الرئيسية / أوروبا / محمد سامي يكتب رحلته في بلاد الشنجن: إيطاليا فرنسا هولندا إسبانيا

محمد سامي يكتب رحلته في بلاد الشنجن: إيطاليا فرنسا هولندا إسبانيا

رحلة- محمد سامي:

أنا هحكيلكم عن رحلتي أنا وأصحابي الاتنين لأوروبا، وهتكلم عن كل حاجة بالتفصيل من أول الفيزا لحد ما رجعنا مصر, طبعا كان في فترة تجهيز طويلة قبل الرحلة، ودي طبعا مهمة جدا عشان الرحلة تطلع كويسة بس مش هضيع فيها وقت وهدخل على طول على مرحلة الفيزا.

بما إننا كنا قررنا إن خط السير هيكون إيطاليا وفرنسا وإسبانيا وإن أطول مده هتكون في فرنسا, فكان القرار إننا هنقدم على الشنجن في سفارة فرنسا (ملحوظة: كان معانا شركة سياحة عشان حجوزات الأوتيلات والطيران خصوصا إن كان في أزمة عملة ولو حجزنا أونلاين كنا هاندفع هناك باليورو).

طبعا شركة السياحة عملت الحجوزات الوهمية بالتواريخ على إننا هندخل فرنسا أول بلد مع إننا مبدأناش بفرنسا وخدنا ميعاد في TLS contact وده المكتب المسؤول عن إرسال الأوراق الخاصة بالفيزا لسفارة فرنسا، وكان الميعاد قبل السفر بـ 25 يوم.

المهم جهزنا الورق ورحنا في الميعاد وسلمنا الورق وجالنا رسالة بعدها بـ 6 أيام إن الجواز جاهز عشان نستلمه, طبعا كان عندنا رعب من موضوع الفيزا ده ولا كأننا داخلين امتحان، خصوصا إننا كنا خايفين واحد ياخدها والباقي ميخدهاش (واحد من أصحابي كان جوازه أبيض فلة )، بس الحمد لله كلنا خدنا الفيزا.

المهم بدأنا نشوف الأسعار عشان نحجز، طبعا كل الأسعار زادت خصوصا الطيران واحنا كمان قررنا إننا نروح هولندا بالمرة, بس لقينا المده قصيرة على 4 بلاد (12 يوم) فقررنا نشيل إيطاليا من الخطة.

بعد مداولات ومشاورات كتير حجزنا كل حاجة وكان باقي 13 يوم على السفر, والطيران الدولي كان على  British Airways واكتشفت صدفة إننا لازم ناخد فيزا عشان نعمل ترانزيت في إنجلترا حتي لو مش هنعدي من الجوازات وغيرنا الحجز ودفعنا 1500 جنيه زياده  بس الحمد لله إن أنا عرفت وإلا السفرية كلها كانت بالسلامة.

ندخل بقى على المهم, كانت البداية من هولندا (ركبنا Alitalia ونزلنا ترانزيت في إيطاليا, طبعا خدنا ختم دخول من إيطاليا وناخد بالنا لازم يكون معاك كل الورق اللي قدمت بيه على الفيزا والحجوزات كلها وبعد كده بتدخل الاتحاد الأوروبي وتكمل لهولندا طيران داخلي) نزلنا Schiphol Airport.

أول حاجة عملناها اشترينا كارت 3 أيام للمواصلات (27.5 يورو) وده هيوفر لك كتير جدًا, خدنا القطر اللي هينزلنا أمستردام ونزلنا خدنا أتوبيس لحد الأوتيل West cord hotel 4*  الأوتيل كان جامد جدا (الليلة 275 يورو بالفطار) عملنا check in  ونزلنا نلف في وسط أمستردام وخدنا مركب كده بتلف على المعالم وفيها Audio guide  (13 يورو).

بعد كده لفينا شوية، كنا عايزين ناكل بس مفيش غير بطاطس هي اللي حلال (6 يورو) طبعا كنا تعبانين من السفر فرجعنا الأوتيل عشان ننام. تاني يوم كنا حاجزين Rijk museum (17.5 يورو) (كنا حاجزين كل حاجة أونلاين وطابعين التذاكر) وكان فيه Audio guide  ببلاش وبعد المتحف كان معاد الـ Night life مش هحكيلكوا بقى وأسيب كل واحد يسرح بخياله .

تالت يوم كنا حاجزين Anne Frank house  (14.5 يورو) و نصيحتي ملهوش لازمة وبعدها كنا حاجزين Artis zoo (20.5 يورو) جامده جدا ونصيحة تشتري خريطة (2 يورو) عشان من غيرها هتتسوح وبالليل خدنا جولة وداع عشان كنا خلاص رايحين باريس City of Love.

كنا حاجزين Euro train  (130 يورو) من Amsterdam central station إلى Gard du Nord وده بياخد 3:17 بالظبط.

وصلنا باريس الساعة 9:35 صباحا ورحنا على طول نشتري كارت Navigo ده كارت المواصلات ومدته أسبوع (35 يورو) يبدأ الاثنين وينتهي الأحد، مش مهم انت اشتريته إمتى فخد بالك من المطب ده، لأن التذكرة الواحدة في أي مواصلة بـ 2 يورو (ملحوظة: الفرنسيين عنصريين جدا خصوصا مع العرب ومبيتكلموش إنجليزي حتي لو بيعرفوه).

المهم ركبنا كذا مواصلة لحد الأوتيل (Gold hotel 3*) (مش حلو خالص والليلة بـ 217 يورو بالفطار)  وطبعا وصلنا بدري فسبنا الشنط ورحنا نلف وزرنا SACRE COEUR CHURCH المكان جميل والصور روعة وبعد كده رجعنا على الأوتيل عملنا  check in (بس في طريقنا كلنا من عند واحد باكستاني كل أكله حلال وده بقى كان أجمد حاجة قابلناها، أكله جامد ورخيص نسبيا وعنده أمانة).

نزلنا على Tour Effiel عشان نتصور الصبح ونقعد لـ بالليل وبعد كده روحنا على CHAMPS ELYSEES  وARC DE TRIOMPHE ورجعنا على الأوتيل. تاني يوم ده كان للعظيمة Disney land (45 يورو ولازم تحجز أونلاين لأن سعرها هناك الضعف والطوابير ما أقولكش)، اليوم ده كان يوم تاريخي من حيث عدد الخطواط وخد بالك لازم تروح بدري عشان المسافة حوالي ساعة ونص.

تالت يوم CHATEAU DE VERSAILEES  26.5 يورو) وفيه تذاكر أرخص على حسب انت عايز إيه, ده متحف وقصور وجناين وبحيرات وكل حاجة, خدنا جوه فلوكة (12 يورو الـ 30 دقيقة) في البحيرة جامده جدا.

رابع يوم LOUVRE MUSUEM (19.5 يورو) ونصيحة أجر Audio guide  (5 يورو) عشان من غيره هتمشي زي الأطرش في الزفة ومتعملش حسابك إنك هتخلص المتحف لأنه مبيخلصش، فروح على الموناليزا قبل ما المتحف يقفل عشان بيبقى علىها أمم.

خامس يوم ده كان Shopping وجولة وبعد كده كروز في نهر السين (Bateaux Mouches) (13.5 يورو) بس المطر غرقنا والحمد لله.

اليوم السادس طلعنا على المطار عشان نركب لبرشلونة (British Airways) (95 $). نزلنا المطار واشترينا الكارت كالعادة 5 أيام بـ 32.5 يورو Hola Barcelona ورحنا على الأوتيل Hotel Advance 4* (الليلة 343 يورو بالفطار) كان جامد جدا، عملنا check in  ونزلنا عشان نروح Fountain Màgica de Montjuïc  وCATALUNYA PLAZA  وبعد كده رحنا ناكل  paella  في  La rambla street ودي الأكلة الشعبية هناك وروحنا على الأوتيل.

تاني يوم روحنا Basilica of the Sagrada Familia  (30 يورو) وبعدها CAMP NOU TOUR  (24 يورو) . تالت يوم روحنا L’Aquàrium   (18 يورو) وبعدها طلعنا على Barcelonita beach وده public beach نضيف جدا بس مفيهوش Lockers  ولا Showers فكله ياخد باله من حاجته (ملحوظة: الشاطيئ Topless عشان لو حد بيتكسف (

رابع يوم كان معاد Tibidabo park (28.5 يورو) وكان يوم جمعة وللأسف اكتشفنا إنها بتشتغل سبت وأحد بس لكن رجعوا لنا الفلوس كلها لما عرفوا إن ده آخر يوم لينا في إسبانيا ومش هنعرف نيجي بكرة بس المكان اللي فية البارك جامد جدا وفيه صور كتير لأنها فوق جبل.

اليوم اللي بعده اتجهنا على المطار (خد بالك فيه أتوبيسات بتروح المطار مباشرة بس دي مش في الكارت) وركبنا على الخطوط الهولندية KLM نزلنا هولندا ترانزيت و منها على أم الدنيا.

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *