الرئيسية / آسيا / مصطفى توفيق يكتب عن مغامرته في الهند: عن أرخص 3 مدن

مصطفى توفيق يكتب عن مغامرته في الهند: عن أرخص 3 مدن

رحلة- مصطفى توفيق:

انت عارف إن أرخص 3 مدن ممكن تروحهم في حياتك وأحلاهم، هم اللي هنتكلم عليهم في الموضوع ده؟!، طيب انت عارف إنك ممكن تسافر أسبوع إقامه وأكل ومواصلات وكمان تطير فوق الهيمالايا لـ 20 دقيقه بـ 100$ بس، لا وترجعهم كمان 😀 😀 البوست ده عن تجربة شخصية في الهيمالايا في الهند.

أنا هبدأ بمنالي في الهند، منالي بالنسبة لي هي أحلى مدينه زرتها في حياتي، أولًا رخيصة جدًا مع إنها سياحية من الدرجة الأولى، ثانيًا فيها كل الأنشطة اللي ممكن تعملها.

*الإقامه فيها في أوتيل كويس جدًا بـ 2$ للفرد وفي الهوستيل اللي هو 3 في غرفة بـ 1$

*الأكل فيها رخيص جدًا، برضه يعني ممكن تاكل في الوجبه بـ 1-3$ على حسب أكلك

(1)

أنا رحت هناك أول يوم اتشقلبنا في المكان بعد كده حجزنا تاني يوم عشان نعمل الباراجليدنج، وهو إنك تطلع فوق جبل عالي جدا وهووووب تنط النطة 😀 هتفضل طاير فوق الهيمالايا لحوالي ربع ساعة وتستمتع بأحلى منظر في حياتك. طبعا هتقولي دفعت دم قلبك 😀 هقولك مفيش الكلام ده أنا كنت ركبته بحوالي 25$ لا غير.

خلصنا اليوم ورحنا على مكان نلعب ال ziplining وهو حبل مربوط كده بين ضفتين نهر سريع جدا انت بتبقى في النص والحبل بيطلع وينزل تتبل شويه في النهر وتطلع وهكذا ودي بقى يا سيدي كانت ب 2$ 😀 😀

(2)

تاني يوم حجزنا canyoning دي زي ما في الصور بتطلع فوق جبال وفي شلال نازل ويربطوك بحبال وتقعد تنزل مع الشلالات دي لحد تحت قعدنا حوالي 3 ساعات بس دي منصحش بيها لأي حد علشان خطر شوية، انا عن نفسي اتبهدلت وأنا بعملها 😀 😀

(3)

آخر حاجة ممكن تعملها في منالي، إنك تروح حته اسمها فاشيشت دي بالباص أو التوكتوك أو مشي براحتك 10 دقايق من نيو منالي، هتلاقي هناك معبد هندوسي وجوه Hot springs

(4)

في مكان اسمه Solang valley

ده اللي انا متصور فيه وأنا قاعد وجنبي بيت كبير، ده فيه تلييفريك للي حابب يجربه، أنا رحت هناك للتصوير بس مركبتهوش. بصوا أنا والله مهما اتكلمت عن منالي مش هعرف أوصفها صح، بس هي فعلا جو للي عاوز يروح مدينه يستريح ويعمل أنشطه كتير فيها وبالليل يقضى سهرة حلوة 😀

تاني مدينة، اسمها داراماشالا، وبرضه الإقامة نفس الكلام، هي منطقة الجبال فيها أعلى شوية. بتركب باص لمنطقه اسمها ماكلوجان، ودي فيها معبد بوذي كبير اسمه لدلاي لاما، وكمان فيها منطقه الشلالات اللي برضه ممكن تعوم فيها. دراماشالا منطقة جميلة جدًا وبتتعرف على ثقافه جديدة.

ثالث مدينه هي شيملا، تقدر تروح تستمتع بس هناك، وتقضي وقت جميل بين الجبال مع إنها نفس طبيعه منالي.

علشان نجمع الدنيا كده أولًا المواصلات في الهند عن طريق موقع redbus.com.

* الإقامه للسبع ليالي 14$

*المواصلات من دلهي لشيملا بعد كده داراماشلا بعد كده منالي راجع لدلهي 40$ على أفضل أتوبيسات موجوده، طبعا انت ممكن تقلل التكلفة دي للنص أو أكتر.

*أكلك ده بتاعتك

*الأنشطه Paragliding + ziplining حوالي 30$ بس برضه لازم تفاصل

نصيحه للناس اللي بتحب توفر زيادة بقى، اشتروا أي لبس من منالي شتوي، الجواكت الصوف، أنا كنت جايبها قبل التعويم بحوالي 50-70 جنيه ولبس حلو جدًا والله. من دلهي الشورتات كانت بـ 8 جنيه والله العظيم 😀 😀 والباك باك بتاعة السفر كات بـ 100 جنيه. وللبنات، طبعًا الزيوت الطبيعية هناك مغرقة الدنيا أفضل مكان في دلهي.

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *