الرئيسية / آسيا / محمد الرشيدي يكتب رحلته إلى الهيمالايا: مغامرة سيرًا على الأقدام

محمد الرشيدي يكتب رحلته إلى الهيمالايا: مغامرة سيرًا على الأقدام

رحلة- محمد الرشيدي:

في البداية أنا واحد بيحب السفر والترحال لكن مكانش في دماغي خالص إني اعمل مغامرة زي دي, الموضوع ابتدا إني زهقت من روتين ومثلث الحياة والشغل اليومي (شغل – بيت – جيم) وكان نفسي أعمل أي حاجة جديدة تطلعني من الضغط والملل اللي أنا فيه ?

المهم إني كنت قاعد ع النت عادي وبالصدفة لقيت صور عن سلسلة الجبال الهيمالايا والطبيعة اللي موجودة هناك وانبهرت بالمناظر اللي هناك وكمان كان ليا واحد صاحبي طلع المغامرة دي قبل كدا وهو اللي شجعني عليها وهنا قررت إني أخوض المغامرة.

طبعا السفر بيحب اللمة بس لما جيت عرضت الموضوع على أصحابي طبعا استغربوا من المكان ونوع الرحلة وطبعا أغلبهم إن مكانش كلهم رفضوا الحوار لأنهم شايفينه حاجة غريبة (مش عارف ليه) !! ?? ولما لقيت نفسي لوحدي دا زاد إصراري إني أطلع مغامرة زي دي وفعلا انطلقت نحو المجهول ?

بعد بحث رهيب على النت, حجزت التذكرة وسافرت ووصلت بالليل إلى مطار كاتماندو وطبعا البلد فقيرة جدا وده أول حاجة هتلاحظها من المطار اللي تحس إنه مبنى بالطوب الأحمر 🙂 والحمد لله البلد بتاخد تأشيرتها من المطار بحوالي (25 دولار), بعدها ركبت تاكسي لحد الفندق وحجزت أول ليلة في فندق في العاصمة كاتماندو.

تاني يوم الصبح بدأت إجراءات التصاريح وحجز الباص وتنظيم الرحلة, الموضوع أخد مني وقت ومجهود علشان أعرف هعمل إيه بالظبط وإيه الأوراق المطلوبة وازاي هبدأ الرحلة, لأن الموضوع متعدد جدا هناك وفيه أكتر من رحلة بتطلع لكذا مكان في الهيمالايا, فلازم تبقى عارف بالظبط هتروح فين وتعمل إيه . باقي اليوم قعدت أتمشى في البلد واللي كان أشهر المعالم فيها معبد القردة, بس كانت تجربة جديدة بالنسبة لي إني أتعرف على ثقافات جديدة ? .

صحيت الصبح تاني يوم ركبت الباص الساعة 7 الصبح وطلعت على بوكارا في رحلة لمدة 6 ساعات مش هتحس بيهم من كتر المناظر الطبيعية اللي هتشوفها حواليك وبعدها وصلت الفندق بعد الظهر، حطيت شنطي ونزلت أتمشى في المدينة شوية .

مدينة بوكارا مدينة رائعة والطبيعة فيها خلابة وأحلى حاجه فيها بحيرة فيوا, اللي تقدر تاخد فيها مركب وتتفرج على جبال الهيمالايا وانعكاسها على البحيرة منظر في منتهى الروعة ? .

تاني يوم الصبح أجرت عربية تبع الفندق وصلتني لنقطة البداية في الجبل وهناك هتعدي على مكتب أو زي مابيقولوا عليه ( check point ) هتطلع التصريح وهيختموا عليه وهيكتبوا ميعاد طلعوك للجبل ومسار طريقك إيه وابتدت المغامرة من النقطة دي ? .

طبعا إحساسك إنك لوحدك ومعاك شنطتك ع كتفك وماشي ومعاك خريطتك وعينك على قمة الجبل البعيدة اللي المفروض تطلعها كان إحساس لا يوصف. إحساس بالفخر إني قررت أخوض تجربة زي دي وإحساس إنك رحالة بجد والحماسة والأدرينالين في كل جسمك وانت بتتحدى نفسك وبتشوف مناظر طبيعية ممكن متكونش شوفتها غير في خلفيات الويندوز بس ?

كانت أحلى حاجة في الرحلة وانت طالع الجبل لما تقابل ناس بالصدفة زيك في الطريق من مختلف الجنسيات تتعرف عليهم وتكون صداقات معاهم وخصوصا لما تقرروا انكم تكملوا الرحلة مع بعض وتعملوا جروب كل شوية بيزيد وناس تنضم لجروب معاكم (كنت انا الجنسية العربية الوحيدة اللي موجودة وقتها).

وكان لما بيجي الليل كنا بنبات في بيوت على الجبل بدائية اسمها (guest house) وكنا بنقعد طول الليل حوالين النار من جميع الجنسيات كل واحد بيتعرف ع ثقافات التاني وكل واحد كان يعتبر فعلا سفير لبلده, بيحاول يوصل فكرة كويسة عنها (يارب أكون عملت الصح معاهم 🙂 )

وكانت من أحلى اللحظات لما وصلنا لقمة Poon Hill على ارتفاع 3200 متر. وشوفنا شروق الشمس من فوق القمة ? في منظر خرافي يحبس الأنفاس, فعلا ساعتها هتنسى كل تعب وإرهاق الرحلة وتعيش لحظة في صفاء مع النفس من أحلى لحظات حياتك ? .

الخلاصة الرحلة كانت من أروع المغامرات والتحديات اللي عملتها واستفدت منها كتير, أصحاب من كذا جنسية, ثقافات جديدة اتعرفت عليها, هتحس إن مداركك اتفتحت كتير وخرجت من دايرة مغلقة انت كنت حاطط نفسك فيها, وبجد هتكتشف حاجات جديدة في نفسك مكانتش تعرفها لأنك خرجت بره دايرة الأمان اللي انت راسمها لنفسك.

نصيحة سافر شوف الدنيا اتعرف وشوف ناس جديدة جديدة خليك جرئ استمتع بكل لحظة حلوة وأهم حاجه استمتع بالأدرينالين 😉

 

أنصحك أيضًا بقراءة:

فاتن توفيق تكتب رحلتها إلى نيبال: مغامرة فوق الهملايا و قمة افرست

12 معلومة مهمة قد لا تعرفها عن السفر الى نيبال وتسلق جبال الهمالايا و قمة افرست

ازاي تستعد لـ رحلة جبال الهملايا : كل ما تحتاجه لتسلق قمة افرست الأعلى في العالم

بهاء فاروق يكتب من نيبال: مغامرة في أحضان جبال الهملايا و قمة افرست

محمد الرشيدي يكتب رحلته إلى الهيمالايا: مغامرة سيرًا على الأقدام

قمة إفرست | عزت الزيات يكتب مغامرة تسلق أعلى جبل في العالم : 20 يوم هايكنج

شاهد أيضاً

دول لا تحتاج فيزا للسعوديين : أكثر من 70 دولة تسمح بدخولهم دون تأشيرة

دول لا تحتاج فيزا للسعوديين | الرحالة |   يحتل جواز السفر السعودي المرتبة رقم …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *