الرئيسية / آسيا / شاب مصري يكتب رحلته إلى إندونيسيا: حبيبي على بالي

شاب مصري يكتب رحلته إلى إندونيسيا: حبيبي على بالي

رحلة- محمود:
على بالي، على بااالي، حبيبي على بالي 😀 النهارده هنتكلم عن أكتر مكان الأجانب عموما بيحبوه فى جنوب شرق آسيا، وكل ما هتقول قدام حد إنك سافرت جنوب شرق آسيا هيسألك على طول رحت بالي؟، لأن بالي من أجمل الجزر ولأن فيها أماكن تاريخية تجنن والخضرة والجمال اللي في كل مكان. بالإضافة لجو حفلات جامد آخر تلت أربع حاجات 😀
اخلط بقى كل ده، شواطئ روعة وغابات خضرا على قرود وحيوانات على ناس طيبة وحبوبة على دايفنج سبوت جامدة جدا على جبال ممكن تتسلق بقى لو فيك حيل 🙂 وبركان باتور من أكبر براكين العالم، وضيف على كده مكان أسعاره في الحنين جدا والفنادق هناك فى كل المستويات وكل الميزانيات 😉
الحاجات دى كلها تخلي جزيرة بالي مكان لراحه البال والدماغ الرايقة وأجمل شهر عسل ممكن يتقضى لو عاوز تروح وجهة واحدة وتقعد فيها هو ده المكان. تروح في أي وقت ماعادا شهر ديسمبر ويناير عشان المطر والشواطئ بتتقفل.
تجربتى الشخصية لزيارة جزيرة بالي:


أنا طلعت من ماليزيا لجزيرة بالي على طول كان airasia عاملين عرض أخدت التذكرة رايح جاى بـ 500 جنيه لو جاى من مصر ممكن تنزل كوالالمبور وتحجز طيران إير آسيا برضه, يبقى تذكرة طيران ماليزيا وزود عليها 500 جنيه. بالنسبه للفيزا (الحلو إن مفيش تقديم على فيزا وورق وإجراءات ووجع قلب) العمله هناك الروبية والدولار تقريبا بـ 13000 روبيه هتلاقي نفسك فجأه بقيت مليونير 🙂 بس متفرحش قوى لأن الأسعار برضه فيها تضخم بس برضه الحياة رخيصة.
بس خلي بالك علشان بالي فيها حاجات كتير تتعمل فانت لازم تحدد وانت رايح انت عاوز إيه، يعني لو عاوز تلف وتشوف وكده دى ليها خطة, ولو عاوز غطس وأعماق دى ليها خطة تانية خالص , ولو عاوز استجمام وروقان وانت وميجا وبس 🙂 دى برضه ليها خطة حمادة آخر.
هنتكلم عن الخطة الميكس اللي هى هتروح وتتفسح وبرضو تستجم وممكن تعمل سنوركلنج في النص.
فى كذا مكان للإقامه في بالي فى كوتا بالي ودى المنطقة المركزية اللي فيها كل النشاط وفى مناطق منعزلة بقى عشان الخصوصية وكدا سيمنياك وابود ونوسداوا (المناطق دى شاليهات خاصه وفلل في المعظم).
لو مسافر لوحدك فى هوستل جامد جدا أنصح بيه اسمه mama بـ 4 دولار في الليله تقريبا وقريب من كوتا وسيمناك وبيقعد فيه الأجانب الشباب اللي زيك بالظبط فبتتكحرتوا مع بعض.
لو شهر عسل هتدور لك على فيلا لطيفة أو أوضة زوجية فى فندق بنتكلم فى 50 دولار لليلة لو فى فندق و200 دولار لو هتاخد فيلا بحمام سباحه بمساجك بفطارك بكل ما تتمناه وأكتر. أنا مجربتش شغل الفيلل دا بس منظر الفلل نفسه من برا يخليك تحسد الناس اللي جواها جدا عقبالكم جميعا 😉
ماذا تفعل فى أسبوع ببالي؟
أول حاجة هتروح تتفرج على المعابد وتتصور هناك بس خد بالك المسافة طويله فاشحن الموبايل أو الكاميرا عشان هتزعل جامد لو فصل وانت هناك.
• فى عندك معبدين جامدين جدا تمام ايون واولون دانو ممكن وانت قاعد فى الهوستل هتلاقي ناس تانية عاوزة تروح هناك هتشيروا فى تاكسى لأو توكتوك لطيف وكل واحد هيدفع 4-5 دولار في المشوار كامل.
• لو ناوى تتسلق جبال فى رحلات هايكنج منظمة وفي إنك تنطلق مع نفسك بس خد المنظمة لأنهم عارفين الأماكن اللي تستاهل إنك تشوفها ودى هتكلف بتاع 100 جنيه للفرد وفى جبل كاوى دا برضو حلو بس مشوار.
• الغوص ومشاهده أعماق البحار وعالم الأسماك هناك حاجة جميله برضه وهتشوف سمكة نيمو (clown fish) كتير جدا هناك. ورحله السنوركلنج بـ 100جنيه لمدة ساعتين تقريبا. الغوص أغلى ولو معاكش رخصة وأول مرة تغوص هتحتاج تدريب فمنصحش بيه إلا للي متدرب وبيحب الغوص فعلا إنما لو للتجربة السنوركلنج كفاية جدا.
• لأثرياء القوم كان فى ملاهى مائية هناك شكلها لذيذ اسمها بالي واتر بووم بس كانت بـ 40 دولار فمدخلتهاش بس لو عندك استعداد وكدا انطلق.
• حديقة الطيور في بالي فيها طيور جميلة جدا وفلامنجو وحاجات مبنشفهاش إلا فى عالم الحيوان ودى كانت في الحنين 20 دولار 🙂
• عودة للأشياء المجانية 🙂 مزارع الأرز منظر جميل وبتشوف الناس وهى بتشتغل وتتصور معاهم وبيقعدوا يضحكوا عليك وانت بتسلم عليهم 😀
• في بقى أنشطة بحرية كتير عندك الباراسيلنج والسيرفنج والجيت سكاى وكل الحاجات دى موجودة الأسعار مش بتزيد عن 200 جنيه.
• الأكل بقى وده حدوتة وقصة ورواية السى فود بالذات هتعيط كده وانت بتاكل الاستاكوزا بالصلصة ودافع فيها 20جنيه بس , وحاسس إن اللي شفته قبل ما تشوفك عينيا عمر ضايع وجمبرى بقى وسمك وقرش وكل خيارات البحر.
جزيرة بالي مكان جميل جدا للشباب ولشهر العسل, وممكن تقضى فيها وقت طويل, يعنى دى المكان الوحيد اللي أقدر أقولك ممكن تقعد فيه شهر فعلا متزهقش. اللي اتفرج على فيلم Eat, Pray, Love هيفهم قصدي 😉

هذه الرحلة منشورة بالاتفاق مع صفحة Travel Secrets

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *