الرئيسية / آسيا / فريق We Travel يصل إندونيسيا: حاجة زي الجنة كده

فريق We Travel يصل إندونيسيا: حاجة زي الجنة كده

رحلة- إبراهيم النادي ونادر سليمان:

وصلنا إندونيسيا وبالتحديد بالي.? شعور حلو لما نوصل بلد مختلفة مع أول الشهر كده، بنبقى متشوقين إننا نستكشف كل تفاصيلها ونستمتع بجمالها خلال الشهر ?

حبينا نجرب برنامج الكاوتش سيرفنج، وبالمرة نوفر شوية فلوس للبلد اللي بعد دي، واللي شكلها كده هتخلص فلوسنا وتخلينا نرجع السعودية ?

الراجل اللي لابس أحمر هو اللي استضافنا عنده، وبجد راجل جدع وابن بلد ومغني مشهور في بالي كمان، وبيحب يستضيف الرحالة في بيته، واللي لابس أسود في أزرق ده روسي وقصته قصة.

كان متشرد وحياته صعبة وربنا كرمه واشتغل مصمم مواقع والزهر لعب معاه ومع ذلك بيسافر ويلف العالم، وعموما الي حابب يسكن في أي بلد ببلاش يجرب الموقع ده اللي سبق وذكرناه في بوستات قبل كده.

https://www.couchsurfing.com/

وطبعا إندونيسيا من غير فيزا للمصريين، ختم بس لمدة 30 يوم  ?

وبما إننا وفرنا فلوس السكن وسكنا ببلاش، جيه الدور على الموصلات للأماكن اللي خططنا ليها واحنا مريحين في بيت المستضيف ? قررنا نسترخي شويه ونروح المكان ده اسمه Hot spring للناس الي عايزه تروق بجد وبيطل على بالي كلها من فوق، حاجة زي الجنة كده، فيه مساج وجاكوزي والجو فيه مهيأ للـ couples ورسوم دخول المكان بحوالي 100 جنيه تقريبا ومعاها سناك وعصير 😀

بما إن أول مكان حابين نروحه بيبعد حوالي ساعتين، حبينا نجرب حاجه جديدة في المواصلات ولقينا هناك العربيات رخيصة جدا، قمنا أجرنا عربية يوم واحد من نفسنا من مكان اسمه شاطئ سانور (sanur beach) كلفتنا حوالي 150 جنيه كده.

واتحركنا من denpasar المكان اللي استضفنا فيه واللي فيه المطار ووسط البلد على أبعد مكان في جزيرة بالي، ويا سلام على المناظر اللي شوفناها واحنا بنسوق العربية صحيح إن الدريكسيون على اليمين بس الحمدلله عرفنا نتصرف ورجعنا بالسلامة ?

السواقة في إندونيسيا لها طعم تاني ? وأهي ياجماعة السيارة اللي حكينا عنها قبل كده، وبجد التجربة دي جامدة جدًا لأن السواقة في شوارع إندونيسيا غريبه وطول ما انت سايق تشوف طبيعة وعمرك ماتزهق ?

بس حاسبوا من الموتسيكلات لأننا عملنا حادثة وخبطنا واحد وطيرناه الناحيه التانية، والمشكلة إننا نزلنا نشوفه قام ركب ومشي عادي جدا ?? يعني لا شرطه ولا تأمين ولا أي حاجة فخدوا بالكم 😀

المهم بعد مالفينا بشوارع بالي وآخر أيامنا فيها رايحين نرجع السيارة وربنا يستر 😀 واستنونا في البلد اللي بعديها ??✈

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *