fbpx
الرئيسية / أوروبا / نصائح للمسافرين إلى أوروبا في الشتاء: رحلة تحت المطر

نصائح للمسافرين إلى أوروبا في الشتاء: رحلة تحت المطر

تجربة- عمرو شريف:

جربت تتغرق بالمطر قبل كده وانت ماشي في شوارع باريس أو روما أو إسطنبول؟!، حصل لك أي موقف اتزنقت تحت الميه ومش عارف تروح ولا تيجي؟!، جالك إحساس إنك عامل زي الكتكوت المبلول وعمال تتنفض من الميه اللي نزلت فوق دماغك قبل كده؟!.

مغامرة ممكن تكون لناس ممتعة وممكن لناس تانية مأساوية، إنما شر لابد منه، مش ممكن نتلافاه، وبصراحة أنا عن نفسي حاسس إحساس جميل بالمشي تحت التلج والمطر، لأني مفتقد الموضوع ده.

هتقولوا طيب مصر ما فيها مطر وكده، لا يا سيدي إحنا بنكون عارفيين ميعاد النوة قبلها وأول ما تيجي يا بنقعد في بيوتنا ما نتحركش يا بننزل بعربياتنا ويادوب نمشي تحت المطرة كام خطوة، إنما في أوروبا فجأة تلاقي أبواب السما اتفتحت وهاتك يا رخ، وحضرتك طبعا حتي لو بتشتي 24 ساعة، لازم تنزل لأن دي رحلة مش هتضيعها في الأوتيل مستني الجو يبقي كويس، وعلشان احنا في الصفر بنمشي كثير قوي علشان نستمتع بالمناظر، اللي في الشوارع يبقي هترخ عليك أكيد، في الموضوع ده يعني شويه نصايح للي عاوز يسافر أوروبا ويحب يعيش مغامرة الأمطار والسقعة.

أولًا: لازم نعرف كلنا إن الجو من ديسمبر إلى مارس في أوروبا لعنة، يعني مطر متواصل وتلج ودرجة حرارة ممكن توصل لتحت الصفر، وبالتالي لازم تلبس كل لبسك وانت ماشي وأهم شيء إبعد عن الكوتشي أو الجزم الشمواه أو طبعا الصندل أو الحاجات اللي هوبا في 5 دقايق هتلاقي رجلك بتتعصر أو الجزمة باظت من المياه، لازم يا تلبس بوت يا سيفتي، وكمان لأنهم بيدفوا وتحتيهم بقي شرابين أو شراب تقيل، وطبعا السويتر أساسي إنه يكون ووتر بروف علشان المياه تنزل من عليه، ومتخترقهوش للبس اللي تحتيه.

ثانيًا: من شهر مارس إلى نص يوليو هتلاقي بقي الجو مطر، إوعى تفتكر إنك في صيف، لا خالص، لأن أوروبا ممكن تكون الشمس طالعه والجو حر وتلاقيها بترخ مطر برضه، خصوصًا في شهر 6 و7، الكلام ده بيحصل دايما، هي مش مطرة جامدة، إنما بتقي رخ كده شويه، وبرضه هتتبل، إنما بقى في شهر 3 ،4،5 بتبقي مطرة بحق ربنا، ويعني يا حضرت ممكن تلاقيها طول اليوم بتمطر والحرارة أقل من 10 درجات.

ثالثا: لازم تكون فاهم شيء أساسي إن في كل مكان في أوروبا فيه دفايات مركزية، ودي بتكون دفايات زيت متثبتة على الحيطة، حتي الحمام بيكون فيه، ودي بتخلي الأوضة نار، وأي مكان تدخله نار، وبالتالي حضرتك لازم تكون لابس بقي بالطو أو بلوفر تقيل وتحتيه حاجه خفيفة تي شيرت أو كده، لأنك أول ما تدخل لازم تقلع علشان الحر اللي جوه، ويا قمر بقي لما تطلع تاني الشارع هتلاقي المطر والسقعة، وطبعًا ده يؤدي لأنفلونزا شديدة فكن حريص.

رابعًا: اللي مسافر في الوقت ده لازم يكون واخد معاه شمسية، ومش أي شمسية، لا شمسية من بتاعة زمان أم إيد خشب دي، لأنها بتكون كبيرة وبالتالي تحجز ميه عنك في مساحة أوسع، وتاني شيء الهواء بيكون فظيع، والله بيطير أي شمسية أو بيعوجها أو بيكسرها، فلازم واحدة تكون مستحملة وجامدة بدل مره في التانية تلاقيها اتكسرت ومش نافعة.

شاهد أيضاً

خريطة ماليزيا

خريطة ماليزيا السياحية : أهم مدن ومعالم ماليزيا السياحية والمسافات بينها

خريطة ماليزيا | الرحالة |   ماليزيا من الدول السياحية المميزة التي تملك مكانة تاريخية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *