الرئيسية / آسيا / مصطفى توفيق يكتب رحلته إلى سريلانكا: رجع فلوسك وانت مسافر

مصطفى توفيق يكتب رحلته إلى سريلانكا: رجع فلوسك وانت مسافر

رحلة- مصطفى توفيق:
الموضوع ده بقى مش بس للناس اللي بتسافر بفلوس قليلة، ده للناس اللي عاوزه ترجع فلوسها وهي مسافره 😀 😀 عشان تعرف إزاي ده يبقى تابع الموضوع للآخر خصوصا لو انتي بنت 😀
*أولًا الفيزا لسيريلانكا أون لاين، بتقدم عليها وبتجيلك بسهولة جدًا، تكلفتها 35$
*الطيران ليها أنا لسه شايفه على سكاي سكانر بحوالي “240$” رايح جاي، www.travelstart.com ممكن تستخدمه برضه، لسه محجوز من عليه تيكيت بـ 4000.
*العملة هي الروبي السريلانكي “1$=150 روبي” والدنيا هناك فعلا رخيصة، ما عدا الإقامة شوية.
*المواصلات ببلاش هناك حرفيا، يعني أي قطار حوالي 1$ أو أي باص سفر بين البلاد.
*الأكل هناك أرخص من أي مكان تتخيله، ممكن الوجبة بخمسين سنت وانت طالع على حسب المكان طبعا، أنا بتكلم على اللي بيسافروا بمبلغ قليل. (مرة طلبت أنا وواحدة ف كاندي 8 أطباق كبار جدا، وفيهم كل حاجه ودفعنا 2.5$ ومقدرناش نكمل ربعهم أصلا).
المدن اللي تستحق تتزار من وجهه نظري في خلال أسبوع هي: إيلا، نوارا إيليا، وأدام بيك، وكاندي وسيجيريا وطبعا السفاري هناك.


خلينا نبتدي.. أنا السفرية اللي فاتت عامة كانت بفلوس قليلة جدا، قعدت شهرين ونص، زرت 4 بلاد منهم ماليزيا مرتين، فكان لازم استغل أي حاجه توفر لي 😀
أما رحت سريلانكا، لقيت القطر رخيص جدًا جدًا من 10 لـ 30 جنيه، ده أما يسافر بيك مسافة 😀 فكنت بروح أزور المدينة اللي عاوز أزورها وأدخل القطار أسافر 8 ساعات أنام فيه وابقى الصبح في مدينة جديدة أزورها وهكذا.
أول مدينة رحتها اسمها كاندي، مدينة جميلة جدًا، وفيها بحيرة مليانة أسماك ومعبد بوذي كالعادة فوق أعلى نقطة في المدينة 😀 خلصتها وسافرت مدينة اسمها إيلا وده المكان اللي في الصورة تحت مكان اسمه Little adam’s peak.
مكان حلو جدًا ومنظر الجبال هناك بجد حلو جدًا، اتصورت وبعد كده رحنا لمنطقه الشلال هناك وبدأنا العوم 😀 عامة من أحلى الحاجات في حياتك إنك تعوم في شلال سواء في الهند أو سريلانكا بقى اللي تحبه 😀
بعد كده طلعنا نشوف مكان اسمه Arch bridge وكان فوق جبل برضه، اتعرفت على ناس هناك ونمت عنده شويه، تاني يوم خدنا القطار أبو عشرة جنيه برضه وكنا رايحين adam’s peak 😀 المكان ده عبارة عن سانت كاترين مضروب في 2 أو 3 😀 😀 هو 5500 سلمة بتطلعهم علشان تشوف معبد بوذي فوق المدينة وانت في الطريق بتعدي على شلالات كتير وأماكن حلوة جدًا ممكن تعمل كامبنج هناك.
قعدت أطلع من 2 الفجر ونزلت 10 الصبح مش شايف قدامي وركنت في الأوتيل أبو 500 روبي اللي كنت حاجز فيه 😀 😀 رجعت على مدينة اسمها هاتون وكان في ناس مستضيفاني هناك، في الآخر الرحلة كنت بسافر أروح أزور مكان وأرجع تاني على بيت صاحبي.
نيجي بقى لأحلى حاجة وهي القطر من هاتون أو أدام بيك لنوارا إيليا، علشان تبقى معايا في الصورة لو كتبت إيه أحسن حاجة ممكن أعملها في سريلانكا هيتقالك اركب القطار 😀 😀 فجربت الموضوع مرتين بين هاتون ونوارا إيليا والله مزهقتش خالص 😀 وآخر مرة جربته بالباص.. الباص تكلفته المكيف كان 1$ ودي أغلى حاجة هناك 😀
نرجع لموضوع إزاي أعوض مصاريف في السفرية.
بص بقى، اللبس الشتوي في نوارا إيليا دي رخيص جدًا جدًا، يعني أي جاكت (قبل التعويم) كنت بجيبه بـ 50-60 جنيه وأي جاكت بناتي كنت بجيبه بـ 70-100 جنيه، ووالله ماركات next وحاجات عظيمة 😀
فانت سهل تتفق انت وأصحابك تشتروا لبس من هناك، بما إن الأرقام في مصر بقت في مستوى أبو هشيمة، وده هيخليك توفر من فلوس سفرك أكتر 😀 المكان اللي رخيص هناك بس للشتوي هو نوارا إيليا بس برضه هو مكان كله عرب فلازم تفاصل جامد وتطلع المصري اللي جواك 😀
آخر حاجة أنا كنت موفق بفضل ربنا في الإقامه بس على بوكينج سعر الليلة حوالي 125 جنيه، أنا مدفعتش في الـ 10 أيام غير 65 جنيه إقامة 😀 حوشوا وسافرو يا جماعة، الموضوع حلو جدًا والله ومتعه بجد.

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *