الرئيسية / أوروبا / نصائح هامة جدًا بخصوص الشنجن: احترس من النصابين
10 نصائح للحصول على تاشيرة شنجن

نصائح هامة جدًا بخصوص الشنجن: احترس من النصابين

تجربة- عمرو شريف:

لو بتحلم إنك تحصل على فيزا شنجن وانت في بيتك بسعر خرافي لازم تقرا الموضوع ده، فيزا شنجن تعتبر من الفيزات الصعبة والحصول عليها بيتطلب تحضير أوراق كتير وتنظيم أوراق وموقف مالي مستقر جدا. النهارده تقدر تحصل على فيزا شنجن بدون أي مجهود وانت قاعد في بيتك مأنتخ, مقابل مبلغ مالي!.

وصلنا كذا استفسار من ناس حبايبنا بيتكلموا عن صفحات موجودة علي فيس بوك بتقول إنها بتساعد في تطليع فيزا شنجن أو بمعنى أدق بتطلع لكم الفيزا, بعد ما تعمل سجل تجاري وكشف حساب بنك والأوراق الخاصة بالفيزا وبتطلب مبالغ وهمية من المصريين مقابل الموضوع ده.

أحب أحذركم بجد إن الموضوع نصب في نصب وأي كلام وإوعوا تنساقوا ورا الكلام ده, لأن السفارات دي مش هبلة يا جماعو ومش هتطلع فيزا بأي ورق والسلام وحتى لو جابوا لكم فيزا أكيد هتبقي مزورة ولو رحتم شيكتم عليها ممكن تقعوا في مصيبة أكبر، غير الفلوس اللي اترمت في الأرض، تعالوا أحلل ليكم ليه الموضوع نصب.

– أولا السجل التجاري اللي بيقول هيطلعه ليكم هو فعلا هيحصل, منشأة فردية برأس مال 10 آلاف جنيه وتبقي صاحب بيزنس يا إما شركة يا مطعم يا أي حاجة، كلام جميل إنما السفارة مش هبلة، لأن تاريخ تأسيس الشركه في السجل هيكون من شهر، يا حلاوه على الجمال!، ورأس مال مشروع 10 آلاف (طبعا حاجة أي كلام)، ده أولا.

زائد عايزيين بطاقه ضريبية علشان شوية مصداقية إن السجل ده مش حبر علي ورق لأن كده بيتفتح ملف ضرايب والضرايب هتيجي عليك في يوم من الأيام تقولك ادفع يا معلم ضرايب النشاط بتاعك، وهو برضه هيطلعها ليك، هتروح السفاره علشان مش هبله طبعا تاخد الورق ده ترميه الأرض وتاخد الرفض ولو يعني حنينة قوي معاك هتقولك هات لي ورق التأمينات إن حضرتك بتدفع تأمينات لموظفين الشركة بتاعتك اللي في السجل اللي أساس مفيش شركة.

– ثاني حاجة كشف حساب البنك، هو بيضربه فهمي نظمي رسمي، لأنه بيقول لك لو عندك حساب إدينا رقمه في أي بنك أو افتح حساب وادينا رقمه ويا حبيبي انت عايز تفهمني إنه عمال يحط لك فلوس من عنده علشان يعمل حركه في الحساب, طيب بيسحبهم إزاي ما هو الحساب باسمك يبقي الحل إنه علي الكمبيوتر بيضرب كشف حساب حركات داخلة وخارجه وبيضرب ختم علي توقيعات.

بصفتي أنا راجل بنكي وفاهم كويس قوي اللي بيحصل لأن السفارات بتبعت للبنك تشيك على كشف الحساب لو شاكة فيه يعني بيجي الكشف للبنك للاستفسار عن إنه مضروب أو سليم، هم مش بيسألوا على الرصيد اللي جوه صح أو غلط، بيسألوا الكشف طالع من البنك أو لا وده حقهم طبعا مفيهوش أي علاقة بقانون سرية الحسابات وطبعا بيكون مضروب لأن الكشف اللي معمول على جهاز كمبيوتر بيكون متاخد سكان من كشف حقيقي وطبعا لما بيتبع الحبر بيبان إنه كان سكان.

إيه هو بقى الحل، الحل إننا نرتب ورقنا صح ونستنى لغاية ما الورق يكمل بطريقة مضبوطة إن شاء الله ننتظر سنة, أوروبا مش هتطير, المهم إننا بنقدم بطريقة رسمية من غير أفلمة ومن غير ورق مضروب لأن الحاجات دي هتضرنا جدا وندخل في بلاك ليست وممكن تحصل لنا حاجات ألعن يا جماعة، اللهم بلغت اللهم فاشهد.

هذا التقرير منشور بالاتفاق مع صفحة Travel Secrets

شاهد أيضاً

الهجرة الى سويسرا

الهجرة الى سويسرا : تعرف على الشروط والأوراق وطرق الهجرة المختلفة لسويسرا

الهجرة الى سويسرا | الرحالة |    الهجرة الى سويسرا حلم حقيقي لكثير من الشباب …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *