تطبيق على تليفونك يجيبك على السؤال الهام: آخد معايا كام وأنا مسافر

تجربة- بهاء فاروق:

سؤال بتسأله كل يوم 100 مره 😀 , أنا مسافر المكان الفلاني آخد معايا كام؟، طيب هصرف كام؟ طيب تكاليف المعيشة كأكل وانتقالات وغيره قد إيه؟، طبعا سؤال مهم جدًا ومحير لناس كتير أثناء التخطيط للرحلة, بس اطمن عندي الإجابة 😉

كل ده تقدر تعرفه من تطبيق واحد بس على الموبايل اسمه cost of living، البرنامج بقى ده بيعمل إيه؟، البرنامج بيوضح لك تكاليف المعيشة في كل المدن في العالم تقريبًا، ومش كده بس تقدر من خلاله تختار العملة، ولو نفرض الجنيه المصري, ويجيب لك أسعار المعيشة اليومية في المدينة, يعني متوسط سعر الفنادق والانتقالات والأكل ولو حبيت تأجر شقة متوسط أسعارها كام.

الحلو بقى في التطبيق ده واللي بجد مش هيخليك تستغنى عنه, إنه بيقارن لك بين مدينتين, يعني تقدر مثلا تختار إنك تقارن بين باريس وروما علشان تعرف أنهي بلد هتكلفك أقل كمعيشة، فهيجيب لك سعر تذكرة المترو مثلا في المدينتين, متوسط سعر الوجبة في ماكدونالدز, سعر إزاة المياه, البيبسي, سعر الوجبة في مطعم معقول, كمان سعر الخضار والفاكهة في البل, حتى أسعار الفسح واللبس كمان لو حبيت.

كده أعتقد أي حد بيفكر يحدد ميزانية المعيشة في أي دوله هتكلفه كام قبل السفر هيقدر عن طريق الأبليكاشن ده إنه يعرف متوسط الأسعار تقريبا في أي مدينة.

ده لينك البرنامج على أندرويد : https://goo.gl/dhe5LP

بالنسبه للايفون ده برنامج مشابهه ليه : https://goo.gl/53kNt3

و ده موقع انترنت بيعمل برضه نفس الفكره : http://goo.gl/tajg1d