الرئيسية / تقارير مميزة / 10 نصائح هامة تساعدك في تنظيم خط سير رحلتك

10 نصائح هامة تساعدك في تنظيم خط سير رحلتك

تجربة- بهاء فاروق:
مهم قوي قبل السفر إنك تنظم رحلتك وتعرف انت عاوز تروح فين, وتنظم خط سير الرحلة. هقولك ليه، كل يوم بتقضيه في بلاد بره محسوب عليك وانت دافع فلوسه ومش عاوز يضيع منه أي دقيقة بدون ما تشوف فيه حاجه جديدة أو تعمل تجربة مختلفة, لكن حلو برضه في بعض الأوقات إنك تمشي في الشوارع تستكشف الجديد بدون ما تكون مخطط. أكيد هتكتشف حاجات مقرتش عنها ومشفتهاش في كتب.
هتقول إيه التناقض ده!، ولا تناقض ولا حاجة، أنا قصدي بتحديد خط السير إنك تكون عارف انت هتقعد في كل بلد قد إيه وهتسافر من فين لفين امتى، وهتروح فين النهارده وهقول لك مثال على كده, مثلا في باريس بعض المتاحف بتكون قافلة في بعض الأيام، وبعضها مفتوح وبعضها بيفتح بالليل في أيام معينة وبعضها بيكون قافل, فلو انت مكنتش عارف التفاصيل دي قبل ما تزور المكان ممكن يضيع عليك نص يوم في المواصلات وتروح تلاقي المكان اللي انت عاوزه قافل، والمصيبة بقى لو كنت مسافر تاني يوم وده آخر يوم ليك في المدينة هتكون فوت فرصة إنك تزور حاجة نفسك تشوفها علشان منظمتش خط سيرك مسبقا.
بعض أسرار تنظيم الرحلة وخط السير:
1. قبل ما تسافر تجيب ورقة وقلم وتكتب كل الأماكن اللي نفسك تزورها وطبعا عرفنا إزاي من TRIPADVISOR.COM مثلا. وتشوف كل مكان بيفتح إمتى ومن الساعة كام ومقفول أي يوم علشان تبدأ تعمل جدول بزياراتك اليومية.
2. بعض المتاحف في أوروبا واللي تذكرة دخولها ممكن تكون أكتر من 100 جنيه، في أيام بتكون مجانا ببلاش وده غالبا الأحد الأول من كل شهر. حاول تستغل اليوم ده كويس قوي علشان تدخل فيه أكتر من متحف, مع العلم إن بيكون زحمة طبعا علشان مجانا.
3. بعض المتاحف بتكون مجانا بعد الظهر فقبل ما تروح أدخل على صفحتهم على النت وأعرف الأوقات المجانية للدخول.
4. حاول دائما تشتري تذاكر الدخول أون لاين وده هيوفر عليك وقت كتير جدا. مثال لدخول متحف الفاتيكان مثلا ممكن تقف في طابور لمدة 3 ساعات علشان فقط تشتري تذكرة, ولو حضرتك ناصح واشتريت التذكرة أون لاين بتدخل مباشره في 10 ثواني بدون أي طوابير
5. في زياراتك لأوروبا متصدقش الناس اللي بيبيعوا تذاكر في الشارع ويقول لك دي أوفر وهوفر لك وقت وهيدخلك على طول بدون طوابير. كل ده كلام فارغ وبيستغلوا السائح جدا وسعر التذكرة معاهم بتبقى ساعات أغلى الضعف, فخليك انت أنصح منهم واشتري تذكرتك مسبقا أون لاين. 6. خلي دايما وقت كافي للتنقل من مكان لمكان لأنك جديد في المكان فمش عارف هتاخد وقت قد إيه ومتضغطش يومك قوي بزيارات ومتاحف في الأول والأخر انت رايح تتبسط وتستمتع وتقضي وقت حلو وتشوف حاجات جديدة.
7. خلي دايما يوم راحة وسط البرنامج بتاعك تروح تقضيه في جنينه مفتوحة أو تتمشى في سوق شعبي أو تروح تقعد على البحر أو تقعد على نهر أو تأجر عجلة وتلف بيها في الشوارع، ده هيكون يوم ممتع جدا تريح فيه شوية وتشحن طاقتك وتستكشف حاجات وأماكن جديدة انت متعرفهاش وهتكون فرصة حلوة تشوف أهل البلد عايشين ازاي وبيشتروا منين وبيقضوا وقتهم ازاي.
8. حاول دايما تبعد عن الأماكن الزحمة في الويك إند, يعني مثلا لو هتروح صن واي لاجون في كوالالامبور حاول إنك تتجنب تروحها بوم السبت والأحد علشان بيكون يوم عطلة رسمية وأهل البلد بيروحوا هناك فبتكون زحمة قوي , فمهم قوي تختار يوم زيارتك للمكان صح, وصدقني ده هيوفر عليك كتير ويخليك تستمتع بالمكان لأقصى حد بعيد عن الزحمة.
9. النقطة دي لمحبي الفن: خد وقتك في كل مكان واستمتع بيه على قد ما تقدر, ومتحاولش إنك تجري علشان تلحق حاجه تانية لأنك لا هتستمتع بدي ولا بالتانية, متحف زي رايكس مثلا في أمستردام فيه لوحات تعد تحف فنية لا تقدر بثمن بيكونوا حاطين أمام اللوحة كنبة علشان الناس تقعد تتأمل في اللوحة, تخيل واحد قاعد أمام لوحة نص ساعه مثلا بيتأمل في كل تفاصيلها والرسام رسمها إزاي 🙂 لو أنت محب للفن هتقدر الكلام ده قوي.
10. تنظيمك كمان لازم يشمل استخدامك لوسائل المواصلات العامة ودي هيكون ليها موضوع منفصل لأنه موضوع مهم جدا وهيوفر عليك فلوس كتير, فلازم قبل ما تتحرك وتزور أي مكان تكون عارف هتركب إيه وهتركبه منين علشان توفر وقت وكمان توفر فلوس.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *