fbpx
الرئيسية / تقارير مميزة / فرصة.. استرجع 18% من قيمة مشترياتك وانت راجع من السفر

فرصة.. استرجع 18% من قيمة مشترياتك وانت راجع من السفر

تجربة- عمرو شريف:

الموضوع ده مهم جدا للستات اللي مغرمين بالشوبينج وهم مسافرين بره مصر، وبرضه مهم جدًا للرجالة اللي بيغرموا تمن الشوبينج بتاع مراتاتهم 😀 ، في أسرار عن إزاي ترجع جزء من فلوس الشوبينج عن طريق إنك بتاخد تاني الضرايب اللي كانت مضافة علي سعر السلعة، اللي اشتريتها وانت جوه البلد، وبتاخد الفلوس وانت طالع من المطار. والموضوع ده للناس اللي مجانين شوبينج هيكون مبلغ محترم، يعني يا حلاوتهم هيدونا فلوس واحنا ماشيين؟!، أيوه هيدوكم إنما ما يدخلش في اللعبة دي فلوس أوتيل أو مطاعم أو مزارات لازم تكون سلع من محلات معينة.
أسرار استرجاع ضرائب المشتروات :
– أولًا مش كل دول العالم فيها موضوع التاكس فري أو الفات، في 130 دولة في العالم فيها الموضوع ده، أشهرهم دول الاتحاد الأوروبي جميعا، وتركيا وأستراليا وإنجلترا وماليزيا ولبنان وقبرص، إلخ.
-ثانيا لازم تكون مسافر بره الدول دي إلى دول تانية مفيهاش تاكس فري، يعني مثلا طالع من فرنسا لمصر أو طالع من ألمانيا لدبي، كده يعني.
– ثالثا لازم تعرف إن في شروط، يعني كل دولة حاطه شرط المبلغ اللي تشتري بيه علشان تاخد الضرايب وانت خارج، والشرط ده معناه إنك في نفس الفاتورة من نفس المحل ما تقلش عن مبلغ معين مثلًا تركيا 108 ليرة في المرة، يعني مش تروح وتيجي من نفس المحل في نفس اليوم أو كل يوم وتشتري بـ 20 أو 30 ليرة وتيجي تقول أنا كملت الـ108 ليرة آخد بقي وأنا طالع الضرايب، لا، لازم في المرة الواحدة مشترياتك ما تقلش عن 108 ليره يعني ممكن مره تشتري بـ 200 و مرة بـ 180 ومرة بـ 120 كده يعني، ودولة زي اليونان مشترياتك ما تقلش في المرة عن 120 يورو أما باريس 175 يورو وإنجلترا 30 إسترليني ولبنان 150 ألف ليرة وماليزيا 300 رينجت.
– رابعا مش كل المحلات بتقدم التاكس فري في الدولة، لازم يكون المحل حاطط علامة التاكس فري علي الباب وفي الحالة دي وانت بتحاسب بتقوله عايز وصل لتاكس فري فبيديك وصل بمشترياتك وقيمتها وقيمه الضريبة اللي هترجع لك ويحطه جوه ظرف تقدمه في المطار.
– في محلات كثيرة وهي الماركات الكبيرة بتديك فلوس التاكس فري وانت واقف بتحاسب بس يا حلو بتدي لهم كارت الفيزا بتاعك علشان لو ما طلعتش بالمشتريات دي بره البلد يخصموا منك الفلوس تاني، وفي محلات جوه مولات بعد ما تخلص الشراء تروح في مكتب في المول بتقدم على التاكس فري وتاخد فلوسه كاش وانت واقف، بس يا حلو في الحالات دي لازم تكون ماشي بالباسبور بتاعك في إيدك وبرضه بتدي لهم كارت الفيزا.
– وانت في المطار بقي بيكون معاك كل وصولات التاكس فري تحطها كلها جنب بعض والحاجات كلها اللي اشتريتها تكون الموجودة في شنطة واحدة لانهم بيراجعوا الحاجات دي من الوصل إنها موجودة في الشنطة، يعني ممكن تفتح الشنطة وتفرش وتدور على اللي هو عايزه ولازم تكون الحاجة بالتيكت مش لبستها، وتقول هي دي لا لسه بشوكها ولفيتها، ولو موبايل يبقي بعلبته مقفول، وقبل ما تطلع الشنط في البوردينج روح مكتب التاكس فري وقدم الوصولات ووريهم الحاجات لو طلبوا، غالبا اللبس مش بيشوفوه غير في إسطنبول إنما بيشوفوا ساعات وموبايلات أو أي حاجة غالية حبتين في أي دولة.
– الفلوس اللي بترجع لك برضه بتختلف من دولة للتانية، بس عامة بتكون كالآتي: فرنسا 12% ترجع من مشترياتك وألمانيا 11%، قبرص 9%، ماليزيا 5% وبتختلف طبعا يعني الموبايلات غير الهدوم غير الساعات غير الدهب وطبعا الإلكترونيات أغلى حاجة عليها ضرايب ممكن يرجع لك 18% وأقل حاجة اللبس يرجع لك 4% و طبعًا برضه النسب دي بتختلف من دولة لدولة، و طبعا فيه مصاريف بتتاخد يعني مش شرط النسبه كلها راجعه ليك، لأن غالبا في المطارات شركات خاصه هي اللي بتعمل لك موضوع التاكس فري وبياخدوا عمولة.
– طيب لو احنا مثلا كنا في روما و طلعنا منها لباريس واشترينا من روما بالعبيط طيب نطلب التاكس فري إزاي إذ كنا احنا بنسافر طيران داخلي ومش طالعيين بره دول الاتحاد الأوربي، يبقي يا حبيببنا في الحالة دي بتقدم التاكس فري في مطار باريس اللي هو آخر نقطة طالع منها بره دول الاتحاد الأوروبي.
يارب نكون أفدناكم ولو عايزيين تعرفوا كل دولة بتحاسب علي كام، ده موقع بتاع التاكس فري، اختار الدولة وحط المبلغ اللي اشتريت بيه، وهيظهر لك المبلغ اللي هتاخده تاني
http://www.globalblue.com/customer-services/tax-free-shopping/refund-calculator/

شاهد أيضاً

خريطة الامارات

خريطة الامارات السياحية : دليلك الشامل للسياحة والإقامة والتنقل في الامارات

خريطة الامارات | الرحالة |   دولة الامارات العربية، دولة الانجازات والمعجزات، التي استطاعت فعل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *