fbpx
الرئيسية / تقارير مميزة / حقق حلمك واحترف السفر: دليلك الكامل من الألف للياء (1)

حقق حلمك واحترف السفر: دليلك الكامل من الألف للياء (1)

تجربة- هشام سليم:

بما إن هدفنا نساعدكم خطوة بخطوة علشان تحققوا حلمكم في السفر, فقررنا ننزل سلسلة على أجزاء تساعدكم في معرفة الخطوات من البداية, علشان تكونوا جاهزين إن شاء الله لو حبيتوا تقدموا على أي سفارة ومتواجهوش أي رفض.

أول خطوة.. استخراج جواز السفر:

مطلوب منك الآتي لو حتطلع جواز سفر لأول مرة:

  • بطاقة الرقم القومي سارية المفعول.
  • لو أكبر من 16 سنة هتقدم البطاقة لو أصغر من 16 سنة يكتفي بشهادة ميلاد مميكنة.
  • 3 صور خلفية بيضاء حديثة مقاس 6*4.
  • مستند التجنيد بالنسبة للذكور.
  • المؤهل الدراسي في حالة عدم ثبوته ببطاقة الرقم القومي أو شهادة قيد دراسي معتمدة بالنسبة للطلبة.
  • مستند إثبات الحالة الاجتماعية بالنسبه للإناث.
  • جواز السفر السابق فى حالة التجديد.

و قيمة جواز السفر 135 جنيه وممكن تستلمة بعد 3 أيام.

 

تظبيط جواز السفر:

مشكلة طبعا بيواجهها أي حد بيقدم على الفيزا لأول مرة، وهي إنه مسافرش قبل كده، وده أحد الأسباب الرئيسية للرفض من كل السفارات تقريبا، بس حفظًا لماء الوجه بيكون سبب الرفض الرسمي هو عدم وجود روابط قوية، أو عدم وضوح سبب السفر وهكذا.

الحقيقة إن المصريين بالذات معروف حبهم للسفر ونسبة كبيرة للأسف بتكسر فيزا ومش بترجع، وده بيسبب مشكلة للناس اللي بتحب السفر فعلًا، وبيخللي سمعتنا مش ولا بد حبتين.

دايما فيه “أول مرة”، وده موضوعنا النهارده، إزاي ورقك يكون قوي ومستحيل يترفض، لو انت مش موظف في شركة معروفة وراتبك كبير بيتحول علي بنك بانتظام أو مسافر تعليم أو مسافر معرض خاص بالبزنس بتاعك، بدعوة تجارية)، لو انت مش الشريحة دي اقرا الموضوع ده كويس جدا.. نتفق إنك محتاج مدة من سنة لسنتين عشان تقدر تدخل أي سفارة وتاخد فيزتها بسهولة، هنعمل إيه في المدة دي.

 

  • ☆سافر دول فيزتها سهلة:

تركيا، إندونيسيا، نيبال، المالديف، الهند، تونس، لبنان، تايلاند، ماليزيا، كوريا الجنوبية, جورجيا.

شايف الدول دي؟ دول سياحية من الدرجة الأولي مش بتحتاج فيزا زي نيبال، إندونسيا، المالديف، ماليزيا، أو دول فيزتها سهلة جدا زي الباقي، لازم يكون شكل جواز سفرك كويس، هتسافر دولتين على الأقل تروح وترجع، كده حلينا جزء من المشكلة وهي، عقدة “الأول مرة” والجواز الأبيض.

 

  • ☆عنوان السكن

عنوان السكن المذكور في الجواز عامل مهم جدًا في أوقات كتير في تقييم الشخص المتقدم، إزاي يعني؟ أقولك إزاي، لو حضرتك ساكن مثلا في منطقة شعبية في حارة مسعود متفرع من شارع النجدة دوران سونيا، عندك حلين اتنين زي لانشون.

الحل الأول: نغير العنوان لمكان أفضل ومعروف عند أي قريب مثلًا ساكن في مكان أحسن، يكون العنوان مثلا مصر الجديدة ش الميرغني. أغلب العاملين في السفارات عارفين المناطق الراقية من الشعبية، وده طبعا لا يقلل أبدًا من الشخص، بس بيكون له تأثير في أوقات.

الحل الثاني الأسهل: هو اختصار العنوان يعني مثلًا، ش النجدة رقم 30, وحلو قوي كده 🙂

 

☆●المهنة في الجواز:

وهنقف هنا كتير قوي لحد ما رجلينا توجعنا، المهنة في جواز السفر يا جماعة موضوع مهم جدا جدا، (حاصل علي) دي مهنة نحاول نشيلها من الجواز، والموضوع مش صعب، لو محاسب حر أو مهندس حر أو موظف في شركة بيكون أفضل بكتير.

إزاي أغير المهنة؟ لو عايزين نسافر لازم نتعب شوية واتفقنا إن تظبيط الورق محتاج وقت ومجهود، والموضوع طويل ومقسم لـ 5 حلقات تقريبًا هنكمل فيهم مع بعض كل التفاصيل.

شاهد أيضاً

التصريح الأمني

التصريح الأمني | تعرف على الدول التي تحتاج التصريح الامني وكيفية استخراجه

التصريح الأمني | الرحالة | ارتفع عدد الدول التي ينبغي على المصريين الحصول على تصريح …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *