الرئيسية / تقارير مميزة / دليلك الكامل لفهم موقع rome2rio: احترف المواصلات العامة

دليلك الكامل لفهم موقع rome2rio: احترف المواصلات العامة

تجربة- هشام أحمد:
لما بتوصل أى بلد جديدة بتبقى مشغول إنك تعرف المواصلات فى البلد دى نظامها ايه. أغلب الناس اللى بتسافر بتحاول تستخدم المترو لأنه الحل الأسهل والأرخص فى معظم الدول، غير إن كمان المترو فى معظم الدول بيبقى مغطى تقريبا أغلب البلد فسهل إنك تتنقل هناك بتكلفة قليلة، كويس قوي لحد كده؟.
طيب فى ناس كتير بتبقى قلقانة من حتة أى بلد جديدة حتى لو معاها خرايط المترو للبلد دى ومعاها حق، ليه؟، عشان أى حد مسافر بلد جديدة بيسأل هو أنا هروح هناك إزاي حتى لو فاهم خريطة المترو؟.
مثلا لو عايز أروح أى معلم سياحى هعرف منين إن محطة المترو اللى اسمها كذا لما هنزل عندها، هلاقى المكان اللى بدور عليه ده إن شاء الله؟
لأ يا بيه، ما هو أصل خريطة المترو لوحدها كدا حتى لو حافظها مش هتساعدك هناك خالص لوحدها بس.. بجد؟، ده حقيقى فعلا، لازم تعرف الأماكن اللى انت عايز تروحها دى موجودة جنب أنهى محطة، ودى هعرفها ازاى؟.
عن طريق الموقع الرائع ده www.rome2rio.com الموقع ده مهم جدا لأى حد مسافر، عشان بتقدر عن طريقه تعمل سيرش بالأماكن السياحية كمان مش شرط من محطة لمحطة.
يعنى بمجرد ما تعرف مكان الإقامة بتاعتك جنب أنهى محطة وتعرف اسمها ممكن تكتبها فى الموقع ده، وتقوله على أى مكان نفسك تروحه وهتشوف العجب، إيه بقى اللى هيحصل؟.
1.هيقولك المكان اللى انت عايز تروحوا ده جنب أنهى محطة ويبعد قد ايه بالظبط عن المكان اللى انت جاي منه.
2.هيقولك بالتفصيل الـ Route اللي هتمشى فيه لحد ما توصل، يعنى مثلا هيقولك اركب المحطة اللى اسمها كذا، وغير فى المحطة الفلانية اللى لون خطها كذا عشان تكمل وتوصل للمكان اللى انت عايزه اللى جنب المحطة اللى اسمها ايه.
3.هيطلعلك كل الأوبشنز الموجودة بين المكانين دول يعنى لو الطريق ده ممكن يتراح بالمترو وممكن يتراح بالأوتوبيس هيقولك، وهيقولك كمان ايه رقم الاتوبيس.
4.هيقولك إيه سعر كل حاجه يعنى المترو بكام والأتوبيس بكام والتاكسى بكام فتقدر تختار أرخص حاجه.
5.الموقع ده بيكمل معاك لحد ما توصل المكان، يعنى إيه؟ يعنى المكان اللي انت رايحه لو مش جنب محطة مترو، هو هيوصلك لأقرب محطة وبعد كدا هيقولك كمان تركب إيه من هناك عشان توصل.
6.استخدامه رائع فى السفر بين المدن اللى جوه نفس البلد، يعنى مثلا لو انت فى باريس فى فرنسا وعايز تروح مارسيليا، اكتب له كده، هيقولك ممكن تروح بالقطر وسعره بكام وممكن تروح بالأتوبيس وسعره بكام وممكن تروح طيران وسعره بكام.
بعد ما تعمل كده لازم تعرف أنظمة اشتراك المواصلات للبلد اللى انت رايحها وتقرأ عنها كويس لانها بتبقى كذا نظام، فشوف انهى أرخص نظام ليك، عشان لو قررت انك متجبش ولا نظام من اللى موجودين فى البلد وإنك كل مره تقطع تذكرة وتركب المواصلات، هتبقى غالية قوي كده وبالذات لو بتتنقل كتير.
فيه كروت أرخص وأفيد بكتير من إنك كل مره تقطع تذكرة. زى مثلا Octopus Card اللى فى هونج كونج و Your singapore فى سنغافوره و Istanbul Card فى اسطنبول، الحاجات دى أحسن بكتير ومفيدة قوى، مثلا انت تقدر تستخدم الـ Octopus Card ده فى الشوبينج أو انك تشترى بيه أى حاجه هناك، يعنى مش مضطر تمشى بفلوس معاك كتير، ممكن تشحن الكارد ده وتتعامل بيه زى الـDebit Card بالظبط
وأغلب المحلات والماركت بيتعامل بيه عادى هناك وبتركب بيه أى حاجه هناك بتتحرك، مترو، أتوبيس، أى حاجة.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *