الرئيسية / أوروبا / فريق “كابل ترافيل” يواصل رحلة فرنسا: أهم 4 أماكن سياحية في باريس

فريق “كابل ترافيل” يواصل رحلة فرنسا: أهم 4 أماكن سياحية في باريس

رحلة- كابل ترافيل:

كل حاجة في باريس حجمها أكبر بكتير من اللي بيبان في الصور، ومن ضمنها برج إيفل، حاجة كده عملاقة، وكمان عشان البرج موجود في قلب باريس، مش محدوف في حتة لوحده ف ده بيبينه عملاق وسط المباني التانية.

الإحساس بعظمة المكان وجماله بيبتدي وانت رايح عليه مشي وشايفه من الشوارع الداخلية، وكل شويه يبان منه حته أكبر، والصورة الرائعة بتكتمل لما بتشوف الهيكل العظيم ده، وقد إيه هو كبير جدًا وعملاق.

طبعًا بسرعة هتكتشف إن في طوابير جبارة للناس اللي عاوزه تطلع البرج، اللي بتطلعه بـ ٢ أسانسير واحد منهم بيمشي بالجنب في قدم البرج والتاني بيمشي مستقيم للقمة.

متخافش من الطابور وتتصور وتمشي، لازم تطلع مهما وقفت واستنيت، متطلعش نص البرج وتنزل، لااااااازم للقمة، لو حجزت قبلها أونلاين هتوفر كل الوقت والحيرة دي.

إحساس الصعود لازم تجربه بنفسك، ده غير إن المنظر من فوق خرافي، ولازم تخلي بالك إن الجو تحت حمادة والجو فوق حمادة تاني خالص.

خلاص رحت البرج واستمتعت بالطلوع، طب إعمل حسابك بقى انك لازم تزور برج إيفل مرة تانية بس بالليل عشان تشوف البرج وهو منور وكمان كل ساعة الإضاءه بتبقى أقوى وفيها حركات لمدة تقريبا دقيقتين، حاجة كده مبهرة جدًا.

على كوبري الحب في باريس، سهل قوي تطلع القفل المصري الأسود الأصيل من وسط مليون قفل ? ? ? ? ? ? الأماكن اللي شبه دي انتشرت في مدن كتير في العالم، بس طبعا أشهرها اللي موجود في باريس، لكن الحكومة هناك قررت إنها تشيل الأقفال الموجودة على الجسر لأنها بقت خطر من كتر عددها و شالوا حوالي ٧٠٠٠٠٠ قفل وحطوا مكانها سور مقفول مفيهوش فراغات.. الناس هتبطل يعني؟؟؟؟  ? ? ?

لأ طبعا، الناس بدأت تحط الأقفال على السور الجانبي لنهر السين. كمان هتلاقي أقفال في أماكن سياحية تانية في باريس لكن بعدد أقل بكتير، بتوصل للجسر ده وانت بتتمشى على جانب نهر السين ما بين الـ Notre Dame و الـ Louvre.. التمشية هي أهم وأحسن وسيلة عشان تكتشف جمال الأماكن وروعتها.

وانت في باريس مهم تزور كنيسة القلب المقدس Sacre-Coeur  ?? ?? ??  ⛪ ⛪ ⛪ الكنيسة دي اللي شبه القلعة من بره، اتبنت بين أعوام ١٨٧٥ لـ ١٩١٤ على تل الشهداء Montmartre واللي بتعتبر تاني أعلى قمة في باريس بعد برج إيفل ومن أهم المزارات السياحية في باريس.

الـ Sacre-Coeur مش مجرد كنيسة أو آثار بتزورها، انت بتستمتع بمكان كامل كبير مش مجرد الكنيسة وبس. من أول ما بتخرج من محطة المترو المجاورة ليها وانت لسه بتمشي في الشوارع الداخلية، بتبتدي تشوف الهيكل الأبيض من بعيد وبتبتدي تحس بجمال وروعة المكان.

كل ما بتقرب أكتر الصورة بتقرب أكتر وبتبقى أجمل، سلالم كتير وأشجار وناس، وانت نازل انزل من طريق مختلف عشان تستمتع بالمكان من كل جوانبه. هتلاقي أسانسير بينزل السلالم الكتير قوي دي بالورب لو حابب تجربه، أو تنزل على السلالم وتستمتع بالأشجار الجميلة من حواليك.

متحف اللوفر  ?? ?? ?? ده بقى حاجة من الحاجات اللي بيقولك عليها must see.. يعني مينفعش تروح باريس من غير ما تزور متحف اللوفر سواء كنت محب للفن أو لأ. لو انت محب جامد للفنون التشكيلية والرسم والنحت والحاجات دي يبقى لازم تروح اللوفر من الصبح بدري لحد ما يقفل على حوالي الساعه ٤ ومش هتكون خلصته.

زي ما بنقول إن كل حاجه في باريس بتطلع أكبر بكتير من اللي في خيالنا ف متحف اللوفر أكبر دليل على كده. المتحف كبير جدًا جدًا. عملاق بصورة غير طبيعية، لا يمكن تخلصه ده غير إنك ممكن تتوه جواه من كتر الغرف والممرات.

التماثيل  اللوحات في كل مكان حتى على السقف، ده غير إن طريقة العرض ممتعة وبتوفر مساحات للحركة والاستمتاع لأعداد كبيرة جدا. ده غير إن في أماكن كتيرة ترتاح عليها وتتفرج في نفس الوقت.

إنما لو انت بقى مش محب كبير للفن ف الأفضل إنك متروحش هناك من أول اليوم، شوف انت حابب تقضي هناك وقت قد إيه وعلى الأساس ده روح متأخر شوية. لو انت رايح عشان الموناليزا، هتكتشف إنها لوحه صغيرة جدًا وحواليها ناس كتير جدًا جدًا، وقدامها في نفس الأوضه لوحة بعرض وطول الحيطة شكلها جميل جدًا.

متفوتش الحاجات الأساسية في كل مدينة، بس لو مكنتش مستمتع جدا، امشي وروح مكان تاني. نظم وقتك كويس عشان ده أغلى حاجة عندك عموما وفي السفر خصوصا.

شاهد أيضاً

رحلتي الى دبي

رحلتي الى دبي | فتاة مصرية تكتب عن رحلتها إلى دبي: إنسى كل اللي سمعته

رحلتي الى دبي | الرحالة | رحلة- صافية بركة:   أول حاجه تعملها قبل ما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *