الرئيسية / آسيا / مصطفى توفيق يواصل رحلته في الهند: كشمير جنة الله في الأرض

مصطفى توفيق يواصل رحلته في الهند: كشمير جنة الله في الأرض

رحلة- مصطفى توفيق:

الموضوع ده مخصص للناس اللي بتحب السفر ببلاش ده، كشمير جنة الأرض ❤ أنا تقريبًا لفيت معظم الهند بس فعلًا مفيش في جمال جبال كشمير وروعة الطبيعة هناك ده غير إني فعلًا مصرفتش هناك حاجة.

لما رحت أول مدينه سريناجار، رحتها بالليل وكانت كعادة أي مدينة هندية الدنيا ضلمة وبسبب المظاهرات وإن مفيش سياحة هناك رحت على أقرب كامب للجيش الهندي وقلت لهم أنا عاوز أبيت هنا علشان خايف ووافقو طبعا ? ودي كانت أول ليلة هناك  😀

تاني يوم حجزت في سفينة، الليلة بحوالي 50 جنيه ودي كانت أغلى إقامه هناك قعدت وتاني يوم خدت مركب 3 ساعات بيلف البحيره كلها وبيوريك الأسواق العايمة وبيلففك جوه كذا مكان وكانت بـ 300 روبية بالظبط.

في نفس اليوم اتعرفت على 3 إسبان وبدأت الرحله ✌رحنا الأول سونمارج منطقه فيها جبال خضرا وروعة جدًا وفي آخرها تلج وفيها وديان كتير، بعد كده رحنا كارجيل مدينه تحس إنك في إيران، أهلها معظمهم شيعة كان باين على صور الخميني اللي ماليه المكا،ن حجزنا أوتيل هناك كل واحد دفع بالظبط 80 روبية يعني 10 جنيه ?

رحنا لفينا المكان كله وأكلنا واسكنيصنا ورحنا على مدينه تانيه اسمها لامايرو، المدينة مفيهاش إلا كام أسره بوذية ومعبد قديم جدًا حوالي 800 سنة، قعدنا هناك في بيت بوذي دفعت إقامة وفطار وغدا وعشا 30 جنيه وكان أكل بيتي حلو جدا.

الجميل في المدينة دي بجد ليلها ❤  ولأن المدينة من غير أضواء وبعيدة جدًا عن أي مدن تانية، السما بالليل أقسم بالله مبهجة ? مفيش مكان لنجمة زيادة تتحط فعلًا، روعة السما مع جبال الهيمالايا حاجة جميلة جدًا لدرجة إننا خدنا حاجات وفرشنا بره وسبنا الأوضة.

المدينه التانية كانت خالصي وعدينا على كذا مدينه مش فاكر أسمائهم الصراحة لحد ما وصلنا LEH آخر مدينة.ليه مدينه مليانة معابد وأنشطة ممكن تعمل رافتنج أو هايكنج لأكتر من يوم وتلف القرى اللي حواليها.

أهم حاجة ان وسيلة التنقل هناك كانت ببلاش ?✌ أيوه والله هي ورقه اكتب عليها اسم المدينة اللي رايحها وألف واحد هيقفلك، مره ركبنا على مقطورة ومرة في أتوبيس للجيش الهندي ومرة باص وقف لنا.

*لإقامه هناك لليلة لو انتم جروب مش هتكلف الفرد 20-25 جنيه في الليلة لو بتعرف تفاصل أو خد الخيمة بتاعتك وافرش في أرض الله الساحرة هناك.

*المواصلات مش هتكلفك أي حاجة هناك وقف انت أي حاجة في طريقك

*تروح إزاي: هتركب القطر من دلهي أو مومباي لجامو ومن هناك Shared taxi لسرناجار أو باهلجرام وتروح بعدها سريناجار.

*محدش يروح في الشتا لأن الطرق بتكون مقفولة.

تكلفة اليوم هناك إقامة وأكل لو انت مسافر بتوفر زيي لا تتعدي 50-70 جنيه بالأسعار الجديده كمان.

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *