الرئيسية / تقارير مميزة / 20 معلومة لازم تعرفها عن تونس: عنوان عادل إمام مهم

20 معلومة لازم تعرفها عن تونس: عنوان عادل إمام مهم

تجربة- أحمد يحيى:

لو نفسك تسافر حتة جديدة وتروق. تونس من أحسن وأرخص الخيارات ليك، فى ناس راحت تونس كذا مرة وكتبت 20 حاجة تعرفهم عن تونس، حبيت أكتب كمان 20 حاجة عن خبرة زيارة واحدة بس.

 

1- الشعب التونسي بيحب المصريين جداً، وطبعًا لكل قاعدة شواذ فمتتوقعش ده من كل الناس، بس فى كل اﻷحوال هيفرحوا بيك جدًا، ويضايفوك (يفرحوا بيك هنا مش معناها هيجوزوك). أول سؤال هتتسأله إنت أهلاوى وﻻ زملكاوى D:

 

2- ﻻزم تعرف عادل إمام ساكن فين علشان هتتسأل السؤال ده كتير فبدل ماتحور عليهم زى ما أنا وغيري عمله إعمل سيرش صغير واديهم العنوان مظبوط.

 

3- التوانسة بطبيعتهم حشريين أكتر من المصريين، وده شيء عادى فممكن تلاقى واحد متعرفوش بيسألك إيش تع ىمل فتونس؟ وإيش تقرأ؟ ووين تسكن؟ وعليش جيت تونس؟ وإيش تأكل؟ واسم أمك إيه؟!، متاخدش الموضوع قفش، ده حب زيادة مش أكتر 🙂

 

4- لو بتحب اﻷكل الحراق هتنبسط قوي ولو مبتحبوش مع الوقت هتحبه وتتعود بمزاجك أو غصب عنك 😀

 

5- اﻷكل التونسي جميل وحلو مقولناش حاجة بس هتوحشك حلة المحشى ورق العنب ومحشى الفلفل والكوسة وﻻ صنية الكوسة بالبشاميل بتاع الحاجة اللي تقريبا مسمعوش عنها قبل كده.

 

6- حاول تحفظ الكشري بيتعمل إزاى علشان هتتسأل عنه كتير وممكن يطلب منك تطبخه فلازم تشرفنا وتعمل حاجة عليها القيمة.

 

7- بلاش تاكل الملوخية التونسي.. افتكر إني قولتلك بلاش.

 

8- تونس الخضراء مشهورة بشجر الزيتون وبطيبخ كل حاجة بزيت الزيتون، ومحلات اﻷكل بزيت الزيتون متنساش تاخد معاك إزازة وعلبة هريسة. وبالنسبة للمعظم بياكلوه كتير وبيطيبخوه كل يوم لدرجة إن فى أكله عبارة عن إنهم بيفتحوا البيضة من فوق يحطوا ملح وفلفل وتقلب وتشرب يا معلم.

 

9- متروحش جربة.. فلوس و سفر طويل على الفاضي.

 

10- سافر وروح أماكن على قد ما تقدر لو عايز شواطئ (سوسة، المونستير، الحمامات، بنزرت) ولو رحت صفاقص زور جزيرة قرقنة والجم. وروح المدينة القديمة يوم الاثنين الصبح وأطلع لسمعة الجامع علشان تشوف المدينة بالكامل.

 

11- لو ليك نصيب ونسيت باسبورك واتسألت عليه وخدوك مركز الشرطة هيفرحوا بيك على الآخر وهتلاقيهم عاملين حلقة حواليك علشان يسمعوا قصصك بس الشرطة زى ما هي فى كل حتة فمتتوقعش الحلو دايما. بس هنا هيفرحوا بيك بزيادة ويبعتوا لصحابهم فى المراكز التانية يجوا يحضروا الشو ﻻيف. وغالبا هيضايفوك بملوخية فلازم على طول ترجع لرقم 7.

 

12- تونس العاصمة حلوة، لفها حتة حتة وروح المدينة العربى أو المدينة القديمة والمرسي وجمرت واعمل قهوة فى سيدى بو سعيد ولف على قد ماتقدر.

 

13- بالنسبة للبنت التونسية في ناس اتكلمت كتير عنها أنا مش عارف أبدأ منين بس أقل ما يقال إنها رقيقة جدا وفى مواقف تانية تلاقيها بـ 100 راجل بمعنى الكلمة. والمرأة التونسية جزء مهم جدا فى المجتمع وبتخدم في كل حاجة وشغالة طول الوقت وجدعة جدا ويعتمد عليها في كل حاجة غير إنها مزيانة على طول حتى لو فى البوليس. أنا مرة شوفت طفلة (بنت) بولسية كنت بدور على حاجة غلط اعملها علشان تيجي تكلمني كان محلاها على اﻵخر?

 

14- بيقولوا فى قانون إنك لو ماشى مع واحدة تونسية ﻻزم تكون قايلة لمركز الشرطة أنا وقفونى وقالوا لي الكلمتين دول ومشيت فمعرفش دي اشتغالة وﻻ ﻷ المهم لو ماشى مع بنت متكلمش وانت معدي جنب البوليس علشان ميبنش إنك اجنبى وخلص الحوار.

 

15- التوانسة مثقفين جدا وحافظين أغاني الزمن الجميل والشيخ إمام والناس القديمة والجديدة فحاول على اﻷقل تبقى عارف أسامى الناس دي. بس بالنسبة للسينما مش هتلاقى غير أفلام مصري منتهية الصلاحية ولما سألت عن امتى ألاقى فيلم تونسى قالولى فوت علينا كمان شهرين. D:

 

16-التاكسيات في تونس منظمة جدا لما تركب بيشغل العداد و نور قدام أخضر علشان إلي يشوفه يعرف أنو مليان و ميوقفوش بس صعب قوى تلاقى تاكسي فاضى فى أوقات معينة فجرب اﻷتوستوب .أنا نفع معايا 5-6 مرات و أنت و مستوي خفة دمك رصيدك من اﻹيفيهات و قفشات اﻷفلام D:

 

17- بالنسبة للتاكسى الجماعى أو اللواج (الميكروباص) هتستغرب لما تلاقى بيركب فيه 8 مش 14 أو 15 عندنا على حسب الكنبة اللي ورا 3 أو 4 متعلقش فقط أبكى فى صمت.

 

18- سيتروناد (عصير ليمون). ﻻباس (يعني ﻻ بأس عليك ؟) . مريول (تي شرت أو لبس). هزي (يعنى أمشى او هات حاجة معاك). برا زمر (يعني بلا ياد من هنا). صرف (فكة). مريجيل (كويس). غوووووس (مزيان). كعبة (واحدة أو قطعة). حارة (4قطع). هندي (التين الشوكي). عسلامة ( يعنى السلام عليم ورحمة الله وبركاته D: ) . حوت (سمك)

 

19-اللغة اﻷولى فى تونس هى العربية دي معلومة مشكوك فيها ﻷن الشعب كلو بيتكلم فرينش كويس جدا من أصغرهم ﻷكبرهم وبيخلطوه فى معظم كلامهم بس بيفهموا عربى زى الفل مفيش مشكلة وهم فاكريين أن المصريين كمان زيهم بس فى اﻹنجلش. يعنى كلنا من أصغرنا ﻷكبرنا بنكلم إنجلش كويس جدا. حاول تأكد المعلومة ديه و متصغرناش ؛)

 

20- لو عايز تبقى أسطورة تعالى على نفسك وخد كورس الخليل كوميدى قبل ما تروح واقلش على قد ماتقدر واحفظ نكت من نوعية واحد راح البحريين خد معاه مايوهيين وارفع راسنا أنت شايل اسم مصر يا بطل.

 

أخيرا كلمة للبنات التوانسة: متفتكروش إن كل الشباب المصري زى الواد الصايع بتاع مسلسل حكايات تونسية رمضان ٢٠١٥، حنا وﻻد ناس مش كده و ربنا D:

وللوﻻد التوانسة: أقسم بالله صوفينار مش مصرية وشارع الهرم مش عباره عن كبارية open air 😀 احنا شعب متدين بطبعه 😀

طبعا فى حاجات كتير غير كل ده بس ده اللي جه في دماغى دلوقتي، الخلاصة التوانسة من أحلى الشعوب اللي اتعاملت معاه وحبيتها وأقرب شعب للطبع المصري. وفي أسر اعتبرتنى جزء منها بمعنى الكلمة.

أنصحك أيضًا بقراءة:

بوابة السياحة والسفر إلى تونس

السياحة في تونس : أهم الاماكن السياحية في عاصمة الياسمين ونسور قرطاج

هشام البدري يكتب عن رحلته إلى تونس: يا حليلي ناي أبي حني

أحمد سمير يكتب رحلة السياحة في تونس : الاجابة تونس الحب برجالها ونسائها

الاماكن السياحية في تونس : دليلك السياحي الشامل لأجمل 6 مدن تونسية

شاهد أيضاً

الاماكن السياحية في تونس

الاماكن السياحية في تونس : دليلك السياحي الشامل لأجمل 6 مدن تونسية

 الاماكن السياحية في تونس | الرحالة | كتبت- رنا شوقي: الاماكن السياحية في تونس كثيرة …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *