الرئيسية / آسيا / جنة المالديف ليست حلمًا.. تعرف كيف تسافر إليها بأقل تكلفة

جنة المالديف ليست حلمًا.. تعرف كيف تسافر إليها بأقل تكلفة

تجربة- محمد الهواري وبهاء فاروق:

معروف إن جزر المالديف من أغلى الأماكن السياحية في العالم، إن لم تكن أغلاها على الإطلاق, ولكن إزاي نطلع رحلة للمالديف متكلفناش أكتر من 4000 جنيه للفرد .(الأسعار الواردة في هذا التقرير قبل تعويم الجنيه)، الحل هو الجزر المحلية السياحية.

إيه بقي حكاية الجزر المحلية دي؟

الجزر في المالديف كذا نوع , جزر عليها ريزورت فخمة جدا ودي اشترتها فنادق عالمية وسعر الليلة فيها ممكن يوصل لـ 12 ألف دولار, وفي جزر سكنية ودي اللي عايش عليها أهل البلد وغالبا بتكون مهملة شوية, و في جزر غير مأهولة تماما ودي تصلح لرحلات اليوم الواحد, وفيه الجزر المحلية السياحية وهي دي اللي احنا عايزينها.

الجزر المحلية دي جزر أهلية برضه، عايش فيها ناس، بس الطبيعة حواليها حلوة جدا والشاطئ بتاعها جميل، وقريبة من مناطق الغطس والـsnorkeling ومن المنتجعات والجزر غير المأهولة، فبدأ يظهر عليها واحدة واحدة نوع من الفنادق أو النزل اسمه guest houses سعرها رخيص جدا مقارنة بالفنادق والمنتجعات. ابتدت تتعرف وابتدا الرحالة ييجوا لها من أوروبا وأمريكا، وبالتالي ابتدت تتطور أكتر وتنتشر فى أماكن كتير في المالديف.

في الجزر السياحية دى ممكن تلاقي غرفة بالفطار بـ35 دولار فى الليلة، وممكن توصل لحد 150 دولار برضه لو عايز حاجة فخمة شوية، وهتلاقي رحلات excursion تشوف فيها دلافين وسلاحف وسمك قرش وتسبح معاهم كمان وتعمل snorkeling بـ45 دولار مثلا أو أقل. بينما في المنتجعات هيطلعك تشوف نفس الدلافين و لكن بـ100 دولار.

من الجزر السياحية دي ممكن تطلع رحلة صيد سمك في الغروب أو تروح تقضي يوم فى منتجع فخم قريب day use شامل الغدا بـ100 دولار أو تحضر حفلة مسائية فى منتجع، أو تطلع تقضي يوم في جزيرة غير مأهولة ولو حظك حلو ممكن تكون عليها لوحدك مع مراتك 😉 ومش هتكلفك أكتر من 20 دولار.

باختصار الجزر السياحية دي فيها حاجات كتير ممكن تتعمل أكتر من المنتجعات وأرخص بكتير, و بالليل الشاطئ كله بيكون مطاعم open air على البحر وممكن تتعشا عشاء رومانسي على ضوء الشموع والعشا بيكون أكلة سمك معتبره ومش هتكلفك أكتر من 50 جنيه للفرد.

طيب إزاي توصل للجزر دي؟

كل الجزر دي قريبة نسبياً من العاصمة وفيه عبارة عمومية public ferry بتروح هناك مرة أو مرتين يومياً بحوالي 2 دولار وبتاخد حوالي ساعة ونص أو ساعتين حسب الجزيرة. وتقدر تعرف مواعيد الفيري من موقع http://www.mtcc.com.mv/content/rashu-link , أو ممكن تاخد لانش سريع بياخد بتاع نص ساعة وبيطلع حوالي 4 مرات في اليوم وسعره حوالي 25 دولار للفرد حسب الجزيرة برضه.

من أشهر الجزر دي حاليا Maafushi, Gulhi, Guraidhoo, Huraa, Thulusdhoo, وغيرها

سعر تذكرة الطيران على فلاي دبي بسعر 3323 جنيه و تقدر تحجز 4 ليالي في فندق Venturo Maldives وده هيكلفنا الغرفة المزدوجة بالضرائب والفطار والانتقالات 1360 جنيه للفردين, يعني الفرد 680 جنيه + 3323 طيران = 4000 جنيه 😉

الحلو بقى إن المالديف مش محتاجة فيزا مسبقة والفيزا بتاخدها عند الوصول وببلاش وكمان مش محتاجة تصريح أمني, يعني تقدر تحضر شنطتك وتطلع من بكره.. مستني إيه اتجنن وسافر 😉

هذا التقرير منشور بالاتفاق مع صفحة Travel Secrets

شاهد أيضاً

جزيرة بالي اندونيسيا

جزيرة بالي اندونيسيا بالصور: أجمل معالمها وشواطئها وأفضل مواعيد السفر إليها

جزيرة بالي | الرحالة |   هي جنة راكبي الأمواج المعروفة بجمالها الطبيعي، حيث الشواطئ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *