مهم جدا, مش كل المواقع الموجودة على النت بتكون اَمنة إنك تحجز معاهم، أغلبهم نصابين للأسف, فلازم تتأكد 100 مرة قبل ما تعمل عملية حجز وتدفع بالفيزا أو الماستر”.

وأوضحت الصفحة عددًا من الطرق التي تستخدمها هذه المواقع مثل موقع hotelscombined.com للنصب على عملائها، وكانت كالتالي:

1- ممكن يتخصم المبلغ وبعد ما يتخصم ميجيلكش ولا تأكيد حجز ولا إيميل إنك دفعت ولا تعرف رقم الحجز وتدخل في دوامة من الاتصالات والإيميلات علشان تعرف تجيب حقك. (مثال عن تجربة شخصية: موقع هوتيلز كومبايند hotelscombined.com الذي لم استطع استعادة أموالي منه)

2-ممكن المبلغ يتخصم ويتبعت لك تأكيد حجز، وبعد ما تكون اطمنت, تروح الفندق زي الباشا تلاقي مفيش حجز أصلا والحجز اتلغى لوحده.

3- بعد ما تحجز وييجي لك تأكيد إن حجزك أوك, تلاقي قبل السفر بيومين جاي لك إيميل إن الحجز اتلغى ومفيش غرف متوفرة.

4- إنك تحجز وتروح وتلاقي الغرفة بس للأسف تلاقي غرفة مختلفة خالص عن المواصفات اللي انت حجزتها.

5- إن يتخصم منك مبلغ أكتر من المبلغ المعروض على الموقع فعلا ويقولك أصل دي عمولة الموقع.

6- إنك بعد ما تروح علشان تستلم الغرفه تفاجأ إن الفندق يقول لك لازم تدفع تأمين وتدفع ضرايب ممكن تصل لـ 25% من سعر الغرفة علشان تستلمها.

طرق النصب للأسف كتير قوي, والفلوس ممكن ترجع لك وممكن لأ, انت ونصيبك ولو الفلوس رجعت بتاخد 3 شهور علشان ترجع في الحساب, ده غير إن رحلتك أصلا بتكون باظت بسبب اختيارك الخطأ للموقع اللي هتحجز منه.

علشان كده لازم قبل ما تحجز تتأكد من أكتر من موقع زي tripadvisor و trustpilot أو تحجز عند حد موثوق فيه, لأن بجد ممكن غلطة بسيطه زي دي تأثر على رحلتك بالكامل.

ملحوظة: أحد أسوأ المواقع التي تعتمد النصب في عملها هو موقع هوتيلز كومبايند hotelscombined.com بشكل شخصي تم النصب علي في 200 دولار ولم أستطع استعادتهم حتى اليوم.. نصيحة لا تجرب الحجز من خلاله حفاظًا على أموالك.

ملحوظة: أحد المواقع غير الموثوق فيها موقع www.getaroom.com عن تجربة.