الرئيسية / تقارير مميزة / داليا كمال تكتب عن الإدمان الشرعي: 5 صفات لا تعرفها عن مدمني السفر

داليا كمال تكتب عن الإدمان الشرعي: 5 صفات لا تعرفها عن مدمني السفر

كتبت- داليا كمال:

أنا مدمن ? , ومش عاوز أتعالج ? أنا مدمن سفر ✈? أكيد قابلت ناس بيستهزؤوا وبيستهيفوا حبك وإدمانك الشديد أو رغبتك الشديدة في السفر والمغامرة، وبيستغربوا إزاى انت مستعد تسافر بأقل الإمكانيات، وممكن تنام على سرير في غرفة مع ناس متعرفهمش, و ممكن تسافر شهر بشنطة على ظهرك, وممكن يحبطوك ويقولوا لك حوش فلوسك عشان تتجوز أحسن.

اتضح بقى يا أساتذة يا محبطين يا أعداء السفر والمغامرة إن إدمان السفر ده له فوايد كتيرة قوي هنقول لك عليها عشان لما حد المرة اللي جايه يحبطك ترد عليه بالبوقين دول وسيبه وروح حضر شنطتك.

1-إدمان السفر هو أداه تحفيزية بحتة، هقولك إزاى عشان تبقى مدمن على حاجة (بعد الشر من الحاجات الوحشه نقصد إدمان على الحاجات المفيدة) لازم لك فلوس عشان تشبع ذلك الإدمان وعشان تجيب فلوس (ملناش دعوة بالطرق غير الشرعية) لازم تشتغل زيادة أو تشتغل كذا حاجة أو تشتغل شغلانة من اللي بيجيبوا فلوس حلوة، وعلشان ده يحصل لازم تبقى مثلا دارس ومعاك شهادات، معنى كده إنه بيحفزك تدرس كويس وتشتغل أكتر عشان تعرف تجيب فلوس السفر.

2-إدمان السفر بيخليك تفكر لقدام، إزاي بقى؟ مثلا في قعدة كده مع أصحابك هتلاقى نوعين من الناس، أول نوع اللى دايما بيتكلم ويهرى فى نفس الهري بتاع كل مرة، وكلها حاجات حصلت (فى الماضى)، وبيتفاخر بإنجازاته وبيبقى وقت ملل آخر حاجة, النوع ده طبعا لا بيسافر ولا بيتحرك لأي حتة مأنتخ في بيتهم, والنوع التانى بيتكلم عن اللي جاى ونفسه يعمل إيه وهيعمل إيه وبيخطط لإيه وده يا إما هيموت ويسافر وبيسعى لده (زى حالاتى) يا إما بيسافر فعلا وخاربها، اختصار الليلة دي إن مدمنين السفر تفكيرهم دايما في قدام مش محبوسين في الماضي.

3- إدمان السفر بيديك هدف تحلم بيه وتوصل له، أكيد قابلت في حياتك ناس معندهاش هدف في حياتها أو مش عارفين هم عايزين إيه وده يودينا للنقطة اللي قبلها، إنهم ناس مملة في كلامهم جدًا. لكن المدمنين على السفر بيبقى عندهم حلم وهدف وشغف لتحقيق حلمهم ودايما في تقدم مستمر سواء فكريًا أو عقليًا عشان دايما بيدوروا إزاى يوصلوا للي هم عايزينه وده هيبقى أسلوب حياة بالنسبة لهم.

4-إدمان السفر بيعلمك تجرب حاجات جديدة، مدمنو السفر بيعشقوا يجربوا حاجات ويكتسبوا خبرات جديدة، ودايما بيحاولوا يخرجوا برا الكومفورت زون بتاعتهم (المنطقة المريحة بالنسبة لهم يعنى) وكمان بيبقوا حابين ومستعدين للمخاطر وده فى كل حاجة في حياتهم سواء علاقات, شغل, أي حاجة ليها تطورات, مش بيقفوا عند مرحلة ويستكفوا منها, ولازم تبقى من الشخصيات دي لأن السفر بيغصبك تجرب كل حاجة جديدة من أكل لشرب لمكان لثقافة للغة لكل جانب من جوانب الحياة.

5-إدمان السفر بيقلل من الخوف والتوتر في مواقف معينة، هيدهشك نسبة الناس اللي عندها رهبة من المواجهة وإنها تتعرف على أشخاص جديدة وتتكلم قدام ناس, وإذ بالمفاجأة يا مؤمن إن السفر بيحطك فى المواقف دى كلها وأكتر, من غير ما تحس أصلا لا إراديا كده تلاقى نفسك راجع بلدكم برنس في نفسك, عندك ثقة عالية ومش خايف من أي مواجهة, غير اللي انت كنت فيه خالص.

هذا التقرير يتم نشره بالاتفاق مع صفحة Travel Secrets

شاهد أيضاً

الرحالة ابن بطوطة

الرحالة ابن بطوطة : معلومات عن حياة ورحلات أهم رحالة عربي مغربي

الرحالة ابن بطوطة | الرحالة | يعتبر الرحالة ابن بطوطة من أبرز الشخصيات التاريخية التي …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *