الرئيسية / أوروبا / محمد سري يكتب من فرنسا التي لا نعرفها: باريس مش جنة

محمد سري يكتب من فرنسا التي لا نعرفها: باريس مش جنة

رحلة- محمد سري:

كل اللي بيسافر، بيسافر علشان يروح كل الأماكن السياحية ويستمتع بالصور والكلام ده، لكن نصيحة حاول تروح الأماكن اللي محدش بيروحها في كل بلد وكل منطقة، علشان تعرف تحكم علي البلد وسلبياتها، وده اللي عملته في باريس، واكتشفت الآتي:

** أولاً في المترو، لو ركزت هتلاقي برضه في همجية وعدم نظام في كتير من المحطات، وتلاقي برضه الناس بتعدي من مكن التذاكر من غير ما تدفع وتلاقي كل اتنين بيعدوا ورا بعض، وتلاقي ناس بتدخل من باب الخروج، شبه اللي بيحصل عندنا.

وهتلاقي في نصابين قدام محطات المترو تبيع لك تذاكر بسعر مخفض بس طبعاً تيجي تشغلها مش هتشتغل لأنها مستعملة، ولو راجل ارجع له بقي علشان تقول له مش شغالة، مش هتاخد حق ولا باطل.

** بالنسبة بقى لصديقك الفرنسي اللي كنت بتكتب له جوابات في الامتحانات ف إن بقى تلاقي صديق فرنسي دي مش سهلة، ليه؟ لأن بالنسبة للفرنسيين بقي كشعب، مش طيبين وجدعان زي ما ممكن تروح أي بلد تلاقي الناس بتساعدك علشان انت سائح عندهم.

من تعاملي مع كتير منهم هم شايفين إنهم أحسن من الناس وإنك جاي بلدهم بقى وزاحم المكان. فمن رأيي الشخصي الشعب الفرنسي مش cute بقي والكلام ده زي ما معظمنا فاكر. *طبعاً ده مش تعميم بالعكس قابلت ناس كويسة كتير وأحسن من بلاد كتير قوي*

** بالنسبة للي بيقولك في ألمانيا مبيتكلموش English وهتتسوح علشان بيتكلموا ألماني بس، فشكله اتلخبط بين فرنسا وألمانيا. الشعب الفرنسي مهما كان نضيف فهتلاقي نسبة كبيرة جداً مبتعرفش تتكلم English وهتلاقي نفسك متسوح كتير عقبال ما تلاقي حد بيتكلم ويفهمك. طبعاً ده لو اتقال عن مصر هنقول آه ما احنا شعب جاهل ومش متحضر ومش عارف إيه.

** بالنسبة للتسول ، فأحب أقول لك إن التسول اللي هنا هتلاقيه هناك برضه، في شارع جنب محطة القطر “gare du nord” ، الشارع ده لو مشيت فيه بالليل هتلاقي منظر جميل من شباب عربي وشباب أفارقة كتير جداً واقفين في الشارع علي النواصي زي اللي عندنا بالضبط وتلاقيهم بيبوصولك من فوق لتحت حتي لو ولد، أي بنت طبعاً بتبقي ماشية لوحدها بتبقي برضه مقلقة علشان متسمعش كلمة لهاش لازمة.

هتلاقيهم بيبيعوا أي حاجة يطلعوا بيها مصلحة وخلاص، فالمنظر قذر قوي والجو العام بيبقي مريب. لو مشيت في نفس الشارع يوم أجازة فهتلاقيه اتحول لسوق الجمعة وشارع عبد العزيز في العتبة و برضه تبقي ماشي إيدك علي جيبك علشان السرقة زي الرز هناك.

** قلة الشرطة هناك في الشارع دي حاجة ملحوظة جداً ومعايير الأمان هناك كشخص بيلف في شوارع مش سياحية منصحش بيها، فده اللي ساعد إن يبقي في فوضي والمناظر دي في أماكن كتيرة هناك.

** مش كل الناس بتحترم إشارة المرور علشان يعدوا الشارع، واللي يقولك غير كدة يبقي هو مشافش حاجة في باريس.

** شوارع مش بتبرق بردو زي ما كنت فاكر ومش هتحس بأمان زي ما انت فاكر برضه.

** هتلاقي عند برج إيفل برضه أفارقة بيبيعوا souvenirs وطبعا بيغلوا السعر علشان أجنبي ولو فاصلت هتاخد بربع التمن.

** شحاتين كتير، لقيت واحد بيشوي درة.

ده مش معناه إنها وحشة هي حلوة بالحاجات الأثرية اللي فيها وطبعا مش هتقوم من قدام برج إيفل. كل ده من وجهة نظري المتواضعة كشخص لفيت شوارع غير سياحية، لأن وجهة نظري كاسائح أكيد هتكون مختلفة.

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *